រាជធានីភ្នំពេញ ៖ នាយកប្រតិបត្តិគម្រោងជំរុញផលិតកម្មស្បៀងនៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា កម្ពុជាគ្រោងផលិតបន្លែសុវត្ថិភាពឲ្យបានដល់៦ម៉ឺនតោនក្នុងឆ្នាំ២០១៩ ដោយអនុវត្តនៅខេត្តចំនួន៨ ត្រូវការកសិករសរុបជាង២ពាន់គ្រួសារ និងគ្រោងប្រើប្រាស់ថវិកាប្រមាណ២០លានដុល្លារអាមេរិក ។
លោក គៀន សុភា នាយកប្រតិបត្តិគម្រោងនេះ បានមានប្រសាសន៍កាលពីថ្ងៃទី១៩ កុម្ភៈ ថា ៖« ការផលិតបន្លែសុវត្ថិភាព ឬហៅថា ការអនុវត្តកសិកម្មល្អ យើងចាប់ផ្តើមអនុវត្តនៅឆ្នាំ២០១៧ ហើយក្នុងរយៈពេល១ឆ្នាំកន្លងមកនេះ យើងអនុវត្តការដាំដុះនៅតាមខេត្តចំនួន៨ ក្នុងនោះមានខេត្តពោធិ៍សាត់, បាត់ដំបង, សៀមរាប, កំពង់ធំ, កំពង់ចាម, ត្បូងឃ្មុំ, ព្រៃវែង និងខេត្តកណ្តាល ។ ក្នុងដំណាក់កាលទី១នៃគម្រោងនេះ យើងជ្រើសរើសកសិករប្រមាណ៨២០គ្រួសារផលិតបន្លែបានជិត១ម៉ឺនតោន បើធៀបនឹងការព្យាករកាលពីឆ្នាំ២០១៦ មុនយើងចាប់ផ្តើម កើនឡើង២៥% » ។
ការផលិតបន្លែសុវត្ថិភាព ឬហៅថា ស្តង់ដា GAP គឺគ្រោងផលិតឱ្យបាន៦ម៉ឺនតោនក្នុងឆ្នាំ២០១៩ ហើយត្រូវការកសិករចំនួន២.០៦០គ្រួសារ ក្នុងនោះការដាំដុះខ្នាតមធ្យមមាន២.០០០គ្រួសារ និងខ្នាតធំ៦០គ្រួសារ ។
លោក គៀន សុភា បន្តថា ៖« នៅឆ្នាំ២០១៨ យើងអត់មានគម្រោងពង្រីកការផលិតបន្លែនៅតាមខេត្តទាំង៨ខាងលើទេ ដោយសារនៅតាមខេត្តដែលសិក្សានេះ ចាប់ផ្តើមមានសក្តានុពលហើយ អីចឹង យើងមានតែពង្រីកចំនួនកសិករឱ្យដល់២.០៦០គ្រួសារ (កសិករបានដាំបន្លែស្រាប់) ដើម្បីឱ្យគាត់មានលទ្ធភាពផលិតបន្លែពេញ១ឆ្នាំ » ។
លោកបន្ថែមថា ៖« ក្នុងឆ្នាំ២០១៨នេះរំពឹងថា ការផលិតបន្លែសុវត្ថិភាពនឹងកើនឡើងពី២ម៉ឺន ទៅ៣ម៉ឺនតោន ហើយដល់ឆ្នាំ២០១៩ អាចផលិតបានរហូតដល់៦ម៉ឺនតោន ដោយសារយើងបានបញ្ចូលបច្ចេកទេសទំនើបក្នុងការដាំដុះបន្លែសុវត្ថិភាព និងបណ្តុះបណ្តាលបន្ថែមដល់កសិករឱ្យចេះផលិតបន្លែទទួលបានទិន្នផលខ្ពស់ » ។
លោកលើកឡើងថា នៅពេលកម្ពុជាអាចផលិតបន្លែសុវត្ថិភាពបានច្រើន គឺអាចចូលរួមជួយឱ្យពលរដ្ឋមានសុខភាពល្អ និងកាត់បន្ថយការចំណាយលើការព្យាបាល ។
ម្យ៉ាងទៀត នឹងជួយធ្វើឱ្យបរិស្ថានរស់នៅមានលក្ខណៈល្អប្រសើរផងដែរ ។ បន្លែសុវត្ថិភាពនេះ គឺអនុញ្ញាតឲ្យប្រើប្រាស់ថ្នាំគីមីកម្រិតស្រាល ហើយមុនពេលប្រមូលផលចាប់ពី១០ ទៅ១៥ថ្ងៃ គឺឈប់ឱ្យប្រើប្រាស់ថ្នាំគីមីហើយ ។
រដ្ឋមន្ត្រីក្រសួងកសិកម្ម រុក្ខាប្រមាញ់និងនេសាទ លោកវេង សាខុន ធ្លាប់មានប្រសាសន៍ថា កន្លងមកយើងឃើញថា សម្រាប់ការដាំដុះបន្លែ នៅមិនទាន់បានបញ្ចូលបច្ចេកវិទ្យាទំនើបទេ អីចឹងហើយបានជាពលរដ្ឋនឿយណាយក្នុងការដាំដុះ ។
លោករដ្ឋមន្ត្រីថ្លែងថា ៖« យើងមានគម្រោងគាំទ្រដល់ប្រជាកសិករនាពេលបច្ចុប្បន្ន ទទួលបានការគាំទ្រហិរញ្ញប្បទានដោយក្រសួងសេដ្ឋកិច្ច និងហិរញ្ញវត្ថុ ។ យើងមានផែនការផលិតបន្លែនេះរហូតដល់ឆ្នាំ២០១៩ ចំនួន៦០ពាន់តោនក្នុង១ឆ្នាំ ហើយបច្ចុប្បន្ននេះ យើងកំពុងផុលផុសក្នុងការដាំដុះ » ។
លោករដ្ឋមន្ត្រីបន្តថា ៖« យើងបានរៀបចំឱ្យមន្ទីរកសិកម្ម រុក្ខាប្រមាញ់ និងនេសាទ ជួយចាត់ចែងទីផ្សារលក់ជូនពួកគាត់ហើយ ។ យើងត្រូវរៀបចំហេដ្ឋារចនាសម្ព័ន្ធស្រោចស្រពងាយស្រួល គឺគ្រាន់តែនៅពេលព្រឹកឡើង គាត់ដើរតែបើករ៉ូប៊ីណេប្រព័ន្ធស្រោចស្រពដំណាំ គាត់មិនចាំបាច់ប្រើប្រាស់កម្លាំងពលកម្មធំដុំទេ បញ្ចូលបច្ចេកវិទ្យាការពារសំណើមដី ក៏ដូចជាការពារស្មៅ និងមានវិធីសាស្ត្រកម្ចាត់សត្វចង្រៃ ។ យើងរៀបចំហេដ្ឋារចនាសម្ព័ន្ធជូនគាត់ជាច្រើន និងឧបត្ថម្ភទុនក្នុងការផលិតជាដើម » ៕
ចែករំលែកព័តមាននេះ