រាជធានីភ្នំពេញ ៖ បុរសម្នាក់ ជាអ្នកបើកបររថយន្តតាក់ស៊ីម៉ែត្រក្រហម បានត្រូវចោរប្រើល្បិចហៅឲ្យដឹក ដោយប្រាប់ថា ទៅរង់ចាំទទួលប្រពន្ធរបស់ខ្លួន ប៉ុន្តែតាមពិតគឺជាល្បិចនាំយកទៅរឹតកនិងកាប់ប្លន់យករថយន្តទៅវិញ ។ អំពើប្លន់នេះ…
រាជធានីភ្នំពេញ ៖ បុរសម្នាក់ ជាអ្នកបើកបររថយន្តតាក់ស៊ីម៉ែត្រក្រហម បានត្រូវចោរប្រើល្បិចហៅឲ្យដឹក ដោយប្រាប់ថា ទៅរង់ចាំទទួលប្រពន្ធរបស់ខ្លួន ប៉ុន្តែតាមពិតគឺជាល្បិចនាំយកទៅរឹតកនិងកាប់ប្លន់យករថយន្តទៅវិញ ។ អំពើប្លន់នេះ បណ្តាលឲ្យបើកតាក់សុីរងរបួសធ្ងន់ និងត្រូវជនល្មើសច្រានទម្លាក់ពីលើរថយន្តរួចហើយព្យាយាមឡើងកាច់ចង្កូតបើករត់គេចខ្លួន លុះពេលដឹងថា រថយន្តនោះមានភ្ជាប់ប្រព័ន្ធជីភីអេស ហើយមានអ្នកតាមទៀតនោះ ក៏យករថយន្តមកប្លុងចោលហើយរត់គេចខ្លួនបាត់ស្រមោល ។
ហេតុការណ៍នេះ បង្កឲ្យមានការភ្ញាក់ផ្អើលឡើង កាលពីវេលាម៉ោង១១និង៣០នាទីយប់ថ្ងៃទី១៧ កុម្ភៈ ចំថ្ងៃចូលឆ្នាំចិន-វៀតណាមស្ថិតនៅតាមផ្លូវបេតុងកែងនឹងផ្លូវរថភ្លើង ក្នុងភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ ។ ជនរងគ្រោះឈ្មោះ ញា៉ញ់ សុខគា ភេទប្រុស អាយុ២១ឆ្នាំ ស្នាក់នៅផ្ទះជួលក្នុងភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ មានស្រុកកំណើតនៅភូមិទួលទទឹង ឃុំទួលទទឹង ក្រុងព្រះសីហនុ ខេត្តព្រះសីហនុ ជាអ្នកបើករថយន្តតាក់ស៊ីម៉ែត្រ ពណ៌ក្រហម ម៉ាកកាមរីបាឡែន ពាក់ផ្លាកលេខ ភ្នំពេញ ២AF-៦២៣៧ ។
ប្រភពព័ត៌មានពីបងប្រុសរបស់ជនរងគ្រោះឲ្យដឹងថា នៅវេលាម៉ោង១០យប់ថ្ងៃនោះ រូបគាត់បានទូរស័ព្ទទៅប្អូនឲ្យមកដឹកម៉ូយម្នាក់នៅម្តុំផ្សាររាត្រី តែប្អូនបានប្រាប់មកវិញថា ជាប់រវល់ដឹកម៉ូយទៅខណ្ឌឫស្សីកែវ ហើយមួយសន្ទុះក្រោយមក ប្អូនប្រុសបានទូរស័ព្ទមកប្រាប់វិញថា គេឲ្យនៅរង់ចាំយកប្រពន្ធរបស់គេទៀត ។ លុះដល់ម៉ោងជាង១១យប់ គាត់បានទូរស័ព្ទទៅទៀត តែអត់មានអ្នកលើកទទួល ក៏មានភ្ញាក់ផ្អើលឡើង ។
ប្រភពព័ត៌មានពីអ្នកនៅកន្លែងកើតហេតុឲ្យដឹងថា ពួកគាត់ឃើញរថយន្តមួយគ្រឿងនេះឈប់នៅកន្លែងខាងលើជាង១ម៉ោងដោយអ្នកបើកបរប្រាប់ថា រង់ចាំដឹកប្រពន្ធរបស់ម៉ូយ ។ លុះពេលមានការភ្ញាក់ផ្អើលទើបដឹងថា នោះគឺជាល្បិចរបស់ចោរដែលបានរៀបគម្រោងទុកជាមុន រហូតដល់មានឱកាសល្អក៏យកខ្សែហ្វ្រាំងម៉ូតូរឹត.កអ្នកបើកបរផ្ទប់ជាប់ជាមួយកៅអីរថយន្ត ។ ទោះជាយ៉ាងណា ជនរងគ្រោះរើបម្រះរហូតចេញក្រៅរថយន្តបាន និងមានការប្រវាយប្រតប់គ្នា តែត្រូវចោរយកកាំបិតបុ័ងតោដែលលាក់ទុកជាប់នឹងខ្លួន កាប់ជាច្រើនកាំបិត ត្រូវក្បាលនិងដៃបណ្តាលឲ្យប្រកាច់នៅខាងក្រៅរថយន្ត រួចហើយចោរក៏ឡើងបើករថយន្តគេចខ្លួនយ៉ាងប្រញាប់ ។
ភ្លាមៗនោះ អ្នកឃើញហេតុការណ៍បានទាក់ទងទៅសមត្ថកិច្ចចុះមកដល់ រួចហៅរថយន្តសង្គ្រោះបន្ទាន់របស់គ្លីនីកពន្លឺ ដឹកយកទៅសង្គ្រោះភ្លាមៗព្រមទាំងស្រែកតាមវិទ្យុទាក់ទងឲ្យមត្ថកិច្ចគ្រប់ខណ្ឌចុះជួយអន្តរាគមន៍ ។ លុះកម្លាំងសមត្ថកិច្ចខណ្ឌដូនពេញ ចេញអន្តរាគមន៍និងល្បាត ក៏ប្រទះឃើញរថយន្តខាងលើត្រូវចោរបើកយកទៅប្លុងចោលនៅផ្លូវលេខ៦១ ក្នុងខណ្ឌដូនពេញ ចំណែកចោររត់គេចខ្លួនបាត់ ។ រថយន្តតាក់សុីម៉ែត្រដែលត្រូវចោរប្លន់នេះ មានភ្ជាប់ប្រព័ន្ធជីភីអេស និងមានប្រព័ន្ធវិទ្យុទាក់ទងរបស់ក្រុមហ៊ុនតាក់ស៊ីផងដែរ ។
ក្រោយពេលកើតហេតុ សមត្ថកិច្ចខណ្ឌដូនពេញបានទាក់ទងទៅខាងខណ្ឌឫស្សីកែវ ឲ្យមកយករថយន្តទៅរក្សាទុក និងធ្វើកំណត់ហេតុដាក់ពាក្យបណ្តឹងដើម្បីឲ្យសមត្ថកិច្ចកំណត់មុខសញ្ញាឈានដល់ការចាប់ខ្លួនជនល្មើសមកដាក់ទោសទៅតាមច្បាប់ ។ នេះជាសំណាងមួយដែរដែលចោរមានតែម្នាក់តទល់ បើមាន២នាក់រួមកម្លាំងគ្នានោះ អ្នកបើកតាក់ស៊ីរូបនេះប្រហែលជាបាត់បង់ជីវិតមិនខាន ៕
ចែករំលែកព័តមាននេះ