រាជធានីភ្នំពេញ ៖ ដោយមិនខ្វល់រឿងមានតារាចម្រៀងល្បីច្រើននៅផលិតកម្មហង្សមាស ប្រភពគួរឱ្យជឿជាក់មួយឲ្យដឹងថាមាស សុខសោភា បានចូលផលិតកម្មនេះដែរ ។
កាលពីពេល ថ្មីៗកន្លងមកមានការឱ្យដឹងថា មាស សុខសោភា បានចប់កិច្ចសន្យានៅផលិតកម្មថោន កាលពីចុងឆ្នាំ២០១៧ តែដោយសារតែមានការយោគយល់ និងដោយសារតែនាងបានថតបទចម្រៀងចូលឆ្នាំ តាំងពីមុនចប់កិច្ចសន្យា ទើបនាងយល់ព្រមបន្តថតMV ឲ្យផលិតកម្មនេះសម្រាប់ឱកាសបុណ្យចូលឆ្នាំខ្មែររហូតទាល់តែចប់សព្វគ្រប់ ។ ការថតបទសម្រាប់បុណ្យចូលឆ្នាំរបស់មាស សុខសោភា ក្នុងអំឡុងខែកុម្ភៈ នេះ លុះចប់ទើបនាងចេញពីផលិតកម្មថោនទៅចូលផលិតកម្មហង្សមាស ។
ប្រភពលើកឡើងថា ចម្រៀងរាំវង់ រាំក្បាច់និងកន្ទ្រឹមមួយចំនួនត្រូវមាស សុខសោភា សម្រុកថតសំឡេងផង សម្តែងផង ជាកាដូចុងក្រោយសម្រាប់ផលិតកម្មថោន។ បណ្តាបទទាំងនោះរួមមាន«ឱ្យអត់ស្រឡះទៅ» ច្រៀងផ្តោះផ្តងជាមួយលោកខេម ។ បទ«អួតទាំងបងអួតទាំងប្អូន» ច្រៀងជាពួក រួមមានមាស សុខសោភា, ជេន សាយចៃ ,ឃុនឃុយ និងលោកខេម ។ បទចម្រៀងទាំងនោះត្រៀមចេញផ្សាយក្នុងអំឡុងពិធីបុណ្យចូលឆ្នាំខ្មែរ ។
ប្រភពសុំមិនបង្ហាញឈ្មោះលើកឡើងថា «មកពីមាស សុខសោភា ចប់កុងត្រា ហើយការចូលហង្សមាសគឺដើម្បីជាការជួយឱ្យមានឈ្មោះកាន់តែកាលីបខ្លាំងថែមទៀត ងាយស្រួលហក់ឡើងតម្លៃខ្លួនពេលចេញច្រៀងខាងក្រៅ ។ ណាមួយមិនខ្វល់ពីការប៉ែងជើងគ្នាព្រោះមានតារា ល្អៗនៅទីនោះឡើយ ។ ម្យ៉ាងទៀតនៅហង្សមាស មានទូរទស្សន៍ដូចគ្នាគឺងាយស្រួលចេញសម្តែងក្នុងស្ថានីយផង និងច្រៀងតាមខេត្តចុងសប្តាហ៍ដែលហង្សមាសសម្បូររៀងរាល់អាទិត្យសុទ្ធតែតារា ល្បីៗចេញវត្តមានសប្បាយទាញយកប្រជាប្រិយភាព» ។
ប្រភពពីផលិតកម្មថោន និងផលិតកម្មហង្សមាស ឱ្យដឹងថា អ្នកនាងមាស សុខសោភា បានចុះកិច្ចសន្យាធ្វើជាតារាចម្រៀងនៅផលិតហង្សមាសជាផ្លូវការរួចហើយ ដោយនាងនឹងចេញបទចម្រៀងក្រោយបុណ្យចូលឆ្នាំខ្មែរ ។ ផលិតកម្មហង្សមាសនឹងលើកនាងឲ្យដូចលោកខេមរៈ សិរីមន្ត ដែរ ដោយមានមុខទាំងថតស្ប៉ត និងទាំងក្នុងកម្មវិធីតន្ត្រី ធំៗ៕
ចែករំលែកព័តមាននេះ