រាជធានីភ្នំពេញ ៖ ជនសង្ស័យជាមុខសញ្ញាប្លន់ប្រដាប់អាវុធម្នាក់ត្រូវបានកម្លាំងសមត្ថកិច្ចនៃការិយាល័យព្រហ្មទណ្ឌកម្រិតស្រាល ក្រុងភ្នំពេញធ្វើការឃាត់ខ្លួនបាន នៅចំណុចផ្ទះសំណាក់មួយ ស្ថិតតាមបណ្តោយផ្លូវវែងស្រេង ភូមិដំណាក់ធំ២ សង្កាត់ស្ទឹងមានជយ័៣ ខណ្ឌមានជ័យ កាលពីវេលម៉ោង៩និង០០នាទីព្រឹកថ្ងៃទី២២ ខែកុម្ភៈ ឆ្នាំ២០១៨ ។
ជនសង្ស័យពុំត្រូវបានសមត្ថកិច្ចបញ្ចេញអត្តសញ្ញាណ ហើយគេក៏ពុំទាន់ដឹងថា ជនល្មើសរូបនេះពាក់ព័ន្ធការប្លន់អ្វីនោះទេ គ្រាន់តែកម្លាំងសមត្ថកិច្ចដែលកំពុងប្រតិបត្តិការនោះបញ្ជាក់យ៉ាងខ្លីថា បង្ក្រាបចោរប្លន់ប្រដាប់អាវុធ ។
ក្នុងការឃាត់ខ្លួនជនសង្ស័យខាងលើនេះ សមត្ថកិច្ចបានរកឃើញមានកាំភ្លើងខ្លីម៉ាកកា៥៤មួយដើម នៅក្នុងកាបូបស្ពាយរបស់ជនសង្ស័យ ។ ក្រោយការឃាត់ខ្លួន រូបគេត្រូវយកចូលក្នុងរថយន្ត ហើយនាំខ្លួនចេញពីកន្លែងកើតហេតុភ្លាមៗ បន្ទាប់មកទៅឆែកបន្ទប់ផ្ទះសំណាក់ដែលជនសង្ស័យសម្រាក រួចបញ្ចូនបន្តទៅកាន់ការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធី ។
សូមបញ្ជាក់ថា តាមប្រភពព័ត៌មាននៅកន្លែងកើតហេតុឲ្យឲ្យដឹងថា នៅវេលាខាងលើ កម្លាំងសមត្ថកិច្ចស្លៀកពាក់ឯកសណ្ឋានស៊ីវិលជាច្រើននាក់ បានសម្រុកចូលទៅផ្ទះសំណាក់ខាងលើ ដើម្បីចាប់ខ្លួនជនសង្ស័យពាក់ព័ន្ធអំពើប្លន់ ។ ស្របពេលជាមួយគ្នានោះ ជនសង្ស័យបានដើរចុះមកក្រោម ឃើញមានសមត្ថកិច្ចច្រើនក៏ ភ័យស្លន់ស្លោបានរត់យ៉ាងលឿនចេញពីផ្ទះសំណាក់ ហើយភ្លាមនោះ កម្លាំងនគរបាលក៏បានរត់ដេញតាមពីក្រោយ ដោយក្នុងដៃម្នាក់ៗ សុទ្ធតែមានកាំភ្លើងបញ្ចូលគ្រាប់រួចជាស្រេច ប្រសិនបើជនល្មើសហ៊ានដកកាំភ្លើងចេញពីកាបូបពួកគេនឹងបាញ់សម្លាប់ចោល ។
យ៉ាងណាមិញ ជនសង្ស័យរត់មិនបាន៥០០ម៉ែត្រ ក៏ត្រូវបានកម្លាំងនគរបាលប៉ុស្តិ៍ស្ទឹងមានជ័យទី៣ ចេញជួយអន្តរាគមន៍ជួយស្ទាក់ចាប់បានតែម្តងទៅ ៕
ចែករំលែកព័តមាននេះ