ខេត្តកណ្តាល ៖ តាមសេចក្តីរាយការណ៍បានឱ្យដឹងថា កាលពីវេលាម៉ោង៣ទៀបភ្លឺចូលថ្ងៃទី២១ កុម្ភៈ នៅក្នុងរោងចក្រទី៥ ក្រុមហ៊ុន៧NG ស្ថិតនៅភូមិព្រៃចាស់ ឃុំវិហារសួគ៌ ស្រុកខ្សាច់កណ្តាល…
ខេត្តកណ្តាល ៖ តាមសេចក្តីរាយការណ៍បានឱ្យដឹងថា កាលពីវេលាម៉ោង៣ទៀបភ្លឺចូលថ្ងៃទី២១ កុម្ភៈ នៅក្នុងរោងចក្រទី៥ ក្រុមហ៊ុន៧NG ស្ថិតនៅភូមិព្រៃចាស់ ឃុំវិហារសួគ៌ ស្រុកខ្សាច់កណ្តាល មានករណីចោរលួចកាត់សោទ្វារចូលយកលុយ និងសម្ភារអស់រាប់មឺុនដុល្លារអាមេរិក ។
តាមប្រភពព័ត៌មានពីលោក ប៊ុន ណារ៉េត អាយុ៤៦ឆ្នាំ ជាប្រធានរដ្ឋបាលមានទីលំនៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ បានរៀបរាប់ឱ្យសមត្ថកិច្ចដឹងថា នៅក្រុមហ៊ុនសុីសក្លូបល(ខេអេច)ខូអិលធីឌី ជាក្រុមហ៊ុនផលិតស្រោមដៃ នៅយប់កើតហេតុនោះមានសន្តិសុខយាមប្រចាំការចំនួន៣នាក់ លុះដល់ម៉ោង៣ទៀបភ្លឺស្រាប់តែមានចោរលួចកាត់សោទ្វារពីរកន្លែងនៅចំហៀងខាងក្រោយរោងចក្រ និងចំហៀងខាងកើតចូលលួចយកសម្ភារនិងទ្រព្យសម្បត្តិអស់ជាច្រើន ។ សម្ភារដែលត្រូវបាត់បង់មាន Laptop១គ្រឿង iPad១គ្រឿង កាតគ្រីរថយន្ត១សន្លឹក និងគាស់ទូរដែកយកប្រាក់អស់ចំនួន២៧.៦៦៥ដុល្លារអាមេរិក និងលុយខ្មែរ៧៣៦.១០០រៀល ។
ក្រោយពីធ្វើសកម្មភាព ក្រុមចោរបានបន្សល់ទុកស្បែកជើងផ្ទាត់១គូ និងស្រោមដៃចំនួន៨បេដែលក្រុមចោរយកចេញមិនរួច ។ ករណីខាងលើនេះសមត្ថកិច្ចជំនាញនគរបាលព្រហ្មទណ្ឌស្រុកខ្សាច់កណ្តាលកំពុងធ្វើការស្រាវជ្រាវ និងស៊ើបអង្កេត ដើម្បីវែកមុខក្រុមចោរចិត្តស្លុយទាំងនេះ ។
ជុំវិញករណីនេះ សមត្ថកិច្ចបានដាក់ជាចម្ងល់ផងដែរថា រោងចក្រមួយទាំងមូលដាក់សន្តិសុខយាមរហូតដល់ទៅ៣នាក់ បែរជាចោរលួចកាត់សោទ្វាររោងចក្រចូលយកលុយកាក់សម្ភារ ហើយអត់មានអ្នកណាដឹង គួរឱ្យឆ្ងល់ដែរ ៕
ចែករំលែកព័តមាននេះ