ខេត្តក្រចេះ ៖ ក្រុមមន្ត្រីនៃមន្ទីរទេសចរណ៍ខេត្តក្រចេះបាននិយាយថា មានភ្ញៀវទេសចណ៍ជាតិ និងអន្តរជាតិប្រមាណជាង២ម៉ឺននាក់ បានមកលេងកម្សាន្តនៅតាមរមនីយដ្ឋាននានានៅក្នុងខេត្តក្រចេះក្នុងអំឡុងថ្ងៃបុណ្យចូលឆ្នាំប្រពៃណីចិន-វៀតណាមមានរយៈពេល៣ថ្ងៃ ។
ក្នុងនោះរមណីយដ្ឋានទឹកជួរទន្លេមេគង្គព្រែកកាំពីដែលមានទីតាំង ក្នុងឃុំសំបុក ស្រុកចិត្របុរីត្រូវបានគេកត់សម្គាល់ឃើញថា គឺទទួលបានភ្ញៀវចូលមកលេងកម្សាន្តច្រើនជាងគេ ។
រមណីយដ្ឋានទឹកជួរទន្លេមេគង្គព្រែកកាំពីត្រូវបានអាជ្ញាធរឱ្យជាប់ចំណាត់ថ្នាក់លេខ១ នៃតំបន់អេកូទេសចរណ៍នៅប៉ែកឥសាន្តនៃប្រទេសកម្ពុជា ។ រមនីយដ្ឋានមួយនេះ គឺមានចម្ងាយជាង១៥គីឡូម៉ែត្រពីទីរួមខេត្ត ។
មន្ត្រីនៃមន្ទីរទេសចរណ៍ខេត្តបានឲ្យដឹងទៀតថា ក្រៅពីរមនីយដ្ឋានទឹកជួរទន្លេមេគង្គកាំពីដែលទទួលបានអត្រាភ្ញៀវទៅងូតទឹកលេង និងទទួលទានអារហារមានចំនួនយ៉ាងច្រើនកុះករច្រើនជាងគេជាមួយគ្នានោះក៏មានរមនីយដ្ឋានរមនីយដ្ឋានឆ្នេរខ្សាច់កោះទ្រង់ដែលជាតំបន់ទេចរណ៍កែច្នៃក៏ទទួលបានកំណើនភ្ញៀវទៅលេងយ៉ាងច្រើនកុះករផងដែរ ។ ក្រៅពីនោះក៏នៅមានតំបន់ទេសចរណ៍អន្លង់ផ្សោត ទេសចរណ៍ប្រវត្តិសាស្ត្រ នៅស្រុកសំបូរ ។
យោងតាមរបាយការរបស់មន្ទីរទេសចរណ៍ខេត្តក្រចេះបានបង្ហាញថា រយៈពេល៣ថ្ងៃក្នុងឱកាសបុណ្យចូលឆ្នាំប្រពៃណីចិន-វៀតណាម គិតចាប់ពីថ្ងៃទី១៦ខែកុម្ភៈ រហូតដល់ថ្ងៃទី១៨ ខែកុម្ភៈខេត្តក្រចេះ ទទួលបានភ្ញៀវទេសចរណ៍ចូលមកលេងកម្សាន្តចំនួន២៧២៨០នាក់ បើធៀបរយៈពេលបីថ្ងៃដូចគ្នាក្នុងឆ្នាំ២០១៧ កើនឡើង២០០១នាក់ ស្មើរ៧,៨៤ភាគរយ ហើយអាត្រានេះត្រូវបានអាជ្ញាធរចាត់ទុកថាមានកម្រិតខ្ពស់ជាងឆ្នាំមុន ។
ភ្ញៀវទេសចរណ៍មានចំនួនជាង២ម៉ឺននាក់ដែលបានចូលមកលេងកម្សាន្តតាមបណ្តាលរមណីយដ្ឋានទេសចរណ៍ និងសហគមន៍អេកូទេសចរណ៍នានាក្នុងខេត្តភាគច្រើនភ្ញៀវទាំងនោះបានសម្រុកនាំគ្នាចូលមកលេងកម្សាន្តនៅតំបន់ទេសចរណ៍ទឹកជួរទន្លេមេគង្គកាំពី ។
បើទោះបីជាស្ថានភាពផ្លូវឆ្ពោះទៅកាន់តំបន់ទេសចរណ៍មួយនេះមានសភាពតូចចង្អៀតនិងហុយបន្តិចក្តីតែក្នុងឱកាសបុណ្យចូលឆ្នាំប្រពៃណីចិន-វៀតណាម គឺស្ថានភាពភ្ញៀវទេសចរណ៍បានធ្វើដំណើរតាមមធ្យោបាយរៀងខ្លួនបញ្ជ្រៀតគ្នាឆ្ពោះទៅលេងនៅតំបន់រមណីយដ្ឋានមួយនេះនៅតាមបណ្តោយផ្លូវជាប់ និងដងទន្លេមេគង្គ ។
ជាមួយនឹងអត្រាភ្ញៀវទេសចរណ៍ប្រមាណជាង២ម៉ឺននាក់ ដែលបានចូលមកលេងនៅខេត្តក្រចេះរយៈពេលបីថ្ងៃក្នុងឱកាសបុណ្យចូលឆ្នាំប្រពៃណីចិន-វៀតណាម អាជ្ញាធរខេត្តក៏បានរៀបចំកម្លាំង ដើម្បីត្រៀមការពារក៏ដូចជាសង្គ្រោះ ចំណែកនៅតាមដងផ្លូវគរបាលរាចរណ៍ក៏ជួយសម្រួលចរាចរណ៍ទៅមកនៅតាមតំបន់រមនីយដ្ឋានជាច្រើនជូនភ្ញៀវដែលបានចូលមកលេងកម្សាន្តនៅខេត្តក្រចេះផងដែរ ៕
ចែករំលែកព័តមាននេះ