ខេត្តបន្ទាយមានជ័យ ៖ ហៅម៉ូតូឌុបជិះដល់កន្លែងស្ងាត់ឲ្យឈប់បត់ជើងតូច ត្រឡប់មកវិញចាប់គ្រៀក.ក ប្លន់យកម៉ូតូ គ្រូបង្រៀនភាសាចិនម្នាក់ ដែលឆ្លៀតពេលទំនេររត់ម៉ូតូឌុបពេលយប់ត្រូវបានជនល្មើសធ្វើសកម្មភាពយកកាំបិតចុងស្រួចចាក់ម្ចាស់ប្លន់យកម៉ូតូ ។ ករណីប្លន់យកម៉ូតូនេះបានកើតឡើងនៅវេលាម៉ោង២១និង០០នាទីថ្ងៃទី១៩ ខែកុម្ភៈ ឆ្នាំ២០១៨ នៅចំណុចខាងជើង ស្នាក់ការគណបក្សសង្កាត់ នៅភូមិមិត្តភាព សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។
លោកវរសេនីយ៍ឯកធិន ស៊ិនដេត អធិការនគរបាលក្រុងប៉ោយប៉ែតបានឲ្យដឹងថា ជនល្មើស ឈ្មោះ ដែម រដ្ឋា អាយុ២៥ឆ្មាំ ភេទប្រុស នៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ មុខរបរកម្មករ និងជាមនុស្សញៀនថ្នាំ ។ ចំណែកជនរងគ្រោះឈ្មោះ តុល រតនះសុខា អាយុ៣៩ឆ្នាំ ភេទប្រុស ជនជាតិខ្មែរ នៅភូមិគីឡូលេខ៤ សង្កាត់ផ្សារកណ្តាល ក្រុងប៉ោយប៉ែត ខេត្តបន្ទាយមានជ័យ មុខរបរគ្រូបង្រៀនសាលាចិន និងរត់ម៉ូតូឌុប ។
លោកអធិការបានបញ្ជាក់ថា តាមការបំភ្លឺពីជនរងគ្រោះបានដឹងថា គាត់បានបើកម៉ូតូ សេ១២៥ ពណ៌ខ្មៅស៊េរី២០១៧ ពាក់ផ្លាកលេខបន្ទាយមានជ័យ១Q- ១១៤៦ ដឹកជនល្មើសនេះចេញពីផ្លូវដើមពុទ្ធ្រា ដឹកទៅតាមផ្លូវZOA ទៅដល់ចំណុចស្ងាត់វា ឲ្យឈប់ចុះនោម ពេលមកវិញ វាចាប់គ្រៀក.ករគាត់ធ្វើសកម្មភាពចាក់គាត់បណ្តាលឲ្យរងបួស ពេលនោះក៏មានការប្រតាយប្រតប់គ្នា ហើយក៏គាត់ស្រែកទើបអ្នកភូមិចេញជួយស្របពេលនោះនគរបាលប៉ុស្តិ៍ដើរល្បាតក៏ជួយធ្វើអន្តរាគមន៍ចាប់ជនសង្ស័យយកបានម៉ូតូ និងជួយយកទៅសង្គ្រោះព្យាបាលនៅមន្ទីរពេទ្យបង្អែកក្រុងប៉ោយប៉ែត ។
លោកវរសេនីយ៍ឯកធិន ស៊ិនដេត បានបន្តថា តាមការពិនិត្យរបស់លោកពេទ្យជនរងគ្រោះត្រូវបានជនល្មើសយកកាំបិតស្រួចចាក់បណ្តាលរងរបួស៦កន្លែង ។ ចំពោះជនសង្ស័យជាចោរប្លន់ កម្លាំងជំនាញអធិការនគរបាលក្រុងប៉ោយប៉ែតកំពុងកសាងសំណុំរឿងបញ្ជូនទៅស្នងការដ្ឋាននគរបាលខេត្ត បន្ទាយមានជ័យ ដើម្បីចាត់ការបន្ត ៕
ចែករំលែកព័តមាននេះ