រាជធានីភ្នំពេញ ៖ គម្រោងជុសជុលផ្លូវដែកភាគខាងជើងប្រទេស ចាប់ពីក្រុងភ្នំពេញទៅប៉ោយប៉ែត ដែលមានប្រវែង៣៨៦គីឡូម៉ែត្រ គ្រោងនឹងបញ្ចប់ទាំងស្រុងនៅត្រឹមឆ្នាំ២០១៨។ នេះបើយោងតាមប្រធាននាយកដ្ឋានស្តីទីផ្លូវដែក ។ លោក អោក…
រាជធានីភ្នំពេញ ៖ គម្រោងជុសជុលផ្លូវដែកភាគខាងជើងប្រទេស ចាប់ពីក្រុងភ្នំពេញទៅប៉ោយប៉ែត ដែលមានប្រវែង៣៨៦គីឡូម៉ែត្រ គ្រោងនឹងបញ្ចប់ទាំងស្រុងនៅត្រឹមឆ្នាំ២០១៨។ នេះបើយោងតាមប្រធាននាយកដ្ឋានស្តីទីផ្លូវដែក ។
លោក អោក អ៊ួក ប្រធាននាយកដ្ឋានស្តីទីផ្លូវដែកនៃក្រសួងសាធារណការ និងដឹកជញ្ជូន បានមានប្រសាសន៍កាលពីថ្ងៃទី១៨ កុម្ភៈ ម្សិលមិញថា គម្រោងជុសជុលផ្លូវដែកភាគខាងជើងពីភ្នំពេញទៅប៉ោយប៉ែត រាជរដ្ឋាភិបាលគ្រោងដាក់ឱ្យបញ្ចប់នៅឆ្នាំ២០១៨នេះ ហើយផ្លូវនេះឆ្លងកាត់ខេត្តសក្តានុពលនៅឆ្ងាយពីក្រុងភ្នំពេញចំនួន៤ ក្នុងនោះមានខេត្តកំពង់ឆ្នាំង ពោធិ៍សាត់ បាត់ដំបង និងបន្ទាយមានជ័យ ។
បើតាមប្រធាននាយកដ្ឋានស្តីទីផ្លូវដែកថា ៖«កំណាត់ផ្លូវដែកភាគខាងជើងចាប់ពីប៉ោយប៉ែត មកសិរីសោភ័ណ បានបញ្ចប់ការជុសជុលរួចរាល់ហើយ ។ ចំណែកពីស៊ីសុផុន មកខេត្តបាត់ដំបងនឹងបញ្ចប់ក្នុងពេលឆាប់ៗខាងមុខ ហើយបន្តមកបញ្ចប់នៅខេត្តពោធិ៍សាត់នៅក្នុងអំឡុងខែមេសាឬឧសភា និងនៅខែកក្កដានិងសីហា នឹងបញ្ចប់មកដល់បាត់ដឹងក្នុងខេត្តកំពង់ស្ពឺ ព្រោះផ្លូវពីភ្នំពេញទៅបាត់ដឹង ប្រវែង៣២គីឡូម៉ែត្រនេះគេធ្វើរួចហើយ » ។
លោកគូសបញ្ជាក់ថា នៅពេលផ្លូវដែកភាគខាងជើងប្រទេសដាក់ឱ្យដំណើរការជាផ្លូវការ ពេលនោះ ការដឹកជញ្ជូនតាមផ្លូវដែកនឹងផ្តល់ផលប្រយោជន៍ច្រើនណាស់ ដូចជា តម្លៃនៃការដឹកជញ្ជូនធូរថ្លៃ, មានសុវត្ថិភាព និងកាត់បន្ថយគ្រោះថ្នាក់នៅលើដងផ្លូវ ។ អីចឹង ការដឹកជញ្ជូនតាមផ្លូវដែកនេះ វាមានផលប្រយោជន៍ធំធេងណាស់ ហើយដឹកបានច្រើនតោនទៀតក្នុង១ជើងៗ ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting មានប្រសាសន៍ថា ការនាំចេញអាចមានផលប្រយោជន៍មួយចំនួនទាក់ទងនឹងផលិតផលកសិកម្ម ដូចជា ស្រូវ និងដំឡូងមី ពីព្រោះការដឹកជញ្ជូនតាមផ្លូវគោកនាពេលបច្ចុប្បន្ន វាថ្លៃ ។
តាមលោកទីប្រឹក្សា ង៉ែត ជូ ថា ៖« នៅពេលផ្លូវដែកនេះដាក់ឱ្យដំណើរការ ទាក់ទងនឹងការធ្វើពាណិជ្ជកម្មរវាងកម្ពុជា-ថៃ នៅក្នុងរយៈពេលខ្លីនិងមធ្យម វាផ្តល់ឱកាសដល់ប្រទេសថៃច្រើន ព្រោះកម្ពុជាយើងមិនសូវមានផលិតផលសម្រេចដឹកជញ្ជូនទៅប្រទេសថៃច្រើននោះទេ គឺមានតែស្រូវអង្ករ ប៉ុន្តែនៅក្នុងរយៈពេលវែងជាចំណុចល្អ ហើយក៏អាចទាក់ទាញភ្ញៀវទេសចរបរទេសមកពីថៃ ឱ្យចូលមកទស្សនានៅកម្ពុជាបានមួយចំនួនផងដែរ » ។
លោក អោក អ៊ួក ប្រធាននាយកដ្ឋានស្តីទីផ្លូវដែក មានប្រសាសន៍ថា ៖« ឥឡូវនេះ យើងកំពុងធ្វើការស្របគ្នា គឺមានក្រុមការងារពិសេសមួយកំពុងរៀបចំកិច្ចព្រមព្រៀងដឹកជញ្ជូនឆ្លងកាត់ព្រំដែនកម្ពុជាជាមួយថៃ ។ កាលណាកិច្ចព្រមព្រៀងបានចុះហត្ថលេខាដោយរដ្ឋាភិបាលទាំងពីរប្រទេសហើយ យើងក៏មានការដឹកជញ្ជូនឆ្លងកាត់ព្រំដែន ។
អីចឹងគិតថា វាជារឿងមួយល្អណាស់ពាក់ព័ន្ធនឹងបញ្ហានេះ ព្រោះការដឹកជញ្ជូនតាមរទេះភ្លើង វាចំណេញច្រើនជាងការដឹកជញ្ជូនតាមឡាន ។ ការងារពិសេសមួយនេះ គេបានជួបគ្នាជាប្រចាំ ហើយគ្រោងដាក់ទៅរាជរដ្ឋាភិបាលត្រួតពិនិត្យ ដែលក្រុមការងារនេះបានរៀបចំកិច្ចព្រមព្រៀងជិតរួចរាល់ហើយដែរ » ៕
ចែករំលែកព័តមាននេះ