រាជធានីភ្នំពេញ ៖ ដើម្បីផលិតធនធានអត្តពលិកពិការកម្ពុជាឱ្យកាន់តែមានប្រសិទ្ធភាពខ្ពស់ដោយផ្ដោតទៅលើកម្រិតបច្ចេកទេសជាធំ ជាពិសេសស្វែងរកកីឡាករ-កីឡាការិនីដែលមានសមត្ថភាពគ្រប់គ្រាន់យកមកប្រមូលផ្ដុំហ្វឹកហាត់តាមផែនការរបស់ក្រសួងអប់រំយុវជន និងកីឡា នៅក្នុងឆ្នាំ២០១៨នេះ គណៈកម្មាធិការជាតិប៉ារ៉ាឡាំពិកកម្ពុជាបានរៀបចំការប្រកួតធ្វើតេស្តសាកល្បងសមត្ថភាពលើប្រភេទកីឡាអត្តពលកម្មរយៈពេលពេញមួយព្រឹកថ្ងៃទី២១ កុម្ភៈ នៅទីលានពហុកីឡដ្ឋានជាតិក្រោមការឃ្លាំមើលយ៉ាងយកចិត្តទុកដាក់ពីសំណាក់លោក យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា និងមន្ត្រីពាក់ព័ន្ធមួយចំនួនទៀត។
កញ្ញា សុង សុខលាភ មន្ត្រីផ្នែកសម្របសម្រួលលើប្រភេទកីឡាអត្តពលកម្ម បានឱ្យដឹងថា ការប្រកួតធ្វើតេស្តសមត្ថភាពនេះ គណៈកម្មការរៀបចំការប្រកួតបានផ្ដោតទៅលើវិញ្ញាសាសំខាន់ចំនួន៤គឺ ១-ការរត់ល្បឿនលើវិញ្ញាសាចម្ងាយ១០០ម៉ែត្រ ២០០ម៉ែត្រ ៤០០ម៉ែត្រ និង៨០០ម៉ែត្រ ។ វិញ្ញាសានីមួយៗបានបែងចែកទៅតាមប្រភេទពិការផ្សេងៗគ្នាដូចជាT11 និងT12ជាប្រភេទពិការភ្នែក, T20ប្រភេទពិការខ្សោយបញ្ញា, T44ពិការជើងត្រឹមក្រោមជង្គង់, T46ពិការលើកែងដៃនិងT47ជាប្រភេទពិការក្រោមកែងដៃ ។ ចំណែកT53និងT54ជាប្រភេទពិការត្រឹមក្រោមចង្កេះតម្រូវឱ្យប្រកួតកីឡាប្រណាំងរទេះ។
កញ្ញាបានឱ្យដឹងទៀតថា មុននឹងឈានដល់ការប្រកួតធ្វើតេស្តសមត្ថភាពអត្តពលិកក្នុងក្រុមជម្រើសជាតិ គណៈកម្មាធិការជាតិប៉ារ៉ាឡាំពិកកម្ពុជា បានផ្សព្វផ្សាយជាសាធារណៈអស់រយៈពេលជាង៥ខែរួចមកហើយ ដើម្បីជូនដំណឹងដល់បងប្អូនជនពិការមកចុះឈ្មោះចូលរួមប្រកួតដោយមានការបើកទូលាយ និងទើបតែបានបិទបញ្ជីកាលពីថ្ងៃទី១៥ មករា ឆ្នាំ២០១៨ កន្លងទៅនេះប៉ុណ្ណោះ។ មកដល់ថ្ងៃប្រកួតធ្វើតេស្តនេះទៀត មានអត្តពលិកទាំង២ភេទបានមកចុះឈ្មោះចូលរួមប្រកួតចំនួន៣៦នាក់ ។ ចំណែកការធ្វើតេស្តក្នុងថ្ងៃនេះទៀត បើតាមការឱ្យដឹង គឺធ្វើឡើងលើវិញ្ញាសារត់ល្បឿនចម្ងាយ១០០ម៉ែត្រ ២០០ម៉ែត្រ ៤០០ម៉ែត្រ ៨០០ម៉ែត្រ និងប្រណាំងរទេះ ប៉ុណ្ណោះ ។ ដោយឡែកនៅសល់វិញ្ញាសាចំនួន៣ទៀត គឺចោលដុំដែក ចោលថាស និងចោលស្ន គណៈកម្មការរៀបចំការប្រកួតនៅពុំទាន់បានកំណត់ពេលវេលាច្បាស់លាស់នៅឡើយទេ។
លោក យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា បានមានប្រសាសន៍ថា កាលពីឆ្នាំ២០១៧កន្លងមក រាល់ការចេញទៅប្រកួតនៅក្រៅប្រទេស អត្តពលិកជនពិការកម្ពុជាតែងតែទទួលបានការកោតសរសើរនិងមានការយកចិត្តទុកដាក់យ៉ាងខ្លាំងពីសំណាក់សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានគណៈកម្មាធិការជាតិប៉ារ៉ាឡាំពិកកម្ពុជា ។
មិនតែប៉ុណ្ណោះ ចំពោះប្រាក់រង្វាន់ដែលបងប្អូនអត្តពលិកជនពិការទទួលបានពីការប្រកួតនៅលើឆាកអន្តរជាតិ សម្ដេចតែងតែផ្ដល់សិទិ្ធស្មើមុខស្មើមាត់់ដូចបងប្អូនអត្តពលិកអូឡាំពិកដែរ ។ លោក យី វាសនា បន្តថា ការប្រកួតជ្រើសរើសកីឡាករ-កីឡាការិនីជម្រើសជាតិនេះធ្វើឡើងរយៈពេល១ឆ្នាំម្ដង ។សព្វថ្ងៃនេះគណៈកម្មាធិការជាតិប៉ារ៉ាឡាំពិកកម្ពុជា មាន១៧សហព័ន្ធស្ថិតក្រោមចំណុះក្នុងនោះមានតែ១៣-១៤សហព័ន្ធប៉ុណ្ណោះដែលកំពុងតែមានសកម្មភាពយ៉ាងសកម្ម ។ ដូច្នេះការប្រកួតជ្រើសរើសក្រុមជម្រើសជាតិនាពេលនេះគឺដើម្បីប្រមូលផ្ដុំហ្វឹកហាត់ឱ្យកាន់តែល្អប្រសើរជាងឆ្នាំមុន ។ ជាពិសេស ក៏ដើម្បីចូលរួមប្រកួតអាស៊ានប៉ារ៉ាហ្គេមលើកទី១០នៅប្រទេសហ្វីលីពីនផងដែរ ។
លោក យី វាសនា បានលើកឡើងទៀតថា សម្រាប់ការប្រកួតសាកល្បងសមត្ថភាពថ្ងៃនេះ គឺជាការចម្រាញ់លើកចុងក្រោយហើយ ដែលក្នុងចំណោមអត្តពលិកទាំង៣៦រូបនេះមានស្ត្រីចំនួន១២រូប ។
លោកថា សម្ដេចអគ្គមហាសេនាបតីតេជោហ៊ុន សែន បានកំណត់ឱ្យមានស្ត្រីវ័យក្មេងចូលរួមច្រើន ។ ជាមួយគ្នានេះ លោកយី វាសនា បានប្តេជ្ញាថា លោកនឹងខិតខំជំរុញដល់អត្តពលិកស្ត្រីទាំងនេះឱ្យចេះទាំងធ្វើជាអាជ្ញាកណ្ដាល និងគ្រូបង្វឹកទៀតផង ។នៅក្នុងឆ្នាំ២០១៧កន្លងមក លោកបានបញ្ជូនទៅក្រៅប្រទេសប្រកួតដកស្រង់បទពិសោធន៍ព្រមទាំងចូលរួមវគ្គបណ្ដុះបណ្ដាលពីគេឱ្យកាន់តែមានការយល់ដឹងពីរបៀបធ្វើជាចៅក្រម និងអាជ្ញាកណ្ដាល ។ លោកសង្ឃឹមថា គណៈកម្មាធិការជាតិប៉ារ៉ាឡាំពិកកម្ពុជា នឹងមានឱកាសសហការជាមួយគណៈកម្មាធិការជាតិអូឡាំពិកកម្ពុជាធ្វើជាម្ចាស់ផ្ទះប្រកួតកីឡាស៊ីហ្គេមឆ្នាំ២០២៣ដែលកម្ពុជាទទួលធ្វើជាម្ចាស់ផ្ទះ ។ យើងក៏មានមន្ត្រីវ័យក្មេង មន្ត្រីបច្ចេកទេសបម្រើការជូនដល់ការប្រកួតអាស៊ានប៉ារ៉ាហ្គេមលើកទី១២ផងដែរ៕
ចែករំលែកព័តមាននេះ