ប្រទេសចិន ៖ រយៈពេលប៉ុន្មានឆ្នាំចុងក្រោយនេះ រដ្ឋាភិបាលចិនពង្រឹងឥតឈប់ឈរវត្តមានសេដ្ឋកិច្ចរបស់ខ្លួននៅគ្រប់ទិសទីនៃពិភពលោក ។ ផ្លូវរថភ្លើងមួយខ្សែត្រូវបានចិនកសាងនៅអាមេរិកខាងត្បូង រោងចក្រ SILICE មួយបង្កើតនៅបារាំង បណ្តាញហេដ្ឋារចនាសម្ព័ន្ធមហាសាលមួយកសាងនៅអាហ្វ្រិក…
ប្រទេសចិន ៖ រយៈពេលប៉ុន្មានឆ្នាំចុងក្រោយនេះ រដ្ឋាភិបាលចិនពង្រឹងឥតឈប់ឈរវត្តមានសេដ្ឋកិច្ចរបស់ខ្លួននៅគ្រប់ទិសទីនៃពិភពលោក ។
ផ្លូវរថភ្លើងមួយខ្សែត្រូវបានចិនកសាងនៅអាមេរិកខាងត្បូង រោងចក្រ SILICE មួយបង្កើតនៅបារាំង បណ្តាញហេដ្ឋារចនាសម្ព័ន្ធមហាសាលមួយកសាងនៅអាហ្វ្រិក ។ នេះគ្រាន់ជាឧទាហរណ៍មួយចំនួនប៉ុណ្ណោះ ។ តើចិនកំពុងតែបោះជំហានយ៉ាងវែងមួយ រួចហើយមែនទេ?
ពីអាស៊ីដល់អាមេរិកខាងត្បូង ពីអាហ្វ្រិកទៅអឺរ៉ុប អាជ្ញាធរចិនបានបោះទុនវិនិយោគច្រើនពាន់លានដុល្លារ សំដៅអនុវត្តបណ្តាគម្រោងធំៗជុំវិញពិភពលោក ។
ក្នុងក្របខណ្ឌនៃគម្រោងយ៉ាងធំកសាងផ្លូវសូតថ្មីចិនមានបំណងចំណាយប្រាក់១០ពាន់លានដុល្លារ សម្រាប់កសាងបណ្តាញផ្លូវដែកមួយមានប្រវែងដល់ជាង៥.០០០គីឡូម៉ែត្រ ដែលភ្ជាប់ប្រទេសប្រេស៊ីលទៅកាន់ឆ្នេរសមុទ្រប៉េរូដោយឆ្លងកាត់ព្រៃអាម៉ាហ្សូន ។
សរុបដូចការប្រកាសរបស់នាយករដ្ឋមន្ត្រីចិន កាលពីខែមករា ឆ្នាំ២០១៥ ក្រុងប៉េកាំងមានបំណងវិនិយោគទឹកប្រាក់ដល់២៥០ពាន់លានដុល្លារ ក្នុងប្រទេសនោះរយៈពេល១០ឆ្នាំខាងមុខ ។
ម្យ៉ាងវិញទៀត មហាសេដ្ឋីចិន លោកវ៉ាង ជីញ បានស្នើកសាងព្រែកជីកមួយមានប្រវែង២៧០គីឡូម៉ែត្រកាត់ប្រទេសនីការ៉ាហ្គា ។
ទ្វីបអាហ្វ្រិកជាចំណុចមួយទៀតដែលរដ្ឋាភិបាលចិនផ្តោតខ្លាំង ។ កាលពីខែមករា ឆ្នាំ២០១៥ ក្រុងប៉េកាំងបានចុះហត្ថលេខាលើអនុស្សរណៈមួយជាមួយសហភាពអាហ្វ្រិកសំដៅកសាងបណ្តាញដឹកជញ្ជូនមួយរវាងប្រទេសទាំង៥៤នៃទ្វីបអាហ្វ្រិក ។ បណ្តាញនេះនឹងរួមមានបណ្តាផ្លូវដែក ក្នុងនោះមានបណ្តាញផ្លូវដែកសម្រាប់រថភ្លើងលឿន បណ្តាព្រលានយន្តហោះ ព្រមទាំងផ្លូវថ្នល់ទាំងឡាយ ។ គម្រោងទាំងនេះកំពុងតែអនុវត្តដោយបណ្តាកុងត្រាមានទឹកប្រាក់ច្រើនពាន់លានដុល្លារ ត្រូវបានចុះហត្ថលេខា ដើម្បីកសាងបណ្តាញផ្លូវដែកនៅនីហ្សេរីយ៉ា កេនយ៉ា អេត្យូពី និងនៅឆាដ ។ លើសពីនេះ ចិនមានបំណងកសាងកំពង់ផែទំនើបនៅទីក្រុងដាអេសសាឡឹមប្រទេសតង់សានី ក្រុងម៉ាពូតូម៉ូហ្សំប៊ិក ក្រុងលីប្រឺវីលប្រទេសហ្គាបុង ក្រុងតឺម៉ាប្រទេសហ្គាណា និងក្រុងដាកា ប្រទេសសេណេហ្គាល់ ។
នៅអាស៊ីអាគ្នេយ៍ក៏រដ្ឋាភិបាលចិនក៏ផ្តោតខ្លាំងដែរ ។ ក្រុងប៉េកាំងបានប្តេជ្ញាជីកព្រែកជីកមួយកាត់តំបន់ ISTHME DE KRA ប្រទេសថៃ ។ គម្រោងនេះអាចឱ្យចំណេញផ្លូវដឹកជញ្ជូនបានដល់ទៅ១.០០០គីឡូម៉ែត្រ បើប្រៀបធៀបទៅនឹងផ្លូវទឹកធ្វើពាណិជ្ជកម្មបច្ចុប្បន្នដែលឆ្លងកាត់តាមច្រកម៉ាឡាកា ជាកន្លែងមានសកម្មភាពពួកចោរសមុទ្រ ។
ម្យ៉ាងវិញទៀត ចិនមានបំណងកសាងកំពង់ផែទឹកជ្រៅមួយនៅ KUANTAN ប្រទេសម៉ាឡេស៊ី ហើយពង្រីកកំពង់ផែ MALE នៅប្រទេសម៉ាល់ឌីវ ។ ទុនវិនិយោគនឹងមានដល់៥១១ពាន់លានដុល្លារ ។
នៅប្រទេសហ្វ៊ីដជី អាជ្ញាធរចិនផ្តោតលើគម្រោងធំមួយទៀតគឺបង្កើតមជ្ឈមណ្ឌលវារី
អគ្គិសនីមួយមានតម្លៃ១៥៨លានដុល្លារ ។ នៅប្រជុំកោះសាម៉ាវចិននឹងកសាងមន្ទីរពេទ្យធំមួយមានទឹកប្រាក់ប្រមាណ១០០លានដុល្លារ ៕
ចែករំលែកព័តមាននេះ