ខេត្តព្រះសីហនុ ៖ យ៉ាងហោចណាស់ ក៏មានបុរសជនជាតិចិនចំនួន៩នាក់ ត្រូវបានសមត្ថកិច្ចនគរបាលខេត្ត ឃាត់ខ្លួនភ្លាមៗបញ្ជូនទៅកាន់ស្នងការដ្ឋាននគរបាលខេត្ត បន្ទាប់ពីពួកគេបានឈ្លោះប្រកែកនិងវាយតប់គ្នា បង្កហិង្សាលើជនជាតិខ្មែរនៅពីរទីតាំងផ្សេងគ្នាក្នុងថ្ងៃតែមួយ កាលពីវេលាម៉ោង១០យប់ម្តង និងម៉ោង១០និង៣០នាទីយប់ថ្ងៃទី១៧…
ខេត្តព្រះសីហនុ ៖ យ៉ាងហោចណាស់ ក៏មានបុរសជនជាតិចិនចំនួន៩នាក់ ត្រូវបានសមត្ថកិច្ចនគរបាលខេត្ត ឃាត់ខ្លួនភ្លាមៗបញ្ជូនទៅកាន់ស្នងការដ្ឋាននគរបាលខេត្ត បន្ទាប់ពីពួកគេបានឈ្លោះប្រកែកនិងវាយតប់គ្នា បង្កហិង្សាលើជនជាតិខ្មែរនៅពីរទីតាំងផ្សេងគ្នាក្នុងថ្ងៃតែមួយ កាលពីវេលាម៉ោង១០យប់ម្តង និងម៉ោង១០និង៣០នាទីយប់ថ្ងៃទី១៧ កុម្ភៈម្តងចំថ្ងៃចូលឆ្នាំចិន ។
ជុំវិញករណីនេះសមត្ថកិច្ចមូលដ្ឋានសង្កាត់លេខ៣ បានគូសបញ្ជាក់ថា មិនដល់មួយម៉ោងផងជនជាតិចិនចំនួន៩នាក់ ត្រូវបានកម្លាំងពិសេសនៃស្នងការដ្ឋាននគរបាលខេត្តធ្វើការឃាត់ខ្លួនជាបន្តបន្ទាប់នៅទីតាំងចំនួនពីរផ្សេងគ្នា ក្រោយពីពួកគេផឹកស៊ីស្រវឹងឈ្លោះប្រកែកគ្នា ហើយបានបង្កជាហិង្សាទៅលើជនជាតិខ្មែរបង្កឱ្យរងរបួសចំនួន២នាក់ ។
ប្រភពដដែលបានបន្តថា ករណីទី១ សមត្ថកិច្ចបានឃាត់ខ្លួនជនជាតិចិនចំនួន៤នាក់ បន្ទាប់ពីពួកគេបានដេញកាប់ជនជាតិខ្មែរ នៅវេលាម៉ោង២២ នៅចំណុចហាងផឹកស៊ីយីហោ៧ស្កាយស្ថិតក្នុងភូមិ៣ សង្កាត់លេខ២ ក្រុងព្រះសីហនុ ក្រោយពីពួកគេមានកំហឹងទៅលើយុវជនជនជាតិខ្មែរដែលអង្គុយផឹកក្បែរគ្នាដែលធាក់កៅអីក្នុងហាង ។ ការដេញកាប់ពីសំណាក់ជនជាតិចិននេះបានធ្វើឱ្យយុវជនខ្មែរនោះភ័យ បានរត់មកចូលផ្ទះនៅសង្កាត់លេខ៣ និងបណ្តាលឱ្យរងរបួសដោយកាប់ត្រូវត្រង់ចង្កេះពីក្រោយ ។
បន្ទាប់មកប្រមាណជិត៣០នាទីយប់ថ្ងៃដដែលក៏មានជនជាតិចិនមួយក្រុមផ្សេងទៀត បានឈ្លោះប្រកែកគ្នា ក្នុងហាងផឹកស៊ីមួយកន្លែង គ្មានស្លាកយីហោ ត្រង់ចំណុចភូមិ៣ សង្កាត់លេខ៣ ក្រុងព្រះសីហនុ(មុខបុរីម៉ារីអូ) គឺជាជម្លោះរវាងជនជាតិចិនដូចគ្នា បានរាលដាលមកដល់ជនជាតិខ្មែរ ដោយភាគីម្ខាងទំនងស្រវឹងបានស្ទុះទៅវាយជនជាតិខ្មែរ ដែលជិះម៉ូតូក្បែរកន្លែងកើតហេតុ ។ ក្រោយមកសមត្ថកិច្ចមូលដ្ឋានក៏បានចុះអន្តរាគមន៍ តែជនជាតិចិននោះពុំបានស្តាប់នោះទេ បានប្រវាយប្រតប់ចង់តដៃជាមួយសមត្ថកិច្ចថែមទៀត រហូតកម្លាំងពិសេសរបស់ស្នងការមកដល់ទើបបង្ក្រាបក្រុមជនជាតិចិនទាំងនោះបានចំនួន៥នាក់នាំទៅកាន់ស្នងការដ្ឋានដើម្បីចាត់ការតាមផ្លូវច្បាប់ ។
សូមបញ្ចាក់ផងដែរថា កាលពីយប់ថ្ងៃ១៥ កុម្ភៈ នៅក្រុងព្រះសីហនុដែលជាថ្ងៃសែនចិនក៏មានជនជាតិចិនចំនួន២ក្រុមផ្សេងគ្នាបានបង្កអុកឡុកផងដែរ ដោយករណីទី១បានវាយតប់ជាមួយក្រុមសន្តិសុខក្លិបកម្សាន្តស្កាយឡាញ ឃាត់ខ្លួនមនុស្សជិត១០នាក់ ។ ករណីទី២ជនជាតិចិនមួយក្រុមបានទៅរករឿងស្ត្រីបម្រើការក្នុងសណ្ឋាគារមួយ រហូតធ្វើឱ្យស្វាមីរបស់ស្ត្រីនោះទ្រាំមិនបាន ក៏បានយកកាំបិតប៉័ងតោដេញកាប់ចំនួន៣កាំបិតបណ្តាលឱ្យរងរបួសម្នាក់ ។ បានកត់សម្គាល់ថា ចិនដែលមានបញ្ហាត្រូវចាប់ខ្លួននេះសុទ្ធតែចិនមកតាំងទីលំនៅថ្មី ៕
ចែករំលែកព័តមាននេះ