រាជធានីភ្នំពេញ ៖ បុរសជនជាតិបារាំងវ័យ២៥ឆ្នាំម្នាក់ ត្រូវបានកម្លាំងបានសម្ថកិច្ចខណ្ឌដូនពេញ ចាប់ឃាត់ខ្លួន ខណៈពេលដែលរូបគេកំពុងតែធ្វើសកម្មភាពបង្ហោះ DRONE ថតយករូបភាពនៅលើសួនច្បារវិមានឯករាជ្យខាងមុខភូមិគ្រឹះរបស់នាយករដ្ឋមន្ត្រីនៃព្រះ រាជាណាចក្រកម្ពុជា និង ដែលជាតំបន់ហាមឃាត់នោះ។ ការចាប់ឃាត់ខ្លួននេះដែរបានធ្វើឡើង កាលពីវេលាម៉ោង៦ល្ងាច ថ្ងៃទី២១ ខែកុម្ភៈ ឆ្នាំ២០១៨នេះ នៅចំណុចគល់ស្ពាននាគភ្លោះកោះពជ្រ ក្នុងសង្កាត់ទន្លេបាសាក់ ខណ្ឌចម្ការមន។ តាមប្រភពព័ត៌មានពីនគរបាលបានប្រាប់ឱ្យដឹងថា បុរសម្នាក់ដែលបានចាប់ឃាត់ខ្លួនមានឈ្មោះ BRECKLER PIERRE MICHEL ជនជាតិបារាំង អាយុ ២៥ឆ្នាំ មុខរបរជាភ្ញៀវទេសចរណ៍ ស្នាក់នៅសណ្ឋាគារ BILLABONG បន្ទប់លេខ៣១២ ក្នុងសង្កាត់បឹងរាំង ខណ្ឌដូនពេញ។ មុនពេលឈានទៅដល់ការចាប់ឃាត់ខ្លួនរូបគេនេះ គេបានឃើញម៉ាស៊ីន DRONE ពណ៌ខ្មៅ មួយគ្រឿង ដោយមិនបានដឹងថា ត្រូវបានគេបញ្ជាមកពីទីណាឡើយ?
និងកំពុងតែបានហោះថតរូបភាពពី លើអាកាស បរិវេណជុំវិញលើវិមានឯករាជ្យ និងសួនច្បារវិមានឯករាជ្យជាពិសេសនៅខាងមុខ ភូមិគ្រឹះរបស់សម្តេច អគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលជាតំបន់ហាមឃាត់ផងដែរ។ តាមប្រភពដដែលបានប្រាប់បន្តទៀតថា ក្រោយពីមានការភ្ញាក់ផ្អើលពីការបង្ហោះ DRONE កំពុងតែហោះថតយករូបភាពពីលើអាកាស នៅក្នុងតំបន់ហាមឃាត់នោះ កម្លាំងនគរបាលខណ្ឌដូនពេញក៏បាននាំគ្នាធ្វើការស្វះស្វែងស្រាវជ្រាវ រកប្រភពភ្លាមៗក៏ស្រាប់តែបានប្រទះឃើញបុរសជាជនជាតិបារាំងម្នាក់ខាងលើនោះកំពុងតែឈរបញ្ជាម៉ាស៊ីននោះនៅចំណុចគល់ស្ពាននាគភ្លោះកោះពេជ្រ និង ចាប់ឃាត់ខ្លួនភ្លាមៗតែម្តង។
ពាក់ព័ន្ធទៅនឹងការបង្ហោះម៉ាស៊ីន DRONE ដើម្បីផ្តិតយករូបភាពពីលើអាកាសនេះដែរ នៅក្នុងរាជធានីភ្នំពេញរបស់យើង គឺមានតំបន់មួយចំនួនដែលត្រូវហាមឃាត់ ដោយមានដូចជា បរិវេណជុំវិញ សួនច្បារវិមានឯករាជ្យ និងតំបន់ជុំវិញព្រះបរមរាជវាំងជាដើម។ ក្រោយពេលកើតហេតុ កម្លាំងមានសម្ថកិច្ចក៏បាននាំខ្លួនបុរសជាជនជាតិបារាំងម្នាក់ខាងលើ រួមទាំងម៉ាស៊ីន DRONE ដែលមានបំពាក់កាមេរ៉ា មួយគ្រឿងជាវត្ថុតាង ក៏បាននាំមកកាន់នគរបាលប៉ុស្តិ៍ចតុមុខ ធ្វើការសាកសួរ និងធ្វើកំណត់ហេតុជាជំហានដំបូង និងបញ្ជូនទៅកាន់នាយកដ្ឋានប្រឆាំងបទល្មើសបច្ចេកវិទ្យា នៃក្រសួងមហាផ្ទៃ ដើម្បីធ្វើការស្រាវជ្រាវជាបន្តទៀត៕
https://youtu.be/5OEIpWkG_zo
ចែករំលែកព័តមាននេះ