ប្រទេសស៊ីរី ៖ ក្រុមប្រឹក្សាសន្តិសុខ អ.ស.ប ប្រហែលជាត្រូវអនុម័តនាថ្ងៃទី២២ កុម្ភៈ គម្រោងដំណោះស្រាយមួយដែលទាមទារឱ្យមានបទឈប់បាញ់គ្នារយៈពេល៣០ថ្ងៃនៅស៊ីរី ដើម្បីឱ្យជំនួយមនុស្សធម៌អាចបញ្ជូនទៅកាន់តំបន់ GHOUTA ខាងកើតជាទីតាំងពួកឧទ្ទាមមួយស្ថិតនៅក្បែរក្រុងដាម៉ាស់កំពុងរងការវាយប្រហារយ៉ាងខ្លាំងក្លាបំផុតគឺសំណាក់របបស៊ីរីដែលក្នុងរយៈពេល៤ថ្ងៃ បណ្តាលឱ្យមនុស្សស្លាប់យ៉ាងតិច៣២០នាក់ ក្នុងនោះមានកុមារ៧៦នាក់ ។
ប្រទេសស៊ុយអែត និងគុយវ៉ែត ដែលរៀបរៀងសំណើនេះបានទាមទារឱ្យមានការបោះឆ្នោតអនុម័តដោយឆាប់រហ័សបំផុតដោយបេសកកម្មការទូតស៊ុយអែតប្រចាំ អ.ស.ប ថា អាចនាថ្ងៃទី២២ កុម្ភៈ ។ ទោះបីយ៉ាងណា គេពុំដឹងថាតើរុស្ស៊ីដែលទាមទារឱ្យមានកិច្ចប្រជុំបន្ទាន់មួយរបស់ក្រុមប្រឹក្សាសន្តិសុខអំពីរឿងនោះមានបំណងប្រើសិទ្ធិវេតូរាំងខ្ទប់គម្រោងដំណោះស្រាយនេះ ឬយ៉ាងណាឡើយ ។ ពួកអ្នកការទូតសង្ឃឹមថា ក្រុងមូស្គូអាចបោះឆ្នោតអនុប្បវាទ ។
នៅមុខក្រុមប្រឹក្សាសន្តិសុខអគ្គលេខាធិការ អ.ស.ប លោក ANTONIO GUTERRES ស្នើឱ្យបញ្ឈប់ជាបន្ទាន់ការប្រយុទ្ធក្នុងតំបន់នេះដែលលោកបរិហារថាជាឋាននរកមួយនៅលើផែនដី ។
គណៈកម្មាធិការកាកបាទក្រហមអន្តរជាតិ CICR កាលពីថ្ងៃទី២១ កុម្ភៈ ទាមទារឱ្យមានការអនុញ្ញាតចូលទៅកាន់តំបន់ដែលរងការវាយប្រហារតាមអាកាស និងការបាញ់ផ្លោងដែលនាថ្ងៃទី២១ កុម្ភៈ សម្លាប់មនុស្ស៥០នាក់ ក្នុងនោះមានកុមារ៨នាក់ ។ នេះបើតាមតុល្យការចុងក្រោយរបស់អង្គការសិទ្ធិមនុស្សស៊ីរី OSDH ។ បណ្តាក្រុមជួយសង្គ្រោះ នាពេលយប់រកឃើញសាកសពជនស៊ីវិល៨នាក់ ក្នុងនោះមានកុមារ៤នាក់ ប្រហែលស្ថិតក្នុងគ្រួសារតែមួយនៅទីក្រុង HAZEH ។
យុទ្ធនាការវាយប្រហារតាមអាកាសថ្មីនេះដែលបំផ្លិចបំផ្លាញបំផុតប្រឆាំងតំបន់នោះតាំងពីចាប់ផ្តើមសង្គ្រាមរយៈពេលជិត៧ឆ្នាំមកចាប់ធ្វើពីថ្ងៃទី១៨ កុម្ភៈ មុនពេលមានការវាយលុកខាងជើងគោករបស់របបស៊ីរី ។
យោងតាមតុល្យការចុងក្រោយមួយរបស់ OSDH ថា យុទ្ធនាការនេះបណ្តាលឱ្យជន
ស៊ីវិលស្លាប់ជាង៣២០នាក់ ក្នុងនោះមានកុមារ៧៦នាក់ ។ នារីយ៉ាងតិច៤៥នាក់ស្លាប់ ហើយមនុស្សជាង១.៦៥០នាក់រងរបួស ។
ការបំផ្លិចបំផ្លាញពិតជាធំធេងក្នុងតំបន់ដែលមានប្រជាជនប្រមាណ៤០០.០០០នាក់ រស់នៅក្នុងការឡោមព័ទ្ធរបស់របបស៊ីរីចាប់តាំងពីឆ្នាំ២០១៣មក ។
ប្រជាជនតំបន់ GHOUTA ខាងកើតនិយាយកាលពីថ្ងៃទី២១ កុម្ភៈ ប្រាប់សារព័ត៌មានថា ពួកគេរង់ចាំវេននៃសេចក្តីស្លាប់ ខណៈការវាយប្រហារតាមអាកាសបង្កើនយ៉ាងខ្លាំងពុំធ្លាប់មានតាំងពីចាប់ផ្តើមសង្គ្រាមមក ៕
ចែករំលែកព័តមាននេះ