រាជធានីភ្នំពេញ ៖ សេចក្តីរាយការណ៍បឋម កាលពីរសៀលថ្ងៃទី២១ កុម្ភៈ ២០១៨នេះ សមត្ថកិច្ចនគរបាលព្រហ្មទណ្ឌកម្រិតធ្ងន់ក្រសួងមហាផ្ទៃ បានចាត់បញ្ជូនបុរសម្នាក់ ទៅកាន់សាលាដំបូងរាជធានីភ្នំពេញ ពាក់ពន្ធរឿងលួចលក់ដីព្រះរាជអាជ្ញារងម្នាក់ ដែលម្ចាស់មិនបានដឹង ។ ជនសង្ស័យមានឈ្មោះ ហួត ម៉ាយ៉ែន ភេទប្រុស អាយុ៣៨ឆ្នាំ មានអាសយដ្ឋាននៅភូមិគោឃ្លៀង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ ដើមចមបណ្តាលឲ្យសមត្ថកិច្ចចាប់ខ្លួន បុរសថ្លើមពាសមេឃនេះ ត្រូវបានសមត្ថកិច្ចឲ្យដឹងថា ប៉ុន្មានថ្ងៃមុននេះជនសង្ស័យ បានយកថ្នាំក្រហមទៅបាញ់លេខទូរស័ព្ទ២ទៅ៣លេខ ជាប់ជញ្ជាំងដីឡូត៍ដ៏ស្កឹមស្កៃ របស់លោកស្រី ព្រះរាជអាជ្ញារងរាជធានីភ្នំពេញម្នាក់ ដែលមានទីតាំស្ថិតនៅផ្លូវ ជា សុផារ៉ា ដោយប្រកាសលក់ដី នោះជាបន្ទាន់។
ឃើញដូច្នោះលោកស្រីព្រះរាជអាជ្ញារង និងស្វាមី បានកើតជាចម្ងល់ ថាអ្នកណាថ្លើមធំម៉េសហ៊ានមកសរសេរលេខទូរស័ព្ទដាក់លក់ដីដែលម្ចាស់អត់បានដឹង។ ពេលនោះលោកស្រីព្រះរាជអាជ្ញារង បានប្រើមនុស្សជំនិតម្នាក់ ឲ្យទាក់ទងទៅលេខទូរស័ព្ទ ដែលជនអណាមិកបានសរសេរនៅលើជញ្ជាំរបងនោះ ធ្វើជាសួរទិញដីនោះដើម្បីចង់ដឹង ថាតើគេសរសេរលេង ឬក៏មានចេតនាលក់ដីរបស់លោកស្រីមែន។ រសៀលថ្ងៃទី២០ កុម្ភៈ ភាគីម្ចាស់ដីពិតប្រាកដ ក៏បានទូរស័ព្ទជួបអ្នកសរសេរលេខនៅជញ្ជាំងរបងនោះ ហើយបានធ្វើជាសួរទិញ និងចង់ដឹងតម្លៃប៉ុន្មាន។ បុរសឈ្មោះ ហួត ម៉ាយ៉ែន បានឆ្លើយតបថា ដីនេះត្រូវការលក់បន្ទាន់ព្រោះ ម្ចាស់ដីជាអនិកជន ហើយគេប្រញាប់វិលទៅក្រៅប្រទេសវិញ ក្នុងតម្លៃ២៧ម៉ឺនដុល្លារអាមេរិក។
មន្ត្រីនគរបាលបន្តថា ក្រោយពេលម្ចាស់បានទាក់ទងសួរនាំដឹងរឿងរ៉ាវអស់ហើយ ក៏បានឲ្យមនុស្សជំនិតនោះ ណាត់បុរសជាអ្នកលក់ដីនោះជួបនិយាយថ្លៃគ្នាច្បាស់លាស់ដើម្បីទិញដី (តែនេះគាន់ជាល្បិចម្ចាស់ដីចង់ចាប់ជននោះទេ)។ ពេលនោះមនុស្សរបស់លោកស្រីព្រះរាជអាជ្ញារង បានណាត់ជនកំហូចជួបនៅភោជនីដ្ឋានមួយ ហើយបាននិយាយរឿងទិញលក់ដីដូចមែនទែនអីចឹង ខណៈនោះក៏ត្រូវបានសមត្ថកិច្ចចាប់ឃាត់ខ្លួនឈ្មោះ ហួត ម៉ាយ៉ែន នាំទៅកាន់ការិយាល័យនគរបាល ព្រហ្មទណ្ឌកម្រិតធ្ងន់ក្រសួងមហាផ្ទៃ និងបានកសាងសំណុំរឿងបញ្ជូនទៅកាន់សាលាដំបូង រាជធានីភ្នំពេញ តាមនីតិវិធី។ នៅរសៀលថ្ងៃទី២១ កុម្ភៈ នេះតំណាងអយ្យការអមសាលាដំបូងរាជធានី ភ្នំពេញ កំពុងធ្វើការសាកសួរនៅឡើយទេ ហើយបើតាមអង្គហេតុដូចបានរៀបរាប់ខាងលើ អំណាងអយ្យការអាចចោទប្រកាន់ពីបទ លួចលក់អចលនវត្ថុអ្នកដទៃ ឬចោទប្រកាន់ពីបទឆកបោក៕
ចែករំលែកព័តមាននេះ