រាជធានីភ្នំពេញ ៖ ប្រជាពលរដ្ឋក្នុងបុរីមួយកន្លែងប្រមាណ៥០គ្រួសារ បានផ្ទុះការតវ៉ាមិនពេញចិត្តចំពោះប្រជាពលរដ្ឋមួយគ្រួសារដែលរស់នៅខាងដើមផ្លូវ បានសង់ទ្វារស័ង្កសីបិទផ្លូវសាធារណៈ មិនឲ្យប្រជាពលរដ្ឋចេញចូលនៅពេលយប់ បង្កឲ្យមានការភ្ញាក់ផ្អើលឡើងកាលពីវេលាម៉ោង០៧យប់ ថ្ងៃទី២២ ខែកុម្ភៈ ឆ្នាំ២០១៨…
រាជធានីភ្នំពេញ ៖ ប្រជាពលរដ្ឋក្នុងបុរីមួយកន្លែងប្រមាណ៥០គ្រួសារ បានផ្ទុះការតវ៉ាមិនពេញចិត្តចំពោះប្រជាពលរដ្ឋមួយគ្រួសារដែលរស់នៅខាងដើមផ្លូវ បានសង់ទ្វារស័ង្កសីបិទផ្លូវសាធារណៈ មិនឲ្យប្រជាពលរដ្ឋចេញចូលនៅពេលយប់ បង្កឲ្យមានការភ្ញាក់ផ្អើលឡើងកាលពីវេលាម៉ោង០៧យប់ ថ្ងៃទី២២ ខែកុម្ភៈ ឆ្នាំ២០១៨ ត្រង់ចំណុចក្នុងបុរីមួយកន្លែងនៅខាងក្រោយផ្សារត្រពាំងឈូក ស្ថិតក្នុងភូមិអូគ័រដេ សង្កាត់អូបែកក្អម ខណ្ឌសែនសុខ ។
បើតាមសម្តីពីប្រជាពលរដ្ឋដែលផ្ទុះការតវ៉ាបានរៀបរាប់ប្រាប់ឲ្យដឹងថា ពួកគាត់បានរស់នៅក្នុងបុរីខាងលើនោះអស់រយៈពេល៦ឆ្នាំមកហើយ ។ កាលពីមុនបុរីខាងលើ គឺមានចក្រចូលខាងជើងតែមួយទេ លុះដល់ថ្ងៃទី០៧ ខែវិច្ឆិកា ឆ្នាំ២០១២ ដោយខាងម្ចាស់បុរីឃើញផលវិបាករបស់ប្រជាពលរដ្ឋដែលរស់នៅ ខាងម្ចាស់បុរីក៏បានទិញដីទំហំក្បាល៥ម៉ែត្របណ្តោយពីផ្លូវខាងមុខផ្សារត្រពាំងឈូកដល់របងបុរី ពីឈ្មោះ កេត ជីម ភេទប្រុស អាយុ៧៦ឆ្នាំ ដែលជាម្ចាស់ដីក្នុងតម្លៃ២ម៉ឺនដុល្លារ ដោយមានក្រដាសស្នាម និងស្នាមមេដៃ ទាំងព្រមព្រៀងពីភាគីទាំងសងខាង ។
ម្ចាស់បុរីក៏បានធ្វើការចាក់បេតុងធ្វើជាផ្លូវចក្រចូលខាងលិចមួយទៀត ដើម្បីផ្តល់ការងាយស្រួលដល់ប្រជាពលរដ្ឋដែលរស់នៅក្នុងបុរី លុះដល់ឆ្នាំ២០១៤ បុគ្គលឈ្មោះ កេត ជីម បានធ្វើការសាងសង់ទ្វារស័ង្កសីបិទចក្រចូលខាងលិច ដោយត្អូញថា ខ្លាចមានចោរលួចរថយន្តរបស់គាត់ ដែលកន្លងមកបានលក់ទៅឲ្យម្ចាស់បុរីដែលមានក្រដាសស្នាមត្រឹមត្រូវ ។ បង្កឲ្យមានផលវិបាកដល់ប្រជាពលរដ្ឋ ព្រោះពេលកន្លងមកបុគ្គលឈ្មោះ កេត ជីម ខាងលើបានធ្វើទ្វារបិទចក្រចូលខាងលិចនៅពេលយប់គឺចាប់ពីម៉ោង០៦ល្ងាចទៅបើកតែពេលថ្ងៃគឺចាប់បើកពីម៉ោង០៧ព្រឹកទៅដល់ល្ងាច ។ ពេលដែលប្រជាពលរដ្ឋរស់នៅក្នុងបុរីមានកម្មវិធីបុណ្យទានម្តងៗត្រូវការសងរោងបុណ្យ ឬការនៅក្នុងបុរី រួចទៅសូមបុគ្គលខាងលើឲ្យបើកទ្វារចក្រចូលខាងលិចម្តងៗនៅពេលយប់ គឺបុគ្គលរូបនោះមិនព្រមបើកឲ្យធ្វើដំណើរនោះទេ ។
ប្រភពដដែលបានបន្តថា កន្លងមកពួកគាត់ក៏ធ្លាប់បាននាំគ្នាដាក់ពាក្យបណ្ដឹងទៅសង្កាត់ជាច្រើនលើច្រើនសារណាស់មកហើយដែរ តែគ្រាន់តែចៅសង្កាត់បានហៅពួកគាត់ និងបុគ្គលខាងលើទៅធ្វើការសម្របសម្រួលគ្នា រួចបុគ្គលខាងលើក៏ព្រមធ្វើការបើកទ្វារឲ្យតែមិនបានប៉ុន្មានផងក៏ដូចដើមវិញ ។ លុះដល់ថ្ងៃកើតហេតុនៅផ្លូវចក្រចូលបុរីទិសខាងជើងមានផ្ទះមួយបានសងរោងការនៅលើផ្លូវបង្កឲ្យពួកគាត់បើករថយន្ត ឬម៉ូតូចេញទៅខាងក្រៅមិនបាន បន្ទាប់មកពួកគាត់ក៏បាននាំគ្នាទៅសូមបុគ្គលឈ្មោះ កេត ជីម ខាងលើឲ្យបើកទ្វារចក្រចូលខាងលិចតែបុគ្គលរូបនោះមិនព្រមបើកនោះទេ ក៏ទោះបីជាពួកគាត់សូមអង្វរបុគ្គលខាងលើយ៉ាងណាក៏ដោយ ទើបបង្កឲ្យមានការឈ្លោះប្រកែចគ្នាផ្អើលដល់អាជ្ញាធរមូលដ្ឋានចុះមកអន្តរាគមន៍ ។
ក្រោយពេលកើតហេតុ អាជ្ញាធរមូលដ្ឋានបានពិភាក្សាជាមួយប្រជាពលរដ្ឋ ហើយបានធ្វើការវាយទម្លុះទ្វារស័ង្កសីខាងលើ ដើម្បីឲ្យប្រជាពលរដ្ឋធ្វើដំណើរចេញចូល និងរង់ចាំធ្វើការកោះហៅបុគ្គលខាងលើរួមទាំងប្រពលរដ្ឋទាំង៥០គ្រួសារទៅធ្វើការដោះស្រាយគ្នានៅសង្កាត់អូបែកក្អមនៅពេលក្រោយ ៕
ចែករំលែកព័តមាននេះ