ខេត្តបន្ទាយមានជ័យ ៖ ក្រុមអ្នកប្រើប្រាស់គ្រឿងញៀនប្រុសស្រីមួយសម្បុកធំមានគ្នាជាង១០នាក់ដែលប្រមូលផ្តុំគ្នាប្រើប្រាស់ថ្នាំញៀនដោយខុសច្បាប់នៅវេលាម៉ោង២និង៣០នាទី ថ្ងៃទី២០ ខែកុម្ភៈ ឆ្នាំ២០១៨ ត្រូវបានកម្លាំងជំនាញប្រឆាំងបទល្មើសគ្រឿងញៀននៃអធិការក្រុងប៉ោយប៉ែតសហការណ៍ជាមួយកម្លាំងប៉ុស្តិ៍រដ្ឋបាលសង្កាត់ប៉ោយប៉ែតបានចុះបង្ក្រាបនៅចំណុចខាងក្រោយកាស៊ីណូឡាក់គី ស្ថិតក្នុងភូមិប៉ោយប៉ែត សង្កាត់ប៉ោយប៉ែត ខេត្តបន្ទាយមានជ័យ ។
លោកវរសេនីយ៍ឯក ស៊ិន ធិនដេត អធិការនគរបាលក្រុងសិរីសោភ័ណបានឲ្យដឹងថា ដោយអនុវត្តតាមបទបញ្ជារបស់លោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យដែលជានិច្ចកាលឲ្យកម្លាំងជំនាញក៏ដូចជាគ្រប់អធិការដ្ឋាននគរបាលស្រុក ក្រុង ចុះប្រតិបត្តិការស៊ើបអង្កេតស្រាវមុខសញ្ញាជួញដូរ និងប្រើប្រាស់នូវសារធាតុញៀនខុសច្បាប់ និងការប្រជុំណែនាំដោយផ្ទាល់ពីលោកឧត្តមសេនីយ៍ត្រី ចាប សុផាប្ញទ្ធិ ស្នងការរងទទួលផែនប្រឆាំងបទល្មើសដើម្បីឲ្យភូមិ-ឃុំ មានសុវត្ថិភាព ជាលទ្ធផលកម្លាំងនគរបាលក្រុងប៉ោយប៉ែតបានចុះបង្ក្រាបក្រុមអ្នកប្រមូលផ្តុំប្រើប្រាស់ថ្នាំញៀនប្រុសស្រីមួយ១០នាក់ ស្រីម្នាក់ ។
លោកអធិការបានបញ្ជាក់ថា ជាមួយនឹងការបង្ក្រាបនេះសមត្ថកិច្ចដកហូតបានវត្ថុតាងបានរួមមាន ទី១-ម្ស៉ៅក្រាមសថ្លា ចំនួន០២ កូនថង់តូច, ទី២-ថ្នាំញៀនប្រភេទគ្រាប់ពណ៍ក្រហម មានអក្សរ WY ចំនួន១គ្រាប់, ទី៣-ដបកែឆ្នៃសំរាប់ជក់ថ្នាំញៀន០៦, ទី៤- បំពង់ទាម៉ូម៉ែត្រ០២, ទី៥-ដែកកេស២៥, ទី៦-កាំបិត៨ដើម, ទី៧-ដាវសាម៉ូរ៉ៃ១ដើម, ទី៨-ថង់១ចំនួន និងទី៩-ចានសំរាប់សំងួតទឹកថ្នាំ១ ។ ក្រោយពេលកម្លាំងជំនាញនាំទៅអធិការក្រុងដើម្បីសាកសួរ និងធ្វើតេស្តទឹកនោមស្វែងរកសារធាតុញៀនជាលទ្ធផលឃើញថា(វិជ្ជមាន)ទាំង១០នាក់ ។ បច្ចុប្បន្នកំពុងកសាងសំណុំរឿងបញ្ជូនទៅស្នងការដ្ឋាននគរបាលខេត្តដើម្បីចាត់ការបន្ត ៕
ចែករំលែកព័តមាននេះ