រាជធានីភ្នំពេញ ៖ ការអភិវឌ្ឍសង្គមមួយប្រកបដោយសមធម៌ និងចីរភាព ទាមទារឲ្យមានការចូលរួមរបស់ស្ត្រីនិងបុរស ។ ការផ្ដល់ឱកាសដល់ស្ត្រីដើម្បីចូលរួមក្នុងការអភិវឌ្ឍវិស័យបច្ចេកវិទ្យា គមនាគមន៍ ព័ត៌មានវិទ្យា គឺមានសារសំខាន់ណាស់ក្នុងការផ្ដល់ភាពអង់អាចដល់ស្ត្រី…
រាជធានីភ្នំពេញ ៖ ការអភិវឌ្ឍសង្គមមួយប្រកបដោយសមធម៌ និងចីរភាព ទាមទារឲ្យមានការចូលរួមរបស់ស្ត្រីនិងបុរស ។ ការផ្ដល់ឱកាសដល់ស្ត្រីដើម្បីចូលរួមក្នុងការអភិវឌ្ឍវិស័យបច្ចេកវិទ្យា គមនាគមន៍ ព័ត៌មានវិទ្យា គឺមានសារសំខាន់ណាស់ក្នុងការផ្ដល់ភាពអង់អាចដល់ស្ត្រី ឲ្យក្លាយជាធនធានមនុស្សដ៏មានតម្លៃក្នុងសង្គម ។ យ៉ាងនេះក្ដី បើទោះបច្ចេកវិទ្យាបច្ចុប្បន្ន កំពុងរីកចម្រើនជឿនលឿនយ៉ាងណាក៏ដោយ ក៏ការចូលរួមរបស់ស្ត្រីនៅក្នុងវិស័យបច្ចេកវិទ្យា គឺមានចំនួនតិចជាងបុរសនៅឡើយ ។
អ្នកនាង សូត្រ ម៉ានិច ដែលកំពុងបម្រើការងារនៅស្ថានីយទូរទស្សន៍ក្នុងស្រុកមួយ បានបង្ហាញពីបរិបទស្ត្រីក្នុងសម័យបច្ចេកវិទ្យាថា បច្ចុប្បន្ននេះ វិស័យបច្ចេកវិទ្យាបានផ្ដល់ឱកាសការងារជាច្រើនដល់ស្ត្រី ឲ្យតែមានចំណេះដឹង និងជំនាញច្បាស់លាស់ ពួកគាត់នឹងទទួលបានការងារដ៏មួយល្អ ។
អ្នកនាងនិយាយថា ៖« សព្វថ្ងៃនេះ ស្ត្រីយើងមានឱកាសការងារច្រើនណាស់ក្នុងវិស័យបច្ចេកវិទ្យា ព្រោះវាជាការងារស្រាល មិនត្រូវការបញ្ចេញកម្លាំងច្រើន និងត្រូវការតែចំណេះដឹង និងគំនិតច្នៃប្រឌិតប៉ុណ្ណោះ ។ ដូច្នេះ ការរីកចម្រើននៃបច្ចេកវិទ្យាបច្ចុប្បន្ននេះ ពិតជាបានផ្ដល់ឱកាសដល់ស្ត្រីយ៉ាងច្រើនក្នុងការចូលរួមអភិវឌ្ឍន៍សង្គមជាតិ » ។
ចំណែកកញ្ញា ហ៊ាន សុគន្ធា ដែលបច្ចុប្បន្នកំពុងបម្រើការងារនៅក្រុមហ៊ុនព័ត៌មានវិទ្យាមួយ បានប្រាប់កោះសន្តិភាពថា វាមិនចម្លែកទេ ដែលពីមុនគេថា ស្ត្រីបង្វិលចង្ក្រានមិនជុំ ដោយសារតែពួកគាត់ជាស្ត្រីមិនព្រមទទួលស្គាល់នូវសមត្ថភាពរបស់ខ្លួនឯង សុខចិត្តនៅកាន់គំនិតមួយនេះ ប៉ុន្ដែបច្ចុប្បន្ន ទស្សនៈនេះបានរសាត់ឆ្ងាយពីផ្នត់គំនិតយុវវ័យទៅហើយ ។
កញ្ញាសុគន្ធា និយាយថា ៖« គ្មានរឿងអ្វីដែលថាស្ត្រីធ្វើមិនបាននោះទេ ពិសេសពាក់ព័ន្ធនឹងជំនាញប្រើប្រាស់បច្ចេកវិទ្យា គឺយើងអាចធ្វើបានដូចបុរសដែរ » ។ កញ្ញាបានរំឭកពីពាក្យចាស់ថា ៖« សម័យមុន ចាស់ៗមិនឲ្យកូនស្រីរៀនចេះដឹងខ្ពស់ពេកទេ ខ្លាចសរសេរសំបុត្រជូនប្រុសស្នេហ៍ តែសម័យឥឡូវ មិនត្រឹមតែសំបុត្រទេ គឺប្រព័ន្ធទំនាក់ទំនងសង្គម ស្ត្រីចេះប្រើស្ទើរគ្រប់គ្នា រហូតដល់កូនស្រីរបស់ពួកគាត់មួយចំនួនបម្រើការងារខាងវិស័យមួយនេះទៀតផង ហើយមហាជនហៅស្ត្រីទាំងនោះថា «ជាស្ត្រីក្នុងសម័យបច្ចេកវិទ្យា» និងគ្រប់បណ្ដាក្រុមហ៊ុនទាំងអស់សុទ្ធតែផ្ដល់តម្លៃរវាងស្ត្រី និងបុរស គឺមានសិទ្ធិ និងសមត្ថភាពដូចគ្នាទាំងអស់ » ។
គួររំឭកថា ក្រសួងប្រៃសណីយ៍ និងទូរគមនាគមន៍បានប្រកាសបើកនូវកម្មវិធីដំបូងគេមួយឈ្មោះថា «ស្ត្រីកម្ពុជាក្នុងវិស័យបច្ចេកវិទ្យា» ដែលកម្មវិធីនេះផ្ដោតលើប្រធានបទ «ការផ្ដល់សិទ្ធិអំណាចដល់ស្ត្រីតាមរយៈបច្ចេកវិទ្យា គមនាគមន៍ និងព័ត៌មាន» ក្នុងគោលបំណងលើកទឹកចិត្តដល់ស្ត្រីចូលរួមចំណែកការពាំនាំ និងកែប្រែកម្ពុជាឲ្យក្លាយទៅជាប្រទេសមួយមានសក្ដានុពល និងរីកចម្រើនក្នុងយុគសម័យឌីជីថល ក៏ដូចជាបង្ហាញពីការកាត់បន្ថយគម្លាតឌីជីថលក្នុងវិស័យយេនឌ័រ ។
លោក កាន ច័ន្ទមេត្តា រដ្ឋលេខាធិការនៃក្រសួងប្រៃសណីយ៍ និងទូរគមនាគមន៍ បានមានប្រសាសន៍ថា ៖« កន្លងមក យើងមើលឃើញថា ស្ត្រីកម្ពុជាមានចំនួនតិចតួចណាស់ដែលបានចាប់យកជំនាញ និងធ្វើការក្នុងវិស័យនេះ ទោះជាពួកគាត់មានសមត្ថភាព និងការច្នៃប្រឌិតប្លែកៗមិនចាញ់បុរសក៏ដោយ ។ ដើម្បីជំរុញការចូលរួមបន្ថែមទៀត យើងចាំបាច់ត្រូវបង្កើតកម្មវិធីលើកទឹកចិត្តនានា ។ ជាលទ្ធផល ពានរង្វាន់ស្ត្រីឆ្នើមក្នុងវិស័យបច្ចេកវិទ្យានេះ នឹងជួយបំផុសទឹកចិត្តឱ្យស្ត្រីដទៃទៀតចាប់អារម្មណ៍ និងចូលរួមជាបន្តបន្ទាប់ » ៕
ចែករំលែកព័តមាននេះ