ខេត្តកំពង់ឆ្នាំង ៖ ប្រជាពលរដ្ឋប្រមាណជាង៤០០នាក់បានស្ទុះក្រោកឈរ ស្រែកតវ៉ាប្រឆាំងនឹងការអានសេចក្តីសម្រេចរបស់គណៈនាយកសង្ឃ ដែលបានសម្រេចព្យួរតួនាទី និងភារកិច្ចរបស់លោកចៅអធិការវត្តអារញ្ញរង្សី ហៅវត្តព្រែករាំង ឲ្យទៅជាភិក្ខុបរិស័ទធម្មតា ក្នុងរឿងទំនាស់ដោយក្រុមជាងធ្វើវិហារវត្តចោទប្រកាន់ថា លោកចៅអធិការវត្ត មិនព្រមប្រគល់លុយថ្លៃធ្វើវត្តឲ្យពួកគេ ។ កិច្ចប្រជុំដែលមានព្រះវិន័យធរខេត្ត និងមន្ត្រីជំនាញបានរំសាយភ្លាមៗ បន្ទាប់ការតវ៉ាយ៉ាងពុះកញ្ច្រោលរបស់ប្រជាពលរដ្ឋ ។ ហេតុការណ៍នេះបានកើតឡើងនៅវេលាម៉ោង០៣និង១៥នាទីរសៀល ថ្ងៃទី១៩ ខែកុម្ភៈ នៅក្នុងកម្មវិធីប្រជុំមួយក្នុងសាលាឆាន់វត្តអារញ្ញរង្សី ហៅវត្តព្រែករាំង ស្ថិតនៅក្នុងភូមិព្រែករាំង ឃុំទឹកហូត ស្រុករលាប្អៀរ ខេត្តកំពង់ឆ្នាំង ។
នៅក្នុងរឿងខាងលើនេះ ប្រជាពលរដ្ឋ៣ទៅ៤នាក់ តំណាងឲ្យប្រជាពលរដ្ឋជាង៤០០នាក់ ដែលចូលរួមប្រជុំ នឹងជាអ្នកគាំទ្រលោកចៅអធិការវត្តព្រែករាំង ព្រះនាម អ៊ុក ចាន់ថន បាននិយាយតវ៉ាថា លោកចៅអធិការវត្ត ព្រះនាម អ៊ុក ចាន់ថន បានមកគង់នៅក្នុងវត្តតាំងពីវត្តមិនទាន់មានអ្វីទាំងអស់ រហូតលោកចៅអធិការបានចូលរួមជាមួយពុទ្ធបរិស័ទកសាងបានសាលាឆាន់ ចាក់ដីរាប់ម៉ឺនឡាន និងកសាងព្រះវិហារថ្មី អស់ប្រាក់រាប់សែនដុល្លារ តែលទ្ធផលចុងក្រោយ នៃការខិតខំរបស់លោក បែរជាត្រូវគណៈសង្ឃនាយកជឿតែភាគីម្ខាងបានចេញសេចក្តីប្រកាសគ្មានហេតុផល ដោយមិនបានចុះមកស្រាវជ្រាវរករឿងហេតុច្បាស់លាស់ និងការពិតផង បែរជានៅរសៀលថ្ងៃទី១៩ ខែកុម្ភៈ នេះ ស្រាប់តែលោកប្រធានមន្ទីធម្មការ និងសាសនាខេត្ត និងមន្ត្រីសង្ឃខេត្ត មកប្រកាសសេចក្តីប្រកាសរបស់សង្ឃនាយក ដកលោកចេញពីតួនាទីចៅអធិការវត្តឲ្យទៅជាភិក្ខុសង្ឃធម្មតាទៅវិញ រឿងនេះពួកគាត់ទាំងអស់ជាពុទ្ធបរិស័ទចំណុះជើងវត្ត មិនសុខចិត្តឡើយ ។
លោក សរ លាង ប្រធានមន្ទីរធម្មការ និងសាសនាខេត្ត ក្រោយពីមានការតវ៉ាពីប្រជាពលរដ្ឋលោកបានឲ្យដឹងថា នៅក្នុងរឿងនេះ លោកក៏បានធ្វើរបាយការណ៍រាយការទៅលោកអភិបាលខេត្ត សុំឲ្យបង្កើតគណៈកម្មាការថ្មីមួយចុះស្រាវជ្រាវរឿងនេះជាបន្ទាន់ និងឲ្យបានច្បាស់លាស់ដើម្បីដោះស្រាយវិវាទខាងលើនេះឲ្យបានឆាប់ៗ និងផ្តល់យុត្តិធម៌ជូនប្រជាពលរដ្ឋ ក៏ដូចជាព្រះសង្ឃ និងជាងធ្វើវិហារផងដែរ ។ ហើយការរៀបចំបង្កើតគណៈកម្មការ ចុះស្រាវជ្រាវរឿងនេះ គឺនឹងធ្វើឆាប់ៗនេះ មិនទុកយូរឡើយ ។
ជុំវិញរឿងនេះដែរ មន្ត្រីនគរបាលប៉ុស្តិ៍ទឹកហូតបានឲ្យដឹងថា ក្រោយពីមានវិវាទខាងលើនេះ កាលពីកន្លងទៅ លោក ប៊ុន សាន ជាងមេជាងទី៤ និងប្រពន្ធឈ្មោះ សឹម ឡេង ដែលចោទលោកថា បានជំពាក់ថ្លៃជាងមិនព្រមសង បានកាន់កាំបិតនាំគ្នាមកកាប់លោកដល់លើវត្ត ដែលពេលនោះលោកមេភូមិក៏បានឃាត់ និងបានដកកាំបិតទុកទៀតផង ។ ក្រោយមកលោកគណៈកម្មការវត្ត បានប្តឹងទៅតុលាការពីបទ «ប៉ុនប៉ងធ្វើឃាត» ត្រូវនគរបាលខេត្តមកចាប់ លោក ប៊ុន សាន និងប្រពន្ធ តាមដីកាបញ្ជូនទៅតុលាការខេត្ត តែពេលទៅដល់តុលាការខេត្តបានតែ៣ម៉ោង មិនដឹងហេតុអ្វីទេក៏ត្រូវតុលាការដោះលែងពួកគេឲ្យនៅក្រៅឃុំវិញ ហើយក៏កើតមានរឿងប្តឹងផ្តល់នេះកាន់តែធំដូចពេលនេះតែម្តង ៕
ចែករំលែកព័តមាននេះ