ខេត្តស្ទឹងត្រែង ៖ យោងតាមរបាយការរបស់មន្ទីរទេសចរណ៍ខេត្តស្ទឹងត្រែងបានបញ្ជាក់ថា គិតត្រឹមរយៈ៣ថ្ងៃគឺថ្ងៃទី១៦ដល់ល្ងាចថ្ងៃទី១៨ ខែកុម្ភៈ ឆ្នាំ២០១៨ នាពិធីចូលឆ្មាំថ្មីប្រពៃណីចិន-វៀតណាម ភ្ញៀវជាតិ និងអន្តរជាតិប្រមាណជាង១ម៉ឺន៥ពាន់នាក់បានចូលមកកំសាន្តនៅតំបន់រមណីយដ្ឋាន និងសហគមន៍ទេសចរណ៍មួយចំនួន ។
លោក អ៊ន ប៉ាសឿន ប្រធានមន្ទីរទេសចរណ៍ឱ្យដឹងថា ដោយសារខេត្តស្ទឹងត្រែងជាខេត្តមួយអំណោយផលទៅលើផ្នែកទេសចរណ៍បែបអេកូទេសចរណ៍ទើបទទួលបានការទាក់ទាញពីភ្ញៀវជាតិ និងអន្តរជាតិ ។ ក្នុងនោះយើងការបានការផ្សព្វផ្សាយអំពីសក្តានុពលមួយចំនួនដែលមានទេសភាពល្អនោះដែរ ។
លោកបន្តថា នៅតំបន់ទេសចរណ៍នីមួយៗមានការតុបតែងតាមបែបធម្មជាតិទីកន្លែងអង្គុយលេងកម្សាន្តមានសង់ជាឃ្យុះដាច់ដោយឡែក និងជាប់គ្នាជាខ្សែប្របមាត់ទឹកដ៏ត្រជាក់ដែលក្មេងក៏អាចចុះលេងបានព្រមទាំងមានការលក់បាយម្ហូប និងភេជ្ជៈគ្រប់ប្រភេទ រួមទីកន្លែងសម្រាប់ចតយានយន្តធំទូលាយដងដែរ ។ ក្រៅពីនោះមន្ទីរបានរៀបចំបង្គន់អនាម័យ និងធុងដាក់សម្រាមក្រោយភ្ញៀវពិសារភោជនីយអាហារួចអាចវេចខ្ចប់ទៅដាក់ក្នុងធុងដើម្បីរួមចំណែកសម្អាតបរិស្ថានថែមទៀត ។
លោកប្រធានមន្ទីរទេសចរណ៍ដដែលបន្តថា នៅថ្ងៃទី១នៃពិធីបុណ្យចូលឆ្នាំថ្មីប្រពៃណីចិន-វៀតណាមតាមតំបន់ទេសចរណ៍ និងសហគមន៍ទេសចរណ៍ទទួលបានភ្ញៀវជាតិ និងអន្តរជាតិ៤០៦០នាក់ បន្ទាប់មកសរុបរួមរយៈពេល៣ថ្ងៃចាប់ពីថ្ងៃទី១៦ដល់ថ្ងៃទី១៨ ខែកុម្ភៈ ២០១៨ ទទួលបានចំនួន១៥២៥០នាក់បើធៀបក្នុងឆ្នាំ២០១៧មានការកើនឡើងចំនួន១៣១៤នាក់ ស្មើនឹង៩,៤២ភាគរយ ៕
ចែករំលែកព័តមាននេះ