រាជធានីភ្នំពេញ ៖ លោកគិត សុផា អភិបាលខណ្ឌដង្កោ បានព្រមានខ្លាំងៗដល់លោកមេភូមិ និងអាជ្ញាធរសង្កាត់មួយដែលតែងតែយកលុយពីរថយន្តដឹកដីដោយគ្រាន់តែដឹក៤ទៅ៥ឡានសំរាប់ពូនផ្នូរប៉ុណ្ណោះ។ ជាពិសេសជាងនេះទៅទៀតអ្នកដែលយកលុយពីប្រជាពលរដ្ឋក្រីក្រដែលមានលុយបន្តិចបន្តួចសាងសង់របងផ្ទះ ឬសំណង់តូចតាចនោះត្រូវបញ្ឈប់ជាបន្ទាន់ ព្រោះធ្វើឱ្យប្រជាពលរដ្ឋមានការយល់ច្រឡំដល់គណៈអភិបាលខណ្ឌថា ជាអ្នកប្រើឱ្យទៅយក តែកន្លងមកគណៈអភិបាលខណ្ឌមិនដែលបានប្រើឱ្យធ្វើបែបនេះឡើយ។
លោកបន្តថា លោកមេភូមិ លោកចៅសង្កាត់គ្រប់រូបត្រូវពិនិត្យមើលឱ្យបានច្បាស់ទៅលើប្រជាពលរដ្ឋក្រីក្រពិតប្រាកដពេលពួកគាត់សាងសង់របងផ្ទះ ឬសំណង់តូចតាចគួរសំរួលឱ្យពួកគាត់ធ្វើទៅ ឱ្យតែពួកគាត់ធ្វើត្រឹមត្រូវតាមច្បាប់កំណត់ដូចជាការទុកគំលាត ឬចំណីផ្លូវតាមច្បាប់កំណត់របស់ភូមិបានហើយ។ ជាងនេះទៅទៀតចំពោះច្បាប់សាងសង់លោកមេភូមិត្រូវកាន់ទៅជួបលោកឱ្យតែអ្នកក្រីក្រពិតប្រាកដលោកនឹងចុះហត្ថលេខា ដោយមិនឱ្យបង់ប្រាក់ឡើយ។ ដោយឡែកការផ្ទេរសិទ្ធិដីធ្លីវិញក៏ត្រូវតែជួយសំរួលដល់ប្រជាពលរដ្ឋក្រី ក្រដែរ។ លោកមេភូមិ ឬចៅសង្កាត់ត្រូវជួយពន្យល់ណែនាំដល់ប្រជាពលរដ្ឋកុំឱ្យពួកគាត់ប្រគល់ឯកសារដល់អ្នកផ្សេងរត់ការដែលនាំឱ្យគេទារថ្លៃរត់ការខ្ពស់ធ្វើឱ្យពួកគាត់ខាតបង់ថវិកាច្រើន ហើយលោកមេភូមិឬលោកចៅសង្កាត់គួរតែជួយកាន់ឯកសារទៅសាលាខណ្ឌជូនពួកគាត់។
លោកអភិបាលខណ្ឌដង្កោថ្លែងបែបនេះនៅក្នុងពេលលោកសំណេះសំណាលជាមួយសមាជិក សមាជិកាគណបក្សប្រជាជនកម្ពុជា សង្កាត់ កន្ទោក និងសង្កាត់បឹងធំដែលសង្កាត់ទាំងពីរនេះទើបចាត់បញ្ចូលមកក្រោមការគ្រប់គ្រងរបស់ខណ្ឌដង្កោ កាលពីពេលថ្មីៗកន្លងមក។ ពិធីសំណេះសំណាលនោះបានប្រព្រឹត្តទៅកាលពីវេលារសៀលថ្ងៃទី១១ ខែមីនា ឆ្នាំ២០១១ នៅក្នុងវត្តស្ងួនពេជ្រ ភូមិស្ងួនពេជ្រ សង្កាត់កន្ទោក ខណ្ឌដង្កោ រាជធានីភ្នំពេញ។
អញ្ជើញចូលរួមនៅក្នុងពិធី នោះមានលោកហែម ដារិទ្ធិ លោកសេង គន្ធ អភិបាលរងខណ្ឌ សមាជិក សមាជិកាគណបក្សខណ្ឌ និងសមាជិក សមាជិកាគណបក្សសង្កាត់បឹងធំ និងសង្កាត់កន្ទោកជាង២០០នាក់។
លោកគិត សុផា បានផ្តាំផ្ញើឱ្យសមាជិក សមាជិកាទាំងអស់នោះសាមគ្គីភាពគ្នា ត្រូវមើលសមាជិកដែលបាត់បង់សមត្ថភាពកុំបោះបង់ចោលពួកគេ និងមិនត្រូវរើសអើងជាមួយពួកគេទេ។ ជាងនេះទៅទៀតត្រូវចេះអូសទាញសមាជិកពីខាងក្រៅ និងចេះផ្សព្វផ្សាយពីគោលនយោបាយរបស់គណបក្ស ជាពិសេសផ្សព្វផ្សាយពីលទ្ធផលការងារ ការកសាងហេដ្ឋារចនាសម្ព័ន្ធ និងផ្សព្វផ្សាយពីនយោបាយភូមិ-ឃុំមានសុវត្ថិភាព។ លោកបានស្នើសុំឱ្យសមាជិកទាំងអស់ត្រូវតែស្មោះត្រង់នឹងគណបក្ស និងត្រូវតែរាយការណ៍ជាបន្ទាន់ បើដឹងថា កន្លែងណាមានការលេងល្បែងស៊ីសង ឬសេពគ្រឿងញៀន។ សមាជិក សមាជិកាទាំងអស់ប្តេជ្ញាចិត្តបោះឆ្នោតជូនគណបក្សប្រជាជនកម្ពុជា និងគាំទ្រសម្តេចអគ្គ មហាសេនាបតីតេជោហ៊ុន សែន ជាបេក្ខភាពនាយករដ្ឋមន្ត្រីជារៀងរហូត។ ក្នុងពិធីនោះក៏បានផ្តល់ឱ្យសមាជិក សមាជិកាដែលចូលរួមក្នុងម្នាក់សារុង១ និងប្រគល់ថវិកាដល់គណបក្សសង្កាត់នីមួយៗ២០ម៉ឺនរៀល ដែលអំណោយនេះឧបត្ថម្ភដោយលោកកែប ជុតិមា៕
ចែករំលែកព័តមាននេះ