បុរសចំណាស់ម្នាក់អង្គុយយំម្នាក់ឯងនៅហាងបាយមួយក្នុងក្រុង«Corpus Christi»រដ្ឋតិចសាស់ សហរដ្ឋអាមេរិកក្នុងថ្ងៃបុណ្យនៃសេចក្តីស្រឡាញ់ ។ នៅលើតុទល់មុខគាត់គឺធាតុរបស់ប្រពន្ធគាត់ដែលបានចែកឋានទៅ និងកែវស្រាដាក់នៅមុខធាតុនោះ ។ គាត់ធ្វើបែបនោះព្រោះហាក់ដូចជាប្រពន្ធរបស់គាត់កំពុងអង្គុយពិសាបាយជាមួយគាត់ ។
នាងChasidy Gwaltneyដែលបានថតរូបភាពនោះ និងបង្ហោះនៅលើហ្វេសប៊ុកបានសរសេរក្រើនរំលឹកដល់មនុស្សគ្រប់រូបថា«ខ្ញុំមើលឃើញព្រឹត្តិការណ៍នៅក្នុងថ្ងៃនេះធ្វើឱ្យយល់ថា មានពេលខ្លះយើងមិនបាននៅជាមួយគ្នា មិនបាននិយាយ ឬបារម្ភពីគ្នា ។
សម្រាប់រូបថតនេះអាចឆ្លុះបញ្ចាំងឱ្យឃើញថា ធ្វើឱ្យបេះដូងរបស់អ្នកឈឺចាប់ដូចរូបខ្ញុំក៏ថាបាន ។ យើងអាចមិនសូវចាប់អារម្មណ៍លើរឿងរ៉ាវបែបនេះបាន ប៉ុន្តែបុរសម្នាក់នេះបានចំណាយពេលបុណ្យនៃក្តីស្រឡាញ់អង្គុយតែម្នាក់ឯង សម្លឹងទៅប្រពន្ធរបស់គាត់ហាក់ដូចជាកំពុងអង្គុយនៅទល់មុខគ្នា ។
សេចក្តីស្រឡាញ់ដែលគាត់មានទៅលើប្រពន្ធហាក់ដូចជាមានភាពស្រស់ស្រាយ រហូតដល់ថ្នាក់យកធាតុតាមខ្លួន និងអង្គុយពិសាបាយរួមគ្នា» ៕
ចែករំលែកព័តមាននេះ