រាជធានីភ្នំពេញ ៖ បុរសមួយក្រុមបានបបួលគ្នាជិះម៉ូតូកង់បីមួយគ្រឿងទៅផឹកស៊ីក្នុងហាងខារ៉ាអូខេ ខណៈពេលកំពុងតែផឹកស៊ីសប្បាយ និងស្តាប់ភ្លេងកំដរអារម្មណ៍ ស្រាប់តែត្រូវបានក្មេងស្ទាវមួយក្រុមមានគ្នា៤នាក់ជិះម៉ូតូពីរគ្រឿងមកសួររកម្ចាស់កង់បី ហើយបានធ្វើសក្មមភាពយកដុំថ្មគប់ទៅលើម៉ូតូកង់បីចតចោលនៅមុខហាង បណ្ដាលឲ្យបែកកញ្ចក់ខាងមុខខ្ទេច រួចនាំគ្នាជិះម៉ូតូគេចខ្លួនបាត់ស្រមោល បង្កឲ្យមានភ្ញាក់ផ្អើលកាលពីវេលាម៉ោង១០និង៥០នាទីយប់ ថ្ងៃទី១៩ ខែកុម្ភៈ ឆ្នាំ២០១៨ ស្ថិតនៅចំណុចភោជនីយដ្ឋាន និងខារ៉ាអូខេផ្ទះផាតធី តាមបណ្ដោយផ្លូវលេខ២៦១ ក្នុងសង្កាត់ទឹកល្អក់១ ខណ្ឌទួលគោក ។
តាមប្រភពព័ត៌មានពីកន្លែងកើតហេតុ បានប្រាប់ឲ្យដឹងថា គេឃើញបុរសបួននាក់ជិះម៉ូតូកង់បីមួយគ្រឿងម៉ាកបាចារ ពណ៌ក្រហម គ្មានស្លាកលេខ បានបើកមកឈប់ចតនៅចំណុចកើតហេតុខាងលើបាននាំគ្នាដើរចូលទៅផឹកស៊ីនៅក្នុងភោជនីយដ្ឋាន និងខារ៉ាអូខេផ្ទះផាតធី ។ លុះដល់ម៉ោងកើតហេតុ ស្រាប់តែលេចមុខក្មេងស្ទាវមួយក្រុមមានគ្នា៤នាក់ ជិះម៉ូតូពីរគ្រឿងមិនចាំម៉ាក បានមកសួរនាំបុគ្គលិកបម្រើការក្នុងហាងថា មានឃើញម្ចាស់ម៉ូតូកង់បីខាងលើនោះអត់ ភ្លាមនោះបុគ្គលិកហាងបានប្រាប់ថាគាត់កំពុងផឹកស៊ីនៅខាងក្នុង ។
បន្ទាប់ពីប្រាប់ហើយ ក្មេងស្ទាវទាំងនោះមិនបានសួរវែងឆ្ងាយទៀតទេ បានយកដុំថ្មដែលលាក់ទុកជាប់នឹងខ្លួនទៅធ្វើសក្មមភាពគប់ទៅលើម៉ូតូកង់បីចំកញ្ចក់ខាងមុខ បណ្តាលឲ្យបែក រួចហើយបាននាំគ្នាឡើងជិះម៉ូតូរត់គេចខ្លួនបាត់ស្រមោល ។
ក្រោយកើតហតុ សមត្ថកិច្ចមូលដ្ឋានបានចុះមកដល់កន្លែងកើតហេតុ បានឲ្យម្ចាស់ម៉ូតូកង់បីទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលសង្កាត់ទឹកល្អក់១ ដើម្បីឲ្យសមត្ថកិច្ចស្វែងរកមុខជនបង្កចាប់មកផ្តន្ទាទោសទៅតាមផ្លូវច្បាប់ ៕
ចែករំលែកព័តមាននេះ