ខេត្តសៀមរាប ៖ ទំនាស់វិវាទដីធ្លីដ៏រ៉ាំរ៉ៃជាង២០ឆ្នាំ រវាងប្រជាពលរដ្ឋ១៣គ្រួសារ និងលោកព្រំ ឡាង ដែលមានទីតាំងស្ថិតនៅភូមិអារ័ញ្ញ សង្កាត់សៀមរាប ក្រុងខេត្តសៀមរាប ដែលមានទំហំ២៣០ម៉ែត្រគុណ២០ម៉ែត្រ ត្រូវបានបញ្ចប់នាថ្ងៃទី២០ កុម្ភៈ ឆ្នាំ២០១៨ ដោយក្រុមការងារចម្រុះរបស់មន្ត្រីជំនាញ ។
បើយោងតាមស្មារតីនៃកិច្ចព្រមព្រៀងបញ្ចប់ទំនាស់ដីធី្លកាលពីថ្ងៃទី០៩ ខែកុម្ភៈ ឆ្នាំ២០១៨ ត្រូវបានក្រុមការងារចម្រុះចុះធ្វើការវាស់វែង និងកំណត់ព្រំដី ជាក់ស្តែងជូនប្រជាពលរដ្ឋទាំង១៣គ្រួសារ ក្រោមការដឹកនាំដោយលោក អ៊ឹង សុភ័ណ នាយកទីចាត់ការអន្តរវិស័យ សាលាខេត្តសៀមរាប ដោយមានការចូលរួមភាគីទំនាស់ទាំងពីរចូលរួមផងដែរ ។
ការវាស់វែងរបស់ក្រុមការងារយើងបានជួបនូវបញ្ហាប្រឈមមួយចំនួន ពីការខឹងសម្បារបស់ម្ចាស់ដី ឈ្មោះព្រំ ឡាង ដែលបានធ្វើការប្តឹងផ្តល់ប្រជាពលរដ្ឋទាំង១៣គ្រួសារថា បានរំលោភទៅលើដីកម្មសិទ្ធិរបស់ខ្លួនទៅតុលាការ ហើយក៏មានការចេញសាលក្រមរបស់តុលាការផងដែរ ។ គួឲ្យកត់សម្គាល់ផងដែរថា យោងតាមស្មារតីកិច្ចប្រជុំ លោក ព្រំ ឡាង និងប្រជាពលរដ្ឋទាំង១៣គ្រួសារបានធ្វើកិច្ចព្រមព្រៀងទៅតាមសំណូមពររបស់ម្ចាស់ដីឈ្មោះ ព្រំ ឡាង ដោយបានកំណត់ឲ្យក្រុមការងារជំនាញធ្វើការវាស់វែងដោយកាត់ចំណីផ្លូវ ហើយមានជម្រៅប្រវែង២០ម៉ែត្រ ដែលដីសល់ពីនោះ គឺដីរបស់គាត់ ។
ក្នុងនោះភាគីលោក ព្រំ ឡាង ក៏បានបញ្ជាក់ថា ដីដែលឲ្យមន្ត្រីជំនាញ ធ្វើការវាស់វែងជូនប្រជាពលរដ្ឋទាំង១៣គ្រួសារ គឺជាដីសម្បទានរបស់គាត់ជូនទៅឲ្យបងប្អូន ។ ក្នុងការចុះវាស់វែងដីដែលកំពុងមានវិវាទនេះមន្ត្រីជំនាញនាពេលនេះមានបំណង ដើម្បីស្រង់នូវទិន្នន័យព្រំដី ឲ្យបានច្បាស់លាស់ត្រឹមត្រូវទៅតាមចំនួនផ្ទៃដី ដែលត្រូវប្រគល់ឲ្យប្រជាពលរដ្ឋទាំង១៣គ្រួសារ ដើម្បីយកធ្វើជាមួលដ្ឋាន ក្នុងការបន្តដំណើរការនៃការដោះស្រាយវិវាទដីធ្លីទៅតាមនីតិវិធីដែលបានកំណត់ ពីព្រោះថាករណីទំនាស់ដីធ្លីរវាងប្រជាពលរដ្ឋ១៣គ្រួសារនេះបានអូសបន្លាយ២០ ឆ្នាំមកហើយ ៕
ចែករំលែកព័តមាននេះ