ប្រទេសអ៊ីរ៉ង់ ៖ ពួកអ្នកជួយសង្គ្រោះនាថ្ងៃទី២០ កុម្ភៈ ចាប់ផ្តើមចូលទៅដល់កន្លែងយន្តហោះដឹកអ្នកដំណើរមួយគ្រឿងធ្លាក់កាលពីថ្ងៃទី១៨ កុម្ភៈ ជាមួយមនុស្សជិះក្នុងនោះ៦៦នាក់ហើយ ។ កន្លែងយន្តហោះនេះធ្លាក់ គឺនៅតំបន់ភ្នំខ្ពស់មួយពិបាកឡើងទៅដូច្នោះការប្រមូលសាកសពមនុស្សយកចេញពិតជាមានការលំបាក ។
យន្តហោះធុន ATR របស់ក្រុមហ៊ុនអាកាសចរណ៍អ៊ីរ៉ង់ ASEMAN AIRLINES ដែលហោះហើររវាងក្រុងតេហេរ៉ង់ និងក្រុង YASOUJ ភាគនិរតីប្រទេសបានធ្លាក់នាថ្ងៃទី១៨ កុម្ភៈ ក្នុងតំបន់ជួរភ្នំ ZAGROS ពេលមានព្យុះព្រិលមួយ ។ ក្រោយរយៈពេល២ថ្ងៃនៃការតាមរុករកយ៉ាងលំបាកមកពីព្រិល និងអ័ព្ទក្រាស់ឧទ្ធម្ភាគចក្រយោធាមួយ ទីបំផុតប្រទះឃើញនាព្រឹកថ្ងៃទី២០ កុម្ភៈ នូវបំណែកយន្តហោះធំមួយ ដែលមានរូប LOGO របស់ក្រុមហ៊ុនអាកាសចរណ៍ ក៏ប៉ុន្តែការចូលទៅកាន់ទីនោះលំបាកខ្លាំង ។ មានជ្រោះជ្រៅៗ ហើយគ្រោះថ្នាក់ពុំអាចឱ្យឧទ្ធម្ភាគចក្រចុះបាន ។ បណ្តាសាកសពជនរងគ្រោះត្រូវលី ឬអូសចុះពីភ្នំដែលនឹងនាំឱ្យមានការចំណាយពេលច្រើន ។
យោងតាមទូរទស្សន៍រដ្ឋ IRIB ថា អ្នកបើកឧទ្ធម្ភាគចក្រម្នាក់នៃក្រុមជួយសង្គ្រោះនិយាយថា បានឃើញសាកសពមនុស្សនៅរាយប៉ាយជុំវិញបំណែកយន្តហោះដែលស្ថិតនៅកម្ពស់ប្រមាណជា៤.០០០ម៉ែត្រលើភ្នំ DENA ។
អ្នកឡើងភ្នំប្រមាណជា១០០នាក់បាននាំគ្នាឡើងលើភ្នំនេះចាប់តាំងពីថ្ងៃទី១៩ កុម្ភៈ មក។ ពួកគេចាប់ផ្តើមឡើងទៅដល់កន្លែងយន្តហោះធ្លាក់ និងប្រមូលសាកសពមនុស្សហើយ ៕
ចែករំលែកព័តមាននេះ