ខេត្តកំពង់ឆ្នាំង ៖ ល្បែងស៊ីសងភ្នាល់ចាក់មាន់ជល់តាមកញ្ចក់ទូរទស្សន៍ កើតមានពេញបន្ទុកនៅក្រោយប៉ុស្តិ៍នគរបាលរដ្ឋបាលសង្កាត់ប្អេរ ក្រុងកំពង់ឆ្នាំង ហើយក៏នៅមិនឆ្ងាយពីមុខសាលាខេត្តកំពង់ឆ្នាំងប៉ុន្មានដែរដែលបានធ្វើឱ្យគ្រប់មជ្ឈដ្ឋានការរិះគន់អាជ្ញាធរមូលដ្ឋានថា បណ្តោយឱ្យក្រុមអ្នកញៀនល្បែងផ្កាប់មុខទាំងនោះហោកញ្ជ្រៀវជារៀងរាល់ថ្ងៃ រំខានការរស់នៅរបស់អ្នកជិតខាង និងបង្កការកកស្ទះចរាចរណ៍ តាមដងផ្លូវសាធារណៈទៀតផង ។
កាលពីថ្ងៃសៅរ៍ចុងសប្តាហ៍នេះ គេឃើញមានអ្នកសារព័ត៌មានមួយក្រុម បានទៅថតផ្តិតយករូបភាពដែលក្រុមអ្នកញៀន នឹងល្បែងទាំងនោះកំពុងចាក់ភ្នាល់គ្នាហ៊ោកញ្ជ្រៀវក្នុងហាងកាហ្វេមួយ ដែលនៅខាងក្រោយប៉ុស្តិ៍នគរបាលសង្កាត់ប្អេរ បន្ទាប់មកក្រុមអ្នកសារព័ត៌មានបានទូរសព្ទ័ទៅលោក ឡុច វណ្ណារ៉ា ស្នងការនគរបាលខេត្តរាយការណ៍ពីសកម្មភាពល្បែងស៊ីសងនៅចំណុចខាងលើ ត្រូវបានស្នងការប្រាប់ថា ឱ្យទៅសួរលោកអធិការនគរបាលក្រុងទៅ ។ បន្តិចក្រោយមក គេឃើញកម្លាំងនគរបាលក្រុង២នាក់ បានមកដល់និងបានហៅម្ចាស់ហាងកាហ្វេមានល្បែងស៊ីសងមកធ្វើកិច្ចសន្យានៅប៉ុស្តិ៍ប្អេរក្នុងថ្ងៃនោះដែរ ។ ប៉ុន្តែនៅរសៀលថ្ងៃទី១៨ កុម្ភៈ ល្បែងស៊ីសងភ្នាល់មាន់ខាងលើ នៅតែបន្តលេងយ៉ាងគគ្រឹកគគ្រេង ហាក់ផ្គើននឹងសមត្ថកិច្ចនគរបាលដែលបានហៅមកធ្វើកិច្ចសន្យាកាលពីថ្ងៃសៅរ៍ ។
ជាមួយគ្នានេះដែរ នៅរសៀលថ្ងៃអាទិត្យទី១៨ កុម្ភៈ មានអ្នកខ្លះបានទូរសព្ទ័មកប្រាប់អ្នកកាសែតជាបន្តបន្ទាប់ ដោយពួកគាត់ប្រាប់ថា ល្បែងស៊ីសងនៅក្រោយប៉ុស្តិ៍នគរបាលសង្កាត់ប្អេរ នៅតែរំខានការរស់នៅរបស់ពួកគាត់ដេកពួនមិនបាន ចាប់ពីម៉ោង១២ថ្ងៃត្រង់ទៅ គឺអ្នកលេងល្បែងស៊ីសងចាក់ភ្នាល់បញ្ជល់មាន់ទាំងនោះបានហ៊ោកញ្ជ្រៀវរំខានខ្លាំងណាស់ ។ ម្យ៉ាងវិញទៀតបានបង្កការស្ទះចរាចរណ៍ដល់អ្នកធ្វើដំណើរចូលទៅផ្ទះពួកគាត់ទៀតផង ។ពួកគាត់បានសំណូមពរឱ្យជួយអន្តរាគមន៍ ដោះស្រាយបញ្ហានេះឱ្យពួកគាត់ផង ។
សូមបញ្ជាក់ថា ផ្ទះលក់កាហ្វេមានល្បែងស៊ីសងខាងលើ នៅចម្ងាយប្រហែល១០ម៉ែត្រពីប៉ុស្តិ៍នគរបាលសង្កាត់ប្អេរ និងមានចម្ងាយប្រមាណ៥-៦រយម៉ែត្រពីមុខសាលាខេត្តកំពង់ឆ្នាំង បានកើតមានយូរហើយដោយកាលមុនមានការចាក់ប្រដាល់តែសព្វថ្ងៃចាក់មាន់ជល់តាមកញ្ចក់ទូរទស្សន៍កើតពេញបន្ទុក ។ សមត្ថកិច្ចនគរបាលប៉ុស្តិ៍បានហៅអប់រំជាច្រើនលើកមកហើយតាមបណ្តឹងរបស់អ្នកជិតខាងតែហាក់គ្មានប្រសិទ្ធភាពសោះ ។
ហេតុនេះ ទើបពួកគេរាយការណ៍មកអ្នកកាសែតម្តង ដើម្បីឱ្យចុះផ្សាយដឹងដល់ចៅហ្វាយខេត្ត សូមមេត្តាជួយប្រជាពលរដ្ឋផង ។ ពួកគេថា បើអភិបាលខេត្តបិទល្បែងស៊ីសងខាងលើនេះបាន ពួកគេសូមសំដែងការគាំទ្រ១០០ភាគរយ ប៉ុន្តែបើផ្សាយប៉ុណ្ណឹងហើយនៅតែមានល្បែងស៊ីសងនេះទៀត មិនបាច់ប្រឹងអួតពីគោលនយោបាយភូមិ-ឃុំមានសុវត្ថិភាពរកខ្មោចស្អីនោះទៀតទេ ដាក់លេខសូន្យហ្មងទៅ ៕
ចែករំលែកព័តមាននេះ