ចាប់ខ្លួនបុគ្គល៣នាក់ពីបទ «ញុះញង់»
- បន្ទាយមានជ័យ
ខេត្តបន្ទាយមានជ័យ ៖ សមត្ថកិច្ចចម្រុះបានឃាត់ប្រជាពលរដ្ឋ៣នាក់ ពីបទ «ញុះញង់ និងបង្កើតភូមិអនាធិបតេយ្យ» ត្រូវបានបញ្ជូនទៅសាលាដំបូងខេត្តចាត់ការតាមច្បាប់ ។ លោកវរសេនីយ៍ឯក អ៊ុក…
ខេត្តបន្ទាយមានជ័យ ៖ សមត្ថកិច្ចចម្រុះបានឃាត់ប្រជាពលរដ្ឋ៣នាក់ ពីបទ «ញុះញង់ និងបង្កើតភូមិអនាធិបតេយ្យ» ត្រូវបានបញ្ជូនទៅសាលាដំបូងខេត្តចាត់ការតាមច្បាប់ ។
លោកវរសេនីយ៍ឯក អ៊ុក សុផាត អធិការនគរបាលស្រុកថ្មពួក បានប្រាប់ថា ប្រជាពលរដ្ឋ៣នាក់ដែលត្រូវឃាត់ខ្លួនមាន ១.ឈ្មោះ ព្រាប ផែ ភេទប្រុស អាយុ៥៥ឆ្នាំ រស់នៅភូមិថ្មគោល ឃុំផ្គាំ ស្រុកស្វាយចេក ២.ឈ្មោះ ហម ហ៊ុន ភេទប្រុស អាយុ៣៤ឆ្នាំ រស់នៅភូមិស្វាយខ្មៅ ឃុំពន្លៃ ស្រុកភ្នំស្រុក ៣.ឈ្មោះ ឌុក មឿន ភេទប្រុស អាយុ៥០ឆ្នាំ រស់នៅភូមិកូនក្លែង ឃុំប៉ោយចារ ស្រុកភ្នំស្រុក ហើយប្រជាពលរដ្ឋទាំង៣នាក់ ស្នាក់នៅចំណុចដីការ៉េពីរ ស្ថិត៣ស្រុក មានស្រុកថ្មពួក ស្រុកស្វាយចេក ស្រុកភ្នំស្រុក ។
លោកបានបញ្ជាក់ថា ប្រជាពលរដ្ឋ៣នាក់ដែលត្រូវចាប់ខ្លួននេះ គឺកម្លាំងសមត្ថកិច្ចចម្រុះដែលការពារចំណុចដីការ៉េពីរ ដែលជាដីតំបន់អភិវឌ្ឍន៍សង្គមកិច្ច ចំណុចដីការ៉េពីរ ដែលឃាត់ខ្លួនកាលពីថ្ងៃទី១៨ ខែកុម្ភៈ ឆ្នាំ២០១៨ ស្ថិតចំណុចដីការ៉េពីរ ស្ថិត៣ស្រុក មានស្រុកថ្មពួក ស្រុកស្វាយចេក ស្រុកភ្នំស្រុក ។
លោកវរសេនីយ៍ឯក អ៊ុក សុផាត បានបញ្ជាក់ថា ក្រោយពេលដែលកម្លាំងសមត្ថកិច្ចចម្រុះដែលឃាត់ខ្លួនបានប្រគល់ជូនកម្លាំងអធិការដ្ឋាននគរបាលស្រុកថ្មពួក នៅវេលាម៉ោង៤ល្ងាច ថ្ងៃទី១៨ ខែកុម្ភៈ ឆ្នាំ២០១៨ ក្រោយពេលសាកសួរចម្លើយបានកសាងសំណុំរឿងបញ្ជូនទៅស្នងការដ្ឋាននគរបាលខេត្តបន្ទាយមានជ័យ នៅថ្ងៃទី១៩ ខែកុម្ភៈ ឆ្នាំ២០១៨ ។
លោកបានបញ្ជាក់ថា ចំណុំដីការ៉េពីរនេះ គឺជាដីតំបន់អភិវឌ្ឍន៍សង្គមកិច្ច ដែលមានទំហំ២,២២២ហិតា ដែលឈម៣ស្រុកមាន ស្រុកថ្មពួក ស្រុកស្វាយចេក ស្រុកភ្នំស្រុក ។ កាលពីដើមខែកុម្ភៈ ឆ្នាំ២០១៨ ក្រុមគណៈកម្មាការ ដែលដឹកនាំដោយលោកឧត្តមសេនីយ៍ត្រី ភ្លន់ តារ៉ា មេបញ្ជាការតំបន់ប្រតិបត្តិការសឹករងខេត្តបន្ទាយមានជ័យ ជាប្រធានគណៈកម្មាការបានចុះទៅពិនិត្យ ឃើញមានប្រជាពលរដ្ឋរស់នៅចំណុចដីការ៉េពីរ មានប្រជាពលរដ្ឋអនាធិបតេយ្យប្រមាណ១០០គ្រួសារ ដែលធ្វើផ្ទះ និងដាំដំឡូងមី ។
លោកឧត្តមសេនីយ៍ត្រី សិទ្ធ ឡោះ ស្នងការរងនគរបាលខេត្តបានបញ្ជាក់ថា ប្រជាពលរដ្ឋចំនួន៣នាក់ ដែលកម្លាំងសមត្ថកិច្ចចម្រុះចាប់ខ្លួនប្រគល់ជូនអធិការដ្ឋាននគរបាលស្រុកថ្មពួក ហើយបញ្ជូនមកកម្លាំងនគរបាលខេត្ត ដែលចោទប្រកាន់ពីរករណី ១.ពីបទញុះញង់ប្រជាពលរដ្ឋយកដីតំបន់អភិវឌ្ឍន៍សង្គមកិច្ច ២.ពីបទបង្កើតភូមិអនាធិបតេយ្យលើដីតំបន់អភិវឌ្ឍន៍សង្គមកិច្ច ក្រោយពេលសាកសួរចម្លើយ ហើយនឹងកសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមច្បាប់ នៅថ្ងៃទី២០ ខែកុម្ភៈ ឆ្នាំ២០១៨ ៕
ចែករំលែកព័តមាននេះ