ខេត្តស្ទឹងត្រែង ៖ ដាយនេសាទល្មើសច្បាប់មួយខ្សែរងការបង្ក្រាបរឹបអូស ដោយកម្លាំងសហការណ៍ រួមមានអាជ្ញាធរឃុំក្បាលរមាស នគរបាលប៉ុស្តិ៍រដ្ឋបាល ឃុំក្បាលរមាស និងប្រជាការពារកាលពីថ្ងៃទី២០ ខែកុម្ភៈ ឆ្នាំ២០១៨ ។
ព័ត៌មានពីមន្ត្រីនគរបាលប៉ុស្តិ៍រដ្ឋបាលឃុំក្បាលរមាសឲ្យដឹងថា ក្រោយទទួលព័ត៌មានពីប្រជាពលរដ្ឋស្តីពីការដាក់ដាយ និងរបាំងព្រួលដោយខុសច្បាប់នៅចំណុចភូមិក្បាលរមាសចាស់ ឃុំក្បាលរមាស ស្រុកសេសាន ជំនាញខណ្ឌរដ្ឋបាលជលផលដឹកនាំដោយលោក វង្ស សាវឿន នាយរងខណ្ឌសហការរវាងអាជ្ញាធរឃុំ រួមកម្លាំងនគរបាលប៉ុស្តិ៍រដ្ឋបាលឃុំក្បាលរមាស និងប្រជាការពារចុះបង្ក្រាប និងរឹបអូសវត្ថុតាងល្មើសច្បាប់មួយចំនួន ។
លោក វង្ស សាវឿន នាយរង ខណ្ឌរដ្ឋបាលជលផលនៃមន្ទីរកសិកម្ម រុក្ខា ប្រម៉ាញ់ និងនេសាទ ខេត្តស្ទឹងត្រែងឲ្យដឹងថា កាលពីថ្ងៃទី២០ ខែកុម្ភៈ នេះ កម្លាំងជំនាញខណ្ឌរដ្ឋបាលជលផលបានសហការជាមួយសាលាឃុំក្បាលរមាស នរគបាលប៉ុស្តិ៍ក្បាលរមាស និងប្រជាការពារភូមិចុះបង្ក្រាបបទល្មើសជលផល ដោយប្រើឧបករណ៍នេសាទខុសច្បាប់នៅខេត្តស្ទឹងត្រែង ។
ដោយបានដកហូតវត្ថុតាងមួយចំនួន រួមមានដាយមុខ២ម៉ែត្រប្រវែង២០ម៉ែត្រ មួយខ្សែ របាំងប្រួលសំណាញ់ជ័រ ប្រវែង២០០ម៉ែត្រមួយខ្សែ បង្គោលឈើរបាំងប្រួលចំនួន២៥០ដើម និងត្រីចម្រុះចំនួន៥គីឡូក្រាម ត្រូវបានពន្លែងទៅក្នុងទន្លេវិញផងដែរ ។
លោកបន្តថា គ្រាកម្លាំងសហការចុះបង្ក្រាបឧប្បករណ៍ល្មើសច្បាប់ខាងលើជនសង្ស័យបានគេចខ្លួនមុនកម្លាំងសមត្ថកិច្ចចុះដល់ទីតាំង ដូច្នេះទាក់ទិនករណីនេសាទល្មើសច្បាប់ខាងលើសមត្ថកិច្ចពុំបានចាប់ខ្លួនជនសង្ស័យណាម្នាក់ឡើយ ។
ក្រោយការបង្ក្រាបរឹបអូសវត្ថុតាងជាក់ស្តែង រាល់ឧបករណ៍ដែលបានដកហូតរក្សាទុកនៅសាលាឃុំក្បាលរមាស ដើម្បីរង់ចាំការបំផ្លាញ់ចោលនៅពេលឆាប់ខាងមុខ ៕
ចែករំលែកព័តមាននេះ