រាជធានីភ្នំពេញ ៖ រថយន្តដឹកស៊ីម៉ងត៍១គ្រឿងបានរងការខូចខាតក្រពឹតខ្ទេចមុខ ដោយសារតែបុកពីក្រោរថយន្តទ្រង់ដឹកទំនិញ១គ្រឿងទៀត ក្នុងខណៈកំពុងបើកបរធ្វើដំណើរស្របគ្នាសុខៗស្រាប់តែរថយន្តទ្រុងនោះបត់ឆ្លងផ្លូវធ្វើឲ្យវាក់ជាន់ហ្វ្រាំងមិនជាប់ ក៏បុកពីក្រោយពេញទំហឹងតែម្ដង ។ ឧប្បត្តិហេតុគ្រោះថ្នាក់នេះបានកើតឡើងកាលពីវេលាម៉ោង១១ព្រឹក ថ្ងៃទី២២ ខែកុម្ភៈ ឆ្នាំ២០១៨ នៅលើផ្លូវបេតុង ភូមិត្រពាំងរំចេក សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មានបានឲ្យដឹងថា រថយន្តទ្រុងដឹកទំនិញនោះម៉ាក CENTER ក្បាលពណ៌ក្រហមលាយទឹកប្រាក់ ទ្រុងពណ៌ខៀវ ពាក់ផ្លាកលេខ ភ្នំពេញ ៣A-៣១៤៧ ។ ចំណែករថយន្តដឹកស៊ីម៉ងត៍ម៉ាកហ៊ីយ៉ាន់ដាយ ពណ៌ស ពាក់ផ្លាកលេខ ភ្នំពេញ ៣D-០៩៦៤ ហើយអ្នកបើកបររថយន្តទាំង២គ្រឿងនេះ មិនត្រូវបានគេស្គាល់ឈ្មោះឡើយ ។
ប្រភពដដែលបានបន្តទៀតថា នៅមុនពេលកើតហេតុ រថយន្តទាំងពីរគ្រឿងបានបើកបរធ្វើដំណើរក្នុងទិសដៅពីជើងទៅត្បូងស្របទិសគ្នា ដោយរថយន្តទ្រុងបើកមុខ ចំណែករថយន្តដឹកស៊ីម៉ងត៍បើកតាមក្រោយ ។ លុះពេលទៅដល់ត្រង់ចំណុចកើតហេតុខាងលើ ស្រាប់តែរថយន្តទ្រុងបានបត់ឆ្វេងប្រុងឆ្លងផ្លូវដែលជាហេតុធ្វើឲ្យរថយន្តដឹកស៊ីម៉ងត៍វាក់គេចចេញមិនទាន់ ក៏បានជ្រុលទៅបុកពីក្រោយពេញទំហឹង បណ្ដាលឲ្យក្រពឹតខ្ទេចមុខយ៉ាងដំណំតែម្ដង ។
ប្រភពដដែលបានបន្តទៀតថា នៅក្នុងខណៈនោះ បណ្ដាលឲ្យអ្នកបើកបររថយន្តដឹកស៊ីម៉ងត៍កៀបជាប់ជើងរងរបួស ហើយត្រូវបាននគរបាល និងប្រជាពលរដ្ឋនាំគ្នាគាស់យកចេញបញ្ជូនទៅកាន់មន្ទីរពេទ្យភ្លាមៗផងដែរ ។ ក្រោយពេលកើតហេតុ នគរបាលបានឲ្យភាគីទាំងពីរធ្វើការសម្របសម្រួលគ្នាបញ្ចប់រឿងនៅនឹងកន្លែងនោះតែម្ដង ៕
ចែករំលែកព័តមាននេះ