ខេត្តបន្ទាយមានជ័យ ៖ គ្រួសារមួយដែលជាអាជីវករលក់មាស ប្តូរប្រាក់ ត្រូវបានចោរលួចគាស់បង្អួចផ្ទះចូលលួច អស់គ្រឿងអលង្ការ និងប្រាក់ជាច្រើនបង្កការភ្ញាក់ផ្អើលទាំងព្រឹកនៅស្រុកម៉ាឡៃ។ ហេតុការណ៍នេះបង្កការភ្ញាក់ផ្អើលនេះ កើតឡើងនៅថ្ងៃទី១៩ កុម្ភៈ ២០១៨ នៅភូមិថ្មី ឃុំ និងស្រុកម៉ាឡៃ ខេត្តបន្ទាយមានជ័យ នេះបើតាមប្រភពបង្ហើបឲ្យដឹង ពីកម្លាំងអាវុធហត្ថស្រុកម៉ាឡៃ។ គ្រួសាររងគ្រោះប្តីឈ្មោះ សៀង វុទ្ធី អាយុ៥១ឆ្នាំ ប្រពន្ធឈ្មោះ ហ្គេច ឃីម អាយុ៤៧ឆ្នាំ ជាអាជីវករលក់មាសនៅផ្សារភូមិដូង ក្នុងឃុំនិងស្រុកកើតហេតុ។
ប្រភពពីអាវុធហត្ថស្រុកម៉ាឡៃប្រាប់តាមទូរស័ព្ទ នៅរសៀលថ្ងៃដដែលនេះថា ករណីខាងលើពិតជាកើតមានមែន ហើយថាករណីចូលគាស់បង្អួចផ្ទះចូលលួច ទ្រព្យសម្បត្តិនេះគឺខណៈម្ចាស់ផ្ទះរវល់ទៅលក់ដូរនៅផ្សារខាងលើ។ សមត្ថកិច្ចដដែលបន្តថា យោងការសួរនាំម្ចាស់ផ្ទះ ប្រាប់ថា ទ្រព្យសម្បត្តិបាត់បង់រួមមានខ្សែកប្លាកទីនស២ខ្សែ ស្មើនឹង១.៣០០ដុល្លារ ខ្សែដៃដាំត្បូង១ខ្សែស្មើនឹង៦០០ដុល្លារ ចិញ្ជៀនដាំត្បូង៧វង់ស្មើនឹង២.០០០ដុល្លារ ប្រាក់ដុល្លារ១.១០០ដុល្លារ ប្រាក់ខ្មែរ១០លានរៀល។
សមត្ថកិច្ចបន្តថា ករណីលួចគាស់ផ្ទះនេះគឺចោរយកដំបងឈើគាស់ចង្រឹងបង្អួចហើយពេលចូលដល់ក្នុងផ្ទះជនរងគ្រោះចោរនោះឡើងពីបន្ទប់ទៅបន្ទប់មួយទៀតរហូត៣បន្ទប់ យកអស់គ្រឿងអលង្ការ និងប្រាក់ខាងលើតែម្តង។ សមត្ថកិច្ចប្រាប់ថាជនសង្ស័យ បន្សល់ទុកដំបងឈើដែលគាស់បង្អួចនៅកន្លែងកើតហេតុ។ សមត្ថកិច្ចប្រាប់ថា មកទល់ម៉ោងជិត៥ល្ងាចថ្ងៃដដែលនេះ មិនទាន់មានតម្រុយណាមួយនៅឡើយទេ ប៉ុន្តែសមត្ថកិច្ចកំពុងដុតដៃដុតជើងចុះស្រាវជ្រៀវដើម្បីរកជនសង្ស័យ៕
ចែករំលែកព័តមាននេះ