យោងតាមសេចក្តីរាយការណ៍របស់សារព័ត៌មាន The Telegraph និង Daily Mail ឲ្យដឹងថា ក្មេងដែលលេងវីដេអូហ្គេមរហូតដល់១ម៉ោងក្នុងមួយថ្ងៃ គឺងាយនឹងចូលចុះក្នុងសង្គមរស់នៅសប្បាយចិត្ត និងមិនសូវរពឹសច្រើនឡើយ ។
ការសិក្សានេះមានការចូលរួមដោយមនុស្សវ័យក្មេងអាយុពី១០ទៅ១៥ឆ្នាំប្រហែល៥០០០នាក់ ដែលតម្រូវឲ្យប្រាប់អំពីការប្រើប្រាស់ហ្គេមកុំព្យូទ័ររបស់ពួកគេ ព្រមទាំងត្រូវបំពេញនូវតារាងកម្រងសំណួរលើការវាយតម្លៃការរស់នៅក្នុងសង្គមជីវិតដែលរីករាយ និងបញ្ហាអារម្មណ៍ និងអាកប្បកិរិយា ។
អ្នកចូលរួមប្រភេទ៧៥ភាគរយបានប្រាប់ថា ពួកគេលេងហ្គេមកុំព្យូទ័រជារៀងរាល់ថ្ងៃ ។ នៅពេលប្រៀបធៀបជាមួយមនុស្សវ័យជំទង់ដែលមិនបានលេងហ្គេមនេះ អ្នកដែលលេងតិចជាងមួយម៉ោងក្នុងមួយថ្ងៃបានប្រាប់ថា ពួកគេមានកម្រិតនៃអាកាប្បកិរិយាក្នុងសង្គមខ្ពស់ជាង និងរីករាយក្នុងជីវិត ព្រមទាំងមិនសូវមានបញ្ហាផ្លូវចិត្តច្រើនឡើយ ។ វាមិនមានអ្វីខុសគ្នារវាងអ្នកមិនលេង និងអ្នកដែលលេងពីមួយម៉ោងទៅបីម៉ោងក្នុងមួយថ្ងៃឡើយ ។
ស្របពេលជាមួយគ្នានេះ មនុស្សវ័យជំទង់ដែលលេងហ្គេមច្រើនជាងបីម៉ោងក្នុងមួយថ្ងៃ ត្រូវបានគេរកឃើញថា មិនសូវជាមានការចូលរួមក្នុងសង្គម មិនសូវសប្បាយចិត្ត និងមានបញ្ហាផ្លូវចិត្តច្រើនជាងអ្នកដែលមិនលេង ។ ប៉ុន្តែដោយសារតែការសិក្សានេះមានដែនកំណត់ច្រើន ដូច្នេះការនាំឲ្យមានការលេងហ្គេមក្នុងការពន្យល់ទៅលើភាពខុសគ្នាលើអកប្បកិរិយារវាងអ្នកមិនលេង និងអ្នកលេងតិចតួច ឬច្រើននោះ នៅតែមានកត្តាជាច្រើនទៀតចូលរួមដែរដូចជាតំណពូជ បរិដ្ឋានជុំវិញ និងកត្តារបៀបរស់នៅ ព្រោះវាអាចជះឥទ្ធិពលទៅលើលទ្ធផលនៃការសិក្សានេះ ។
ជាមួយគ្នានេះដែរ ដោយសារតែការសិក្សាបានពិនិត្យទាំងកម្រិតនៃការលេងហ្គេម និងអាកប្បកិរិយាក្នុងពេលតែមួយ ដូច្នេះទោះបីជាវាមានការទាក់ទងគ្នាក៏ដោយ ក៏វាមិនអាចប្រាប់យើងអំពីគោលដៅនៃការទាក់ទងនេះដែលថា លេងហ្គេមតិចជាងមួយម៉ោងក្នុងមួយថ្ងៃធ្វើឲ្យមនុស្សវ័យជំទង់សប្បាយចិត្ត និងចូលរួមក្នុងសង្គមស្រួល ឬសប្បាយចិត្តជាងអ្នកដែលអត់លេងឡើយ ៕
ចែករំលែកព័តមាននេះ