រាជធានីភ្នំពេញ ៖ កម្មវិធី«រួមគ្នាដើម្បីមុខរបរ និងការងាររបស់យុវជននៅកម្ពុជា» ដែលជាកម្មវិធីរបស់អង្គការសហប្រជាជាតិ នឹងជួយឱ្យយុវជន និងស្ត្រីវ័យក្មេង ទទួលបានឱកាសការងារសមរម្យប្រកបដោយផលិតភាពខ្ពស់កាន់តែច្រើនឡើង ។ នេះបើតាមការលើកឡើងរបស់មន្ត្រីជាន់ខ្ពស់ក្រសួងការងារ…
រាជធានីភ្នំពេញ ៖ កម្មវិធី«រួមគ្នាដើម្បីមុខរបរ និងការងាររបស់យុវជននៅកម្ពុជា» ដែលជាកម្មវិធីរបស់អង្គការសហប្រជាជាតិ នឹងជួយឱ្យយុវជន និងស្ត្រីវ័យក្មេង ទទួលបានឱកាសការងារសមរម្យប្រកបដោយផលិតភាពខ្ពស់កាន់តែច្រើនឡើង ។ នេះបើតាមការលើកឡើងរបស់មន្ត្រីជាន់ខ្ពស់ក្រសួងការងារ និងបណ្ដុះបណ្ដាលវិជ្ជាជីវៈ ។
ក្នុងឱកាសអញ្ជើញចូលរួមជាសហប្រធានជាមួយលោកស្រីក្លែ វ៉ាន់ដឺ វែរ៉ែន (Claire Vander Vaeren) ក្នុងកិច្ចប្រជុំលើកទី១នៃក្រុមប្រឹក្សាយោបល់នៃកម្មវិធីរួមគ្នារបស់អង្គការសហប្រជាជាតិ «រួមគ្នាដើម្បីមុខរបរ និងការងាររបស់យុវជននៅកម្ពុជា» នៅសណ្ឋាគាររ៉ាហ្វ៊ល ឡឺរ៉ូយ៉ាល់ភ្នំពេញ នៅព្រឹកថ្ងៃទី១៩ កុម្ភៈ លោកបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានមានប្រសាសន៍ថា កម្មវិធីនេះ ត្រូវបានបង្កើតឡើងតាមរយៈកិច្ចព្រមព្រៀងកាលពីថ្ងៃទី៣១ ខែសីហា ឆ្នាំ២០១៧ និងបានដាក់សម្ពោធក្នុងខែកញ្ញា ឆ្នាំ២០១៧ សម្រាប់ដំណាក់កាលដំបូងរយៈពេល២ឆ្នាំ ក្រោមកិច្ចសហការរួមគ្នារវាងក្រសួងការងារ និងបណ្តុះបណ្តាលវិជ្ជាជីវៈ, ក្រសួងអប់រំ យុវជន និងកីឡា និងភ្នាក់ងារចំនួន៥ របស់អង្គការសហប្រជាជាតិដែលជាដៃគូដ៏សំខាន់ផ្សេងទៀត រួមមាន អង្គការILO, អង្គការUNDP, អង្គការ UNICEF, អង្គការUNESCO និងអង្គការ UNV។
លោករដ្ឋមន្ត្រីបន្ដថា កម្មវិធីរួមគ្នានេះ ត្រូវបានបង្កើតឡើងក្នុងគោលបំណងឱ្យយុវជន និងស្ត្រីវ័យក្មេងទទួលបានឱកាសការងារសមរម្យប្រកបដោយផលិតភាពខ្ពស់ឱ្យបានកាន់តែច្រើនឡើង ហើយអ្វីដែលជាលទ្ធផលរំពឹងនោះគឺ ៖
១-យុវជន និងស្ត្រីវ័យក្មេង នឹងទទួលបានការអប់រំក្នុង និងក្រៅប្រព័ន្ធប្រកបដោយគុណភាព និងតាមការស្ម័គ្រចិត្ត ដើម្បីអភិវឌ្ឍន៍ជំនាញវិជ្ជាជីវ: និងបច្ចេកទេស ។
២-យុវជន និងស្ត្រីវ័យក្មេងទាំងក្នុង និងក្រៅសាលាបានទទួលជំនាញអាជីវកម្ម និងសហគ្រាសគ្រប់គ្រាន់ ដើម្បីអភិវឌ្ឍន៍សហគ្រាសប្រកបដោយនិរន្តរភាព ។
៣-យុវជន និងស្ត្រីវ័យក្មេង បានទទួលអត្ថប្រយោជន៍ដែលកើតចេញពីហានិភ័យនៃការរំលោភបំពាន និងការរើសអើងនៅកន្លែងការងារ ។
លោកបណ្ឌិត អ៊ិត សំហេង បានបញ្ជាក់ថា ៖« តាមរយៈកិច្ចប្រជុំក្រុមប្រឹក្សាយោបល់លើកទី១នាថ្ងៃនេះ ជាការជំរុញ និងលើកទឹកចិត្តដល់អ្នកចូលរួមក្នុងការពិភាក្សាឱ្យបានផុសផុល សំដៅស្វែងរកវិធីសាស្ត្រល្អៗ និងមានប្រសិទ្ធភាព ដើម្បីឱ្យកម្មវិធីនេះទទួលបានលទ្ធផលគួរជាទីមោទនៈ ពោលគឺដើម្បីពង្រឹងយុវជន និងស្ត្រីវ័យក្មេងនៅកម្ពុជាយើង ឱ្យកាន់តែមានសមត្ថភាពពេញលេញក្នុងការចាប់យកឱកាសការងារដ៏សម្បូរបែប» ៕
ចែករំលែកព័តមាននេះ