ខេត្តពោធិ៍សាត់៖ បុរសព្រានព្រៃម្នាក់បានត្រូវសមត្ថកិច្ចស្រាវជ្រាវឃាត់ខ្លួនបញ្ជូនទៅកាន់អធិការដ្ឋាន នគរបាលស្រុកវាលវែង បន្ទាប់ពីរាយឧបករណ៍ឆក់សត្វព្រៃបណ្ដាលឲ្យឆក់មនុស្សស្លាប់កាលពីថ្ងៃទី១៩ ខែកុម្ភៈ ឆ្នាំ២០១៨ វេលាម៉ោង១០យប់ នៅភូមិប្រមោយ ឃុំប្រមោយ ស្រុកវាលវែង។…
ខេត្តពោធិ៍សាត់៖ បុរសព្រានព្រៃម្នាក់បានត្រូវសមត្ថកិច្ចស្រាវជ្រាវឃាត់ខ្លួនបញ្ជូនទៅកាន់អធិការដ្ឋាន នគរបាលស្រុកវាលវែង បន្ទាប់ពីរាយឧបករណ៍ឆក់សត្វព្រៃបណ្ដាលឲ្យឆក់មនុស្សស្លាប់កាលពីថ្ងៃទី១៩ ខែកុម្ភៈ ឆ្នាំ២០១៨ វេលាម៉ោង១០យប់ នៅភូមិប្រមោយ ឃុំប្រមោយ ស្រុកវាលវែង។ លោក វរសេនីយ៍ទោ ធាង ឡេង អធិការនគរបាលស្រុកវាលវែងបានឲ្យដឹងថា ជនសង្ស័យដែលឃាត់ខ្លួនឈ្មោះ ធូ ធិន ភេទប្រុស អាយុ៣៥ឆ្នាំ រីឯជនរងគ្រោះដែលស្លាប់ឈ្មោះ យង់ សារ៉ាន់ ភេទប្រុស អាយុ៣៦ឆ្នាំ ជនជាតិខ្មែរ មានទីលំនៅភូមិ.ឃុំកើតហេតុជាមួយគ្នា។
ទាក់ទិននឹងករណីនេះលោកឲ្យដឹងថា នៅយប់នោះជនរងគ្រោះ រួមជាមួយដៃគូរពីរនាក់ទៀត បាននាំគ្នាដើរឆ្លុះសត្វព្រៃក្នុងភូមិសាស្ត្រឃុំប្រមោយ ដោយប្រើអាវុធកែច្នៃ (កាំភ្លើងខ្យល់)។ ពួកគេទាំង០៣នាក់បានដើរបែកគ្នា ប៉ុន្តែជាអកុសលឈ្មោះ យង់ សារ៉ាន់(ជនរងគ្រោះ) បានដើរទៅទាក់ខ្សែលួសដែលព្រានព្រៃជាជនសង្ស័យកែច្នៃធ្វើជាប្រដាប់ឆក់សម្រាប់ឆក់ជ្រូកព្រៃ និងឈ្លូសជាដើម។ ជនរងគ្រោះមានស្នាមរបួសឆេះដាច់រលាត់គន្លាក់កដៃខាងស្ដាំ គន្លាក់កូនដៃឆ្វេង និងគន្ធាក់ម្រាមដៃបន្ទាប់ខាងឆ្វេង បណ្ដាលឲ្យស្លាប់ពេលបញ្ជូនដល់មណ្ឌលសុខភាព។ លោកអធិការឲ្យដឹងថា បន្ទាប់ពីហេតុការណ៍កើតឡើងភ្លាម សមត្ថកិច្ចយើងបានស្រាវជ្រាវរកព្រានព្រៃ ដែលប្រើឧបករណ៍ឆក់បណ្ដាលឲ្យមនុស្សស្លាប់នេះជាបន្ទាន់។
លុះវេលាម៉ោង២រំលងអាធ្រាត ឈានចូលថ្ងៃទី២០ ខែកុម្ភៈ ឆ្នាំ២០១៨ ទើបឃាត់ខ្លួនឈ្មោះ ធូ ធិន រួមទាំងវត្ថុតាងតែម្ដង។ នៅចំពោះមុខសមត្ថកិច្ចជនសង្ស័យឈ្មោះ ធូ ធិន បានសារភាពថា ប្រដាប់ឆក់នោះគឺពិតជារបស់ខ្លួនមែន គឺខ្លួនបានកែច្នៃឧបករណ៍មានអាគុយ ខ្សែលួស អាំងវែទ័រធ្វើជាឧបករណ៍សម្រាប់ឆក់សត្វព្រៃ ដើម្បីបានមកយកទៅលក់ទិញអង្ករហូប។ ជនសង្ស័យ និងវត្ថុតាងសមត្ថកិច្ចនគរបាលស្រុកវាលវែង បានរៀបចំសំណុំរឿងបញ្ជូនទៅការិយាល័យព្រហ្មទណ្ឌកម្រិតធ្ងន់នៃស្នងការដ្ឋាននគរបាលខេត្តពោធិ៍សាត់ដើម្បីចាត់ការបន្ដតាមនីតិវិធី៕
ចែករំលែកព័តមាននេះ