ខេត្តព្រះសីហនុ ៖ សិស្សានុសិស្សមកពី បណ្តាសាលាបឋមសិក្សា និងសិស្សានុសិស្សដែលជាកាយឫទ្ធិ យុវជន យុវនារីស្ម័គ្រចិត្តកាកបាទក្រហម រួមជាមួយអាជ្ញាធរសង្កាត់ទាំង៤ និងសមត្ថកិច្ចនគរបាលប៉ុស្តិ៍រដ្ឋបាលសង្កាត់ទាំង៤ ក្នុងក្រុងព្រះសីហនុ កាលពីព្រឹកថ្ងៃទី១ កុម្ភៈបានជួបជុំគ្នាចូលរួមសំអាតបរិស្ថានតាមដងផ្លូវសាធារណៈទូទាំងក្រុង ក្រោមការដឹកនាំចង្អុលបង្ហាញពីអាជ្ញាធរខេត្ត ដើម្បីចូលរួមក្នុងពិធីបុណ្យចូលឆ្នាំចិន និងដើម្បីលើកស្ទួយវិស័យទេសចរណ៍ស្របតាមទិសស្លោក «ទីក្រុងស្អាត រមណីយដ្ឋានស្អាត សេវាល្អ» ។
លោកគឹម សៀ ចៅសង្កាត់លេខ២ និងលោកស្រីឃួន សារុន ចៅសង្កាត់លេខ៤ ដែលបានចូលរួមនៅក្នុងសកម្មភាពនេះបានឱ្យដឹងថា យើងមានមោទនភាពណាស់ដែលខេត្តព្រះសីហនុគឺជាប៉ូលមួយក្នុងចំណោមប៉ូលទាំង៣ (ខេត្តសៀមរាប រាជធានីភ្នំពេញ និងខេត្តព្រះសីហនុ) ដែលជាប៉ូលទេសចរណ៍ដ៏សំខាន់ និងមានឆ្នេរសមុទ្រជាប់ចំណាត់ថ្នាក់លេខ១លើពិភពលោក ។ ក្រៅពីនេះនៅមានទឹកធ្លាក់ជ្រោះក្បាលឆាយ និងរមណីយដ្ឋានជាច្រើនល្អប្រណីតប្លែកៗ ដែលទាក់ទាញភ្ញៀវទេសចរជាតិ ក៏ដូចជាអន្តរជាតិមកទស្សនា សំរាកលំហែកាយជារៀងរាល់សប្តាហ៍ និងរៀងរាល់ពិធីបុណ្យធំៗ ពិសេសបុណ្យចូលឆ្នាំចិននាពេលនេះ ។ មូលហេតុនេះហើយ ទើបអាជ្ញាធរខេត្តបានណែនាំចង្អុលបង្ហាញមកអាជ្ញាធរសង្កាត់ទាំង៤ ឱ្យសហការជាមួយលោកគ្រូ អ្នកគ្រូ ក្មួយៗ សិស្សានុសិស្សសាលាបឋមសិក្សាក្នុងក្រុងយុវជន យុវនារី កាកបាទក្រហម និងក្មួយៗដែលជាកាយឫទ្ធិចូលរួមសំអាតបរិស្ថានក្នុងក្រុងទេសចរណ៍របស់យើង ។
លោកគឹម សៀ និងលោកស្រីឃួន សារុន បានបន្តទៀតថា ជារៀងរាល់ឆ្នាំ រាល់ពេលមានពិធីបុណ្យធំៗ (បុណ្យជាតិ បុណ្យប្រពៃណី) អាជ្ញាធរខេត្តតែងតែណែនាំថ្នាក់ក្រោមឱ្យជួយសំអាតទីក្រុង ពិសេសក្នុងឱកាសចូលរួមសំអាតបរិស្ថានម្តងៗបានធ្វើឱ្យក្មួយៗ ដែលជាក្មេងជំនាន់ក្រោយចេះស្រលាញ់បរិស្ថាន និងឆ្នេរខ្សាច់សមុទ្រដ៏កម្រនៅលើពិភពលោក ។ លោកសំ ប្រាក់ នាយប៉ុស្តិ៍រដ្ឋបាលសង្កាត់លេខ២ និងលោកសុខ ខនស៊ីមន នាយប៉ុស្តិ៍រដ្ឋបាលសង្កាត់លេខ៤ បានឱ្យដឹងផងដែរថា កំលាំងនគរបាលប៉ុស្តិ៍ក្រោមបញ្ជារបស់លោកស្នងការខេត្ត បានចុះមកការពារ និងសំរួលចរាចរ ដើម្បីឱ្យការងារសំអាតបរិស្ថានតាមដងផ្លូវសាធារណៈប្រព្រឹត្តទៅបានដោយរលូន និងសុវត្ថិភាព ៕
ចែករំលែកព័តមាននេះ