ខេត្តបាត់ដំបង ៖ យុវជនម្នាក់បានស្លាប់ភ្លាមៗនៅនឹងកន្លែងកើតហេតុ ឬឯ២នាក់ទៀតរងរបួសធ្ងន់ ដោយសារជិះម៉ូតូបុកគ្នាទាំងកំរោល កាលពីវេលាម៉ោង១០និង១៥នាទីព្រឹក ថ្ងៃ១៩ ខែកុម្ភៈ នៅលើផ្លូវជាតិលេខ៥ ត្រង់ចំណុចភូមិកាច់រទេះ ឃុំកំពង់ព្រៀង ស្រុកសង្កែ ។
មន្ត្រីចរាចរណ៍បានឲ្យដឹងថា ករណីគ្រោះថ្នាក់ចរាចរណ៍នេះ បានកើតឡើងរវាងម៉ូតូម៉ាកដាឌ្រីម ពាក់ស្លាកលេខ បាត់ដំបង ១X-៦៣៥៤ ជាមួយម៉ូតូម៉ាកហុងដាឌ្រីម ពាក់ស្លាកលេខ បាត់ដំបង ១V-២១៣៨ ដែលធ្វើដំណើរក្នុងទិសដៅបញ្ច្រាសទិសគ្នា ។ មន្ត្រីដដែលបានប្រាប់ថា ភាគីម្ខាងជិះម្នាក់ឯងក្នុងទិសដៅពីលិចទៅកើត ហើយពេលដល់ចំណុចខាងលើ ក៏បានរេចង្កូតចូលឆ្លងទ្រូងថ្នល់ ជ្រុលទៅបុកអ្នកជិះម៉ូតូមួយគ្រឿងទៀត ដែលជិះឌុបគ្នាពីរនាក់ ដែលធ្វើដំណើរផ្ទុយទិសគ្នា ចំពូមុខពេញទំហឹង បណ្ដាលឲ្យដួល និងធ្វើឲ្យភាគីម្ខាងដែលជិះម្នាក់ឯងស្លាប់នៅនឹងកន្លែង ខណៈភាគីជិះ២នាក់រងរបួសជាទម្ងន់ ។
បើតាមការបំភ្លឺពីសាក្សីបានប្រាប់សមត្ថកិច្ចថា អ្នកជិះម៉ូតូទាំង២ភាគីបានជិះម៉ូតូលឿនដូចគ្នា ហើយបានជិះបុកគ្នាទាំងកំរោលដោយសារខ្វះការប្រុងប្រយ័ត្ន និងជិះដោយសារជិះបែបព្រហើនផង ។ សាក្សីបានបញ្ជាក់ថា ភាគីម្ខាងដែលជិះម្នាក់ឯង ជិះលឿនដូចហោះលុះពេលដល់ចំណុចកើតហេតុ ក៏ជ្រុលទៅបុកភាគីម្ខាងទៀតដែលជិះ២នាក់ទើបនាំឲ្យស្លាប់ខ្លួនឯងបែបនេះ ។
មន្ត្រីចរាចរណ៍ដែលចុះពិនិត្យទីតាំងកើតហេតុបាននិយាយថា ក្រោយពីបានស្រាវជ្រាវ គឺជនរងគ្រោះដែលស្លាប់ត្រូវគេស្គាល់ថាឈ្មោះ រិទ្ធ ដាលីន ប្រុសអាយុ១៨ឆ្នាំ រស់នៅភូមិព្រៃតូច ឃុំព្រៃតូច ស្រុកមោងឫស្សី ។
ចំណែកឯភាគីពីរនាក់ដែលរងរបួសធ្ងន់គេមិនទាន់ស្គាល់ឈ្មោះទេ តែគេដឹងថា ពួកគេរស់នៅឃុំតាលាស់ ស្រុកមោងឫស្សី ដូចគ្នា ។ ក្រោយពីបញ្ជួនអ្នករបួសទៅមន្ទីរពេទ្យ និងធ្វើការវាស់វែងកន្លែងកើតហេតុ មន្ត្រីជំនាញក៏បានប្រគល់សពទៅឲ្យក្រុមគ្រួសារយកទៅធ្វើបុណ្យ ហើយបាននាំយកមធ្យោបាយបង្កហេតុរបស់ភាគីទាំង២ទៅរក្សាទុកនៅអធិការស្រុកមោងឫស្សី ដើម្បីដោះស្រាយតាមផ្លូវច្បាប់ ៕
ចែករំលែកព័តមាននេះ