តារាចម្រៀង ប៊ុត សីហា បានលែងវិញហើយ
- ភ្នំពេញ
រាជធានីភ្នំពេញ ៖ យោងប្រភពពីលោកឧត្តមសេនីយ៍ទោ ឡឹក វណ្ណៈ នាយកមន្ទីរប្រឆាំងគ្រឿងញៀន បានឱ្យកោះសន្តិភាពដឹងនាព្រឹកថ្ងៃទី២២ កុម្ភៈ នេះថា លោក…
រាជធានីភ្នំពេញ ៖ យោងប្រភពពីលោកឧត្តមសេនីយ៍ទោ ឡឹក វណ្ណៈ នាយកមន្ទីរប្រឆាំងគ្រឿងញៀន បានឱ្យកោះសន្តិភាពដឹងនាព្រឹកថ្ងៃទី២២ កុម្ភៈ នេះថា លោក ប៊ុត សីហា ដែលជាម្ចាស់ជ័យលាភី The Voice Cambodia រដូវកាលទី១ បានជាប់ចោទករណីគ្រឿងញៀន ត្រូវបានដោះលែងវិញ ។
ប្រភពបន្តថា ការដោះលែងលោកប៊ុត សីហា នេះ គឺមានការឯកភាពពីលោកឧត្តមសេនីយ៍ឯក ម៉ក ជីតូ អគ្គស្នងការរងនគរបាលជាតិ បន្ទាប់ពីកម្លាំងត្រួតពិនិត្យនិងឆែកឆេរជាក់ស្តែង គឺមិនមានឃើញវត្ថុតាងអ្វីជាប់ខ្លួននោះទេ ទើបសម្រេចដោះលែងវិញក្នុងយប់ថ្ងៃដដែលនោះតែម្តង ។
ប្រភពបន្តទៀតថា ក្រោយពីសាកសួររួចមក ដោយសាេតែរកឃើញថា តារាចម្រៀងរូបនោះគ្រាន់តែជាអ្នកប្រើប្រាស់គ្រឿងញៀន មិនមែនជួញដូរនោះឡើយ ទើបខាងនគរបាលមន្ទីប្រឆាំងគ្រឿងញៀន ក្រសួងមហាផ្ទៃ បានហៅក្រុមគ្រួសារទៅធានាយកត្រឡប់ទៅវិញដើម្បីដាក់នៅមណ្ឌលបន្សាបគ្រឿងញៀន ។
គួររំលឹកថា កម្លាំងនគរបាលនៃមន្ទីរប្រឆាំងគ្រឿងញៀន បានធ្វើការចាប់ខ្លួនម្ចាស់ជ័យលាភី The Voice Cambodia រដូវកាលទី១ ប៊ុត សីហា នៅវេលាម៉ោងប្រមាណ០៥ និង៤០នាទីល្ងាចថ្ងៃទី២១កុម្ភៈ ឆ្នាំ២០១៨នេះ ស្ថិតនៅតាមផ្លូវជាតិលេខ៣ ត្រង់ចំណុចមុខវិទ្យាល័យពងទឹក ស្ថិតនៅក្នុងភូមិវត្តស្លែង សង្កាត់ពងទឹក ខណ្ឌដង្កោ រាជធានីភ្នំពេញ ដោយជាប់សង្ស័យករណីជួញដូរគ្រឿងញៀន ។ ការចាប់ខ្លួននោះ បានធ្វើឡើងនៅក្នុងខណៈដែលតារាចម្រៀងល្បីមួយរូបនេះកំពុងធ្វើដំណើរតាមរថយន្ត១គ្រឿង ។
ចែករំលែកព័តមាននេះ