រាជធានីភ្នំពេញ ៖ កាលណាសំដៅដល់កីឡាករ-កីឡាការិនី ទោះមិនបានបង្ហើបឱ្យដឹងពីជីវភាពក៏គេដឹងរួចទៅហើយភាគច្រើនគឺក្រីក្រខ្វះខាត ដោយសូម្បីតែកីឡាករ-កីឡាការិនីល្បីៗមួយចំនួនក៏ស្ថិតក្នុងសភាពជួលផ្ទះគេនៅយ៉ាងលំបាកផងដែរ ។ កីឡាករ-កីឡាការិនីភាគច្រើន ត្រូវគេដឹងថាល្អមើលតែពេលចេញប្រកួត ហើយទទួលបានមេដាយកិត្តិយសប៉ុណ្ណោះ ប៉ុន្តែបើជីវភាពខាងក្រៅវិញ គឺមិនខុសពីជនសាមញ្ញនោះទេ ។
ក្នុងនោះបើសំដៅដល់កីឡាករផ្នែកប្រដាល់វិញ គឺរឹតតែក្រីក្រខ្វះខាតទៅទៀត ដោយសារតែប្រាក់ចំណូលរបស់ពួកគេគឺមិនគ្រប់នឹងតម្លៃព្យាបាលរបួសដែលគេបានទទួលរាល់ពេលវាយចប់ម្ដងៗនោះផង ក្នុងពេលកីឡាករ-កីឡាការិនីមួយចំនួនត្រូវគេដឹងថា តស៊ូធ្វើជាកម្មករគេយ៉ាងលំបាកដើម្បីរស់នោះផង ។ យ៉ាងណាក៏ដោយ ក្នុងចំណោមកីឡាករ-កីឡាការិនីភាគច្រើនដែលត្រូវគេដឹងជាទូទៅថាក្រីក្រខ្វះខាត និងមានជីវិតសឹងមិនគ្រប់ការហូបចុកប្រចាំថ្ងៃនោះ ក៏មានកីឡាករ-កីឡាការិនីល្បីឈ្មោះមួយចំនួនបានក្លាយជាអ្នកមានជីវភាពធូរធារព្រោះតែបានប្រឡូកក្នុងអាជីពជាអ្នកកីឡានោះដែរ ជាពិសេសអ្នកដែលទទួលបានមេដាយមាស មេដាយប្រាក់ និងមេដាយសំរឹទ្ធពីក្រៅប្រទេស ហើយបានយកថវិកាដែលខ្លួនទទួលបានទៅអភិវឌ្ឍជីវភាពរស់នៅឱ្យល្អប្រសើរផងដែរ ។ កីឡាករ-កីឡាការិនីទាំងនោះរួមមាន៖
+ ចាន់ វឌ្ឍនាកា ៖ កីឡាកររូបនេះក្រៅពីល្បីឈ្មោះក្នុងពិភពបាល់ទាត់ ក៏ជាអ្នកមានជីវភាពស្ដុកស្ដម្ភណាស់ដែរ ដោយសារតែលោកគឺជាកូនមន្ត្រីជាន់ខ្ពស់ក្នុងជួររដ្ឋាភិបាល ។ ប៉ុន្តែលោកក៏មានចំណូលផ្ទាល់ខ្លួនមិនធម្មតានោះដែរ ដោយសារតែលោកគឺតារាផ្ដាច់មុខតំណាងឱ្យក្រុមហ៊ុនទូរស័ព្ទធំមួយ ហើយទទួលបានប្រាក់ខែពីក្រុមជម្រើសជាតិ និងពីក្រុមបាល់ទាត់មួយនៅក្នុងប្រទេសម៉ាឡេេស៊ី ក្រោយបញ្ចប់ការងារនៅជប៉ុន ។
លោកគឺជាកីឡាករដែលមានលុយច្រើនក្នុងដៃ ដោយក្រៅពីទ្រព្យដែលបែងចែកឱ្យពីគ្រួសារ លោកក៏មានចំណូលជាប្រចាំផ្ទាល់ខ្លួន ហើយសល់លុយកាក់ក្នុងដៃមិនធម្មតានោះដែរ ដ្បិតថាកីឡាករភាគច្រើនត្រូវគេដឹងថានៅក្រនៅឡើយក្ដី ។ លោកមិនទាន់មានមុខរបរផ្ទាល់ខ្លួនទេ ប៉ុន្តែចំណូលរបស់លោកគឺខ្ពស់ជាងគេបើសរុបទាំងប្រាក់ខែជម្រើសជាតិ ពីការលេងជាប្រចាំឱ្យក្រុមមួយនៅក្រៅប្រទេស និងពីការចេញថតស្ពតម្ដងៗ។
+ ស៊ន សៀវម៉ី ៖ ក្រៅពីជាកីឡាការិនីល្បីឈ្មោះ នាងក៏មានក្លិបបង្ហាត់តេក្វាន់ដូមួយផ្ទាល់ខ្លួន ដែលអាចស្រូបចំណូលបានច្រើនជាចំណែករបស់នាង ក្រោយពីបែងចែកជាមួយបងស្រីគឺស៊ន ដាវីន និងបងប្រុសស៊ន អេលីត ក្នុងមួយខែៗរួចរាល់ផងដែរ ។
នាងក៏មានឱកាសចេញហ្វឹកហាត់និងប្រកួតនៅក្រៅប្រទេសញឹកញាប់ដែលអាចទទួលបានប្រាក់ឧបត្ថម្ភជាប្រចាំបន្ថែមពីលើប្រាក់ខែជម្រើសជាតិ និងប្រាក់ខែដែលនាងធ្វើជាកងអង្គរក្សផងដែរ ទើបធ្វើឱ្យកីឡាការិនីរូបនេះឡើងកាលីបគួរសមក្រោយពីបានល្បីឈ្មោះ ដោយនាងមានរថយន្តជិះយ៉ាងសមរម្យខុសពីជីវភាពរបស់កីឡាករកីឡាការិនីល្បីឈ្មោះមួយចំនួន ។ ក្នុងមួយខែៗនាងត្រូវគេដឹងថារកចំណូលបានច្រើនបើទោះជាមិនមានការទម្លាយថារកបានច្រើនក្នុងកម្រិតណានៅឡើយក្ដី ។ នេះមិនទាន់រាប់បញ្ចូលចំណូលខាងក្រៅដែលនាងទទួលបានពីការឧបត្ថម្ភពីសំណាក់ក្រុមហ៊ុនដែលជួយជ្រោមជ្រែងនាង និងពីការងារថតស្ពតមួយចំនួនដែលគេនៅត្រូវការនាងផងដែរ។
+ ប្រាក់ មុន្នីឧត្តម ៖ ក្នុងចំណោមកីឡាករជម្រើសជាតិដែលមានកេរ្តិ៍ឈ្មោះបោះសំឡេង លោកក៏ជាកីឡាករដែលមានមុខរបរផ្ទាល់ខ្លួន ហើយក៏មានភរិយាស្រស់ស្អាតផងដែរ ។
លោកគឺជាថៅកែហាងបោកអ៊ុតធំមួយនៅជិតផ្សារចាស់ ដោយហាងរបស់លោកមានម៉ាស៊ីនរហូតដល់១០-២០គ្រឿងឯណោះ ខណៈដែលភរិយារបស់លោកគឺជាអ្នកមើលការខុសត្រូវប្រចាំហាង ។
ជារឿយៗលោកក៏ជួយមើលការខុសត្រូវហាងដោយមិនប្រកាន់ខ្លួនផងដែរ ក្រោយពីលោកទំនេរពីការហាត់បាល់ទាត់នៅលើទីលាន ។ ប្រាក់ មុន្នីឧត្តម គឺជាកីឡាករដែលអាចនិយាយបានថាមានជីវភាពរឹងមាំខាងក្រៅអាជីពជាងគេ បើធៀបនឹងកីឡាករជម្រើសជាតិផ្សេងទៀតដែលមិនទាន់មានលទ្ធភាពបើកជំនួញ និងពឹងតែលើឪពុកម្ដាយនៅឡើយ ។ បើទោះជាមុខរបរនេះបានកើតឡើងក្រោយពីលោករៀបការជាមួយកូនស្រីអ្នកជំនួញមានមុខមាត់ ប៉ុន្តែក៏ចាត់ទុកថាលោកបានរួមចំណែកបើកជំនួញធំមួយបន្ថែមពីលើអាជីពបាល់ទាត់របស់លោកផងដែរក្នុងពេលដែលលោកក៏ជាកីឡាករដែលមានទីផ្សារថតរឿង និងថតស្ប៉តមិនធម្មតាដែរ ។
លោកក៏ជាកីឡាករជម្រើសជាតិដែលទទួលបានប្រាក់ចំណូលខ្ពស់ប៉ុន្តែលោកនៅតែសកម្មនឹងមុខរបរបោកអ៊ុតរាល់ថ្ងៃ ដោយលោកធ្លាប់បានប្រកាសថា មុខរបររបស់លោកទទួលបានចំណូលមិនក្រោមពាន់ដុល្លារនោះទេ ដ្បិតថារាងហត់បន្តិច។
លោកក៏មានក្រុមហ៊ុនធំមួយផ្ដល់រថយន្តឱ្យប្រើប្រាស់ក្នុងនាមជាអ្នកតំណាងប្រចាំឆ្នាំផងដែរ ទើបកីឡាកររូបនេះកាន់តែកាលីប និងមានជីវភាពល្អប្រសើរបើធៀបនឹងកីឡាករផ្សេងទៀត ដែលមានជីវភាពរស់នៅត្រដាបត្រដួស។
+ ហែមថុន វិទិនី ៖ កីឡាការិនីហែលទឹករូបនេះ ក៏មានមុខជំនួញក្នុងដៃមិនធម្មតាផងដែរ បន្ថែមពីលើកេរ្តិ៍ឈ្មោះជាកីឡាការិនីជម្រើសជាតិល្បីឈ្មោះ ។ នាងជាគ្រូបង្វឹកហែលទឹកដែលមានកូនសិស្សច្រើនក្នុងដៃអាចឱ្យនាងរកចំណូលបានច្រើនគួរសមជារៀងរាល់ខែ ហើយនាងក៏មានមុខរបរលក់ដូរផលិតផលនៅតាមអនឡាញដែលអាចរកចំណូលបានខ្ពស់ដែរ ។ នៅលើហ្វេសប៊ុកនាងគឺជាកីឡាការិនីដែលសកម្មក្នុងការផ្សព្វផ្សាយលក់ដូរផលិតផលពាក់ព័ន្ធគ្រឿង
សម្អាង និងផលិតផលជាច្រើនមុខផ្សេងទៀត ដែលអាចនិយាយបានមិនមានកីឡាការិនីជម្រើសជាតិរូបណាមានជំនួញដូចគ្នានឹងនាងនោះទេ ។ មើលមួយភ្លែតនាងស្ទើរតែក្លាយជាតារាស្រីលេចធ្លោនៅលើហ្វេសប៊ុកទៅហើយ ដោយសារតែនាងត្រូវប្រើពេលច្រើនក្នុងការឆ្លើយសំណួរអ្នកកុម្ម៉ង់ និងត្រូវប្រើពេលយកទំនិញទាំងនោះទៅកាន់គោលដៅ ។ នាងត្រូវគេឃើញលេងខ្លួនហ៊ឺហារឡូយឆាយ មិនចាញ់តារាសិល្បៈប៉ុន្មានទេ មិនថាសម្លៀកបំពាក់ និងការតុបតែងខ្លួន ដោយនាងក៏មានរថយន្តប្រើប្រាស់ផ្ទាល់ខ្លួនផងដែរ ទើបគេឃើញថានាងជាកីឡាការិនីល្បីឈ្មោះម្នាក់ហើយ តែក៏មានជីវភាពសមនឹងកេរ្តិ៍ឈ្មោះរបស់នាង ដែលខុសពីកីឡាករ-កីឡាការិនីខ្លះក្រនៅខាងក្រៅពិបាកភ្នែកមើល។
+ វ៉ន វីវ៉ា ៖ ក្រោយប្រកាសលាឈប់ពីការប្រដាល់ លោកបានចាប់អាជីពជាអ្នករត់តាក់ស៊ីគិតជាគីឡូ ដោយមានការអះអាងថា ក្រៅពីមានរថយន្តរត់ផ្ទាល់ខ្លួន លោកក៏មានរថយន្តជួលឱ្យអ្នករកស៊ីដូចខ្លួន ដើម្បីទទួលបានចំណូលបន្ថែមផងដែរ ។ លោកត្រូវគេដឹងថាទទួលបានចំណូលមិនតិចនោះទេពីមុខរបររត់តាក់ស៊ីខ្លួនឯង និងជួលរថយន្តឱ្យក្រុមហ៊ុន ទើបលោកលែងខ្វល់ពីការប្រដាល់ ឬរត់មកធ្វើជាគណៈកម្មការប្រដាល់ ឬបើកក្លិបបង្ហាត់ប្រដាល់ដូចកីឡាករដែលខ្វះលទ្ធភាពក្រោយបោះបង់ការប្រដាល់មួយចំនួន ។ លោកក៏ត្រូវគេដឹងថា មានផ្ទះជួលមួយកន្លែងនៅភូមិកិន្ន ជិតវត្តក្រាំងធ្នុងផងដែរ ទើបអ្នកណាៗក៏សរសើរថា លោកជាកីឡាករដែលមានជីវភាពធូរធារក្រោយពេលបោះបង់ការប្រដាល់លើរេញ។
+ ចូវ សុធារ៉ា ៖ អតីតកីឡាការិនីល្បីឈ្មោះខាងផ្នែកចំបាប់រូបនេះ ក៏កាលីបណាស់ដែរ ដោយសារតែនាងបានប្រឡងជាប់ជាគ្រូក្របខ័ណ្ឌពេញសិទ្ធិ ហើយបានបង្រៀនមុខវិជ្ជាកីឡានៅក្នុងវិទ្យាល័យផ្សារដើមថ្កូវ ។ ថ្វីដ្បិតថាមុខរបររបស់នាងនៅតែពាក់ព័ន្ធនឹងការងារកីឡាកន្លងមក ប៉ុន្តែគេចាត់ទុកថាជាមុខរបរដែលដាច់ចេញពីជំនាញផ្នែកចំបាប់របស់នាងបាត់ទៅហើយ ក្នុងពេលដែលនាងបានសម្រេចលាឈប់ពីក្រុមជម្រើសជាតិ ក្រោយពីបានប្រឡងចូលគ្រូក្របខ័ណ្ឌខាងផ្នែកកីឡាហើយក៏បានជាប់ជាស្ថាពរ ដោយនាងក៏បានហ្វឹកហាត់ និងទទួលបណ្ដុះបណ្ដាលខាងផ្នែកផ្សេងក្នុងការបង្រៀនដល់សិស្ស ដែលមិនមែនជាការបង្រៀនខាងផ្នែកចំបាប់ដូចដែលនាងមានជំនាញកន្លងមក។
នាងក៏ចាត់ទុកថាជាកីឡាការិនីដែលជោគជ័យម្នាក់ក្រោយបាត់បង់សមត្ថភាពឡើងប្រកួតលើឆាកអន្តរជាតិផងដែរ ដោយសារតែនាងមានការងារជាគ្រូបង្រៀននៅក្នុងវិទ្យាល័យ ហើយធ្វើឱ្យជីវភាពរបស់នាងល្អប្រសើរមិនដូចកីឡាការិនីមួយចំនួនដែលក្រោយបោះបង់កីឡាក៏ធ្លាក់ខ្លួនលំបាក ឬក្រីក្រនោះ ។ នាងក៏បានរៀបការកសាងសុភមង្គលក្រោយចេញធ្វើគ្រូផងដែរ ទើបកាន់តែធ្វើឱ្យជីវិតរបស់នាងជោគជ័យទ្វេដង បើទោះជាស្នាដៃក្នុងពិភពចំបាប់ដែលនាងធ្លាប់សាងហាក់ត្រូវបានគេបំភ្លេចបន្តិចម្ដងៗក្ដី។
ក្រៅពីកីឡាករ-កីឡាការិនីខាងលើ កីឡាករកីឡាការិនីផ្សេងទៀតក៏ត្រូវគេឃើញមានរថយន្តប្រើប្រាស់ខ្លះៗផងដែរ ដោយគ្រាន់តែរថយន្តរបស់ពួកគេមិនទំនើប ហើយនៅពីក្រោយការមានរថយន្តប្រើរបស់ពួកគេគឺពួកគេខ្ចីបុលគេ និងជួលផ្ទះគេនៅនៅឡើយដែលផ្ទុយពីអ្នកខាងលើដែលមានរថយន្ត មានទ្រព្យ និងមានជីវភាពល្អប្រសើរដោយឯករាជ្យ៕
ចែករំលែកព័តមាននេះ