រាជធានីភ្នំពេញ ៖ រដ្ឋាភិបាលជប៉ុន ប្រកាសផ្តល់ប្រាក់៨០០លានយ៉េន (ប្រមាណ៧លានដុល្លារអាមេរិក) សម្រាប់អនុវត្តគម្រោងកម្មវិធីសេដ្ឋកិច្ច និងសង្គម ។ នេះបើតាមការបញ្ជាក់ពីក្រសួងការបរទេស នៅថ្ងៃទី២០ ខែកុម្ភៈ ឆ្នាំ២០១៨។
ក្រសួងការបរទេសបានលើកឡើងថា នៅថ្ងៃទី២១ ខែកុម្ភៈ លោកទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងលោក ហូរីណូអូជិ ហ៊ីដេហ៊ីសា ឯកអគ្គរាជទូតជប៉ុន ប្រចាំនៅកម្ពុជា នឹងអញ្ជើញជាចុះហត្ថលេខាលើលិខិតប្តូរសារ និងកំណត់ហេតុ នៃកិច្ចពិភាក្សាស្តីពីការផ្តល់ហិរញ្ញប្បទានឥតសំណងនេះ ។
ក្រសួងការបរទេសបានអះអាងថា នៅក្នុងក្របខណ្ឌ នៃកម្មវិធីនេះ រដ្ឋាភិបាលជប៉ុន នឹងផ្តល់ហិបបោះឆ្នោត ព្រមទាំងសម្ភារចាំបាច់ដ៏ទៀតដល់គណៈកម្មាធិការរៀបចំការបោះឆ្នោត (គជប) សម្រាប់ការបោះឆ្នោតសកល ដែលនឹងប្រព្រឹត្តទៅនៅខែកក្កដា ឆ្នាំ២០១៨ ខាងមុខនេះ ។
ជំនួយជាបន្តបន្ទាប់របស់ប្រទេសជប៉ុនដល់កម្ពុជានិយាយជារួម និងដល់គណៈកម្មាធិការជាតិរៀបចំការបោះឆ្នោត បង្ហាញពីការតាំងទឹកចិត្តរបស់ជប៉ុន ក្នុងការជួយកម្ពុជា ដើម្បីសម្រេចឲ្យបានបាននូវការរីកចម្រើនសេដ្ឋកិច្ច និងការអភិវឌ្ឍន៍ប្រកបដោយចីរភាព ៕
ចែករំលែកព័តមាននេះ