រាជធានីភ្នំពេញ ៖ ខណៈដែលព្រឹទ្ធសភាបានកំណត់យកថ្ងៃទី២១ ខែកុម្ភៈ ឆ្នាំ២០១៨ បើកសម័យប្រជុំពេញអង្គរបស់ខ្លួន អ្នកនាំពាក្យព្រឹទ្ធសភាបានអះអាងថា សេចក្តីព្រាងវិសោធនកម្មច្បាប់រដ្ឋធម្មនុញ្ញថ្មី នឹងដាក់ទោសធ្ងន់ធ្ងរ ចំពោះបុគ្គលណាធ្វើឲ្យបរទេសផ្តាច់ជំនួយ ឬមិនឲ្យទិញផលិតផលរបស់ប្រជាពលរដ្ឋកម្ពុជា ខណៈការចែងបែបនេះ ដើម្បីការពារផលប្រយោជន៍ជាតិជាធំ ។
ការលើកឡើងរបស់របស់អ្នកនាំពាក្យព្រឹទ្ធសភា អាចនឹងសំដៅទៅអតីតបក្សសង្គ្រោះជាតិ ដែលបានស្នើឲ្យបរទេសផ្តាច់ជំនួយមកកម្ពុជា ក៏ដូចជាមនុស្សទូទៅផងដែរ ។
ការអះអាងរបស់អ្នកនាំពាក្យព្រឹទ្ធសភា បន្ទាប់ពីបញ្ចប់កិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា ដែលដឹកនាំដោយ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា នាព្រឹកថ្ងៃទី២០ ខែកុម្ភៈ នេះ ។
លោក ម៉ម ប៊ុននាង សមាជិក និងជាអ្នកនាំពាក្យព្រឹទ្ធសភាបានប្រាប់អ្នកសារព័ត៌មានថា មាត្រា៤៩ និងមាត្រា៥៣ នៃវិសោធនកម្មច្បាប់រដ្ឋធម្មនុញ្ញ បានហាមដាច់ខាត់មិនឲ្យជនណាម្នាក់ធ្វើអ្វីមួយដែលបង្កឲ្យមានផលប៉ះពាល់ដល់ផលប្រយោជន៍ជាតិនោះឡើយ ។
លោកបញ្ជាក់ថា «អំពើដែលធ្វើឲ្យខួចប្រយោជន៍ជាតិ រួមានការអំពាវនាវឲ្យបរទេសចកាត់ផ្តាច់ជំនួយ ឬការស្នើណាមួយទៅបរទេសមិនឲ្យទិញទំនិញ ដែលផលិតដោយប្រជាជនកម្ពុជា ជាដើម» ។
ជាមួយគ្នានោះដែរ លោក ម៉ម ប៊ុននាង ក៏បានញ្ជាក់ថា ច្បាប់ស្តីពី វិសោធនកម្មរដ្ឋធម្មនុញ្ញ និងច្បាប់ស្តីពី វិសោធនកម្មក្រមព្រហ្មទណ្ឌ នេះ នឹងអនុម័តជាការប្រញាប់ឲ្យបានមុនការបោះឆ្នោតជ្រើសរើសតំណាងរាស្ត្រខាងមុខ ដើម្បីទប់ស្កាត់កុំឲ្យមានភាពអនាធិបតេយ្យ និងទប់ស្កាត់ឃោសនាណាមួយ ដែលនាំឲ្យខាតផលប្រយោជន៍ជាតិ និងប្រជាជនកម្ពុជា ផងដែរ ។
សូមជម្រាបថា កាលពីថ្ងៃទី១៤ ខែកុម្ភៈ ឆ្នាំ២០១៨ កន្លងមកនេះ សមាជិករដ្ឋសភា មកពីគណបក្សប្រជាជនកម្ពុជា ៧៩រូប គណបក្សហ្វ៊ុនស៊ិនប៉ិច ៤១រូប គណបក្សសញ្ញាតិកម្ពុជា ២រូប គណបក្សខ្មែរអភិវឌ្ឍន៍សេដ្ឋកិច្ច ១រូប សរុបចំនួន១២៣រូប បានលើកដៃអនុម័តសេចក្តីព្រាងច្បាប់ វិសោធនកម្មរដ្ឋធម្មនុញ្ញ ដោយគ្មានការកែប្រែ ៕
ចែករំលែកព័តមាននេះ