តារាចម្រៀងតស៊ូយ៉ាងកម្សត់កម្រលោក បូ ចាន់ណាក់ ហៅវេហា បានទទួលមរណៈភាពហើយ
- ភ្នំពេញ
រាជធានីភ្នំពេញ ៖ លោក បូ ចាន់ណាក់ ហៅ វេហា បានទទួលមរណៈភាពហើយបន្ទាប់ពីត្រូវភ្លើងឆេះយ៉ាងធ្ងន់ធ្ងរដែលបានកើតឡើងនៅក្លឹបកំសាន្ត LV ខេត្តព្រះសីហនុ…
រាជធានីភ្នំពេញ ៖ លោក បូ ចាន់ណាក់ ហៅ វេហា បានទទួលមរណៈភាពហើយបន្ទាប់ពីត្រូវភ្លើងឆេះយ៉ាងធ្ងន់ធ្ងរដែលបានកើតឡើងនៅក្លឹបកំសាន្ត LV ខេត្តព្រះសីហនុ ទីដែលលោកប្រកបអាជីពចម្រៀងនៅទីនោះ កាលពីយប់រំលងអធ្រាត្រឆ្លងចូលថ្ងៃ២២ ខែកុម្ភៈ ឆ្នាំ២០១៨ ហើយលោកបានទទួលមរណៈភាពនៅវេលាម៉ោង៣ទៀបភ្លឺថ្ងៃ២៣ ខែកុម្ភៈ ឆ្នាំ២០១៨ នេះនៅមន្ទីរពេទ្យប្រទេសវៀតណាម ។
ដំណឹងមរណៈភាពរបស់លោក វេហា ត្រូវបានផ្សព្វផ្សាយតាមបណ្តាញសង្គមហ្វេសប៊ុកមួយឈ្មោះ YA Ya Cambodia ដោយនៅក្នុងនោះមានការបង្ហោះរូបភាពសាកសពលោក វេហា ដោយភ្ជាប់ជាមួយសារដ៏ខ្លីថា «ប្តីខ្ញុំស្លាប់ហើយ» ។ តារាចម្រៀងប្រចាំក្លឹប LV លោក វេហា ត្រូវបានក្រុមគ្រួសារបញ្ជូនទៅសង្គ្រោះភ្លាមៗ បន្ទាប់ពីលោកបានទទួលរងនូវការឆេះខ្លួនយ៉ាងធ្ងន់ធ្ងរពីអគ្គីភ័យ ហើយលោកទទួលមរណៈភាពនៅថ្ងៃបន្ទាប់ក្រោយកើតហេតុ ។
យ៉ាងណាក៏ដោយនៅមិនទាន់មានប្រភពច្បាស់លាស់ណាមួយបញ្ជាក់មូលហេតុដែលនាំឲ្យលោកត្រូវឆេះរហូតស្លាប់ខ្លួននោះឡើយ ប៉ុន្តែបើតាមការបញ្ជាក់របស់លោក សាវីន ហ្វីលីព បានឲ្យដឹងថា ក្នុងពេលកើតហេតុនោះលោក វេហា ទំនងជាស្រវឹងមិនអាចរត់ចេញពីអគ្គីភ័យដែលឆាបឆេះនោះបានទើបត្រូវភ្លើងឆេះយ៉ាងពេញខ្លួនដូច្នេះ ។ យ៉ាងណាក៏ដោយទាំងលោក ហ្វីលីព លោកក្រុមគ្រួសារលោក វេហា បានសម្តែងការសោកស្តាយជាពន់ពេកក្នុងពេលដែលតារាចម្រៀងក្នុងក្លឹបរាត្រីរូបនេះមានប្រវត្តិតស៊ូយ៉ាងកម្សត់កម្របំផុត ។
បើតាមលោក សាវីន ហ្វីលីព លោក វេហា ជាមនុស្សដែលលោកបានស្គាល់ជាង១០ឆ្នាំមកហើយតាំងពីលោកមានប្រវត្តិច្រៀងនៅប៊ៀរហ្គាដិនដើម្បីដូរបាយ ។ លោកបញ្ជាក់ថា នៅពេលដែលលោកមានឱកាសមកច្រៀងនៅក្លឹប LV នេះលោកបានមានភរិយា និងកូនម្នាក់នៅទីនោះតែអ្នកទាំងពីរបានលែងលះគ្នាវិញ ដោយលោកត្រូវមានភារកិច្ចចិញ្ចឹមកូន ។ តារាចម្រៀងលោក វេហា ជាមនុស្សម្នាក់ដែលមានការចរិកសុភាពរាបសារ និងមានការគោរពរៀមច្បងនៅក្នុងសិល្បៈណាស់ ហើយសម្លេងក៏ពិរោះ ប៉ុន្តែលោកគ្មានឱកាសសម្រាប់បញ្ចេញសមត្ថភាពតាមឆាកតន្ត្រីធំៗឡើយ ។
លោក សាវីន ហ្វីលីព បានបញ្ជាក់បន្ថែមថា ក្នុងពេលដែលមើលឃើញពីភាពលំបាករបស់លោក វេហា នោះរូបលោក និងក្រុមការងារមួយចំនួនទៀតបានគ្រោងផលិតបទ Original Song សម្រាប់ឲ្យលោកច្រៀង ដើម្បីទាក់ទាញប្រជាប្រិយភាព ។ ប៉ុន្តែគម្រោងមួយនេះមិនទាន់បានចេញជារូបរាងផងលោក វេហា បានទទួលមរណៈភាពដ៏គូរឲ្យសោកស្តាយ ៕
ចែករំលែកព័តមាននេះ