ខេត្តកំពង់ឆ្នាំង ៖ ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកស៊ីម៉ាក់មានប្រសាសន៍ថា គិតមកដល់ពេលនេះ ប្រទេសកម្ពុជាមានសុខសន្តិភាព មិនទាន់បាន២០ឆ្នាំពេញលេញនៅឡើយទេ…
ខេត្តកំពង់ឆ្នាំង ៖ ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកស៊ីម៉ាក់មានប្រសាសន៍ថា គិតមកដល់ពេលនេះ ប្រទេសកម្ពុជាមានសុខសន្តិភាព មិនទាន់បាន២០ឆ្នាំពេញលេញនៅឡើយទេ បើយើងគិតពីថ្ងៃទី២៩ ខែធ្នូ ឆ្នាំ១៩៩៨ ដែលជាថ្ងៃបានកំណត់ថា កម្ពុជាមានសុខសន្តិភាព ។
បើយើងប្រៀបធៀប ប្រទេសកម្ពុជាបានធ្លាក់ចូលភ្នក់ភ្លើងសង្គ្រាម រយៈពេល ៣៥ឆ្នាំ គឺនៅខុសគ្នាឆ្ងាយណាស់ ។ លោកមានប្រសាសន៍បែបនេះ នៅក្នុងពិធីបើកវគ្គ បណ្តុះបណ្តាល មូលដ្ឋានគ្រិះបច្ចេកទេសបោសសំអាតមីន ជំនាន់ទី១៣៤ និង១៣៥ នៅវិទ្យាស្ថានបច្ចេកទេសសកម្មភាពមីន ខេត្តកំពង់ឆ្នាំង នាព្រឹកថ្ងៃទី១៩ ខែកុម្ភៈ ឆ្នាំ២០១៨ ។
ឯកឧត្តមបានបន្តថា ប្រទេសកម្ពុជាបានផ្ទុះសង្គ្រាមពេញទំហឹងនៅឆ្នាំ១៩៧០ បន្ទាប់ពីមានការធ្វើរដ្ឋប្រហារ ប៉ុន្តែសង្គ្រាមស៊ីវិលបានកើតតាំងមុនពេលនោះមកម្លេះ ។ ពេលនោះហើយដែលកម្ពុជាបានរងការទម្លាក់គ្រាប់បែក និងនាំចូលអាវុធយុទ្ធភ័ណ្ឌយ៉ាងច្រើនពីកងទ័ពអាមេរិក ដែលគាំទ្រទាហានលន់ ណុល ។ សព្វថ្ងៃនេះ គ្រាប់មីន និងគ្រាប់មិនទាន់ផ្ទុះ រួម និងគ្រាប់បែកដែលទម្លាក់ពីយន្តហោះ កប់ក្នុងដីរាយប៉ាយទូទាំងប្រទេសកម្ពុជា នៅតែបង្កឲ្យប្រជាពលរដ្ឋរងគ្រោះជាបន្តបន្ទាប់ ។
ចំណែកថ្មីៗនេះ យើងបានរកឃើញគ្រាប់បែកទម្លាក់ពីយន្តដែលមានសារធាតុគីមី របស់សហរដ្ឋអាមេរិកទៀតផង ។ ឯកឧត្តមបានបញ្ជាក់ថា ថ្ងៃនេះ ប្អូនៗ ដែលជាកូនរបស់បុគ្គលិកស៊ីម៉ាក និងអតីតបុគ្គលិក CBD បានចូលមកទទួលការបណ្តុះបណ្តាល មូលដ្ឋានគ្រឹះបច្ចេកទេសបោសសំអាតមីន សូមយកចិត្តទុកដាក់ប្រឹងប្រែងរៀនសូត្រឲ្យបានល្អ ព្រោះថា បើយើងមិនខិតខំប្រឹងប្រែងសូត្រទេនឹងធ្លាក់ពីការសិក្សា មិនទទួលបានជាបុគ្គលិក ស៊ីម៉ាក់ពេញសិទ្ធឡើយ ។ ម្យ៉ាងវិញទៀត បើយើងប្រហេស យើងនឹងទទួលគ្រោះថ្នាក់ក្នុងពេលបំពេញភារកិច្ចដែរ ។ រយៈពេល២ខែនៃការសិក្សានៅពេលនេះគ្រាន់តែជាជំហាន បូងតែប៉ុណ្ណោះ ក្រោយពីបញ្ចប់វិទ្យាស្ថាននេះទៅប្អូនៗត្រូវដើរតាមក្រោយអ្នកជំនាញ ដើម្បីសិក្សាជាក់ស្តែងបន្ថែមទៀត រយៈពេលជាង១ឆ្នាំ ទើបមានជំនាញគ្រប់គ្រាន់ ដែលអាចបណ្តោយឲ្យធ្វើការងារនេះតែម្នាក់ឯងបាន ។ ជាមួយគ្នានេះដែរ ឯកឧត្តមហេង រតនា ក៏បានផ្តាំផ្ញើដាច់ខាត មិនត្រូវយកប្រាក់ទៅសូកគ្រូបង្ហាត់ ដើម្បីទទួលបាននិទ្ទេសល្អ ឬដើម្បីជាប់ក្នុងក្របខណ្ឌ ស៊ីម៉ាក់ជាដាច់ខាត ។
យោងរបាយការដែលអានដោយលោក អ៊ុំ សុជាតិ ប្រធានវិទ្យាស្ថានបច្ចេកទេសសកម្មភាពមីន ខេត្តកំពង់ឆ្នាំង បានឲ្យដឹងថា សិក្ខាកាមដែលមកទទួលវគ្គបណ្តុះបណ្តាលបច្ចេកទេសបោសសំអាតមីន ជំនាន់ទី ១៣៤-១៣៥ នៅពេលនេះមានចំនួន ៨១នាក់ ក្នុងនោះ ជាកូនបុគ្គលិកស៊ីម៉ាក ចំនួន៧៤នាក់ ស្រី១៨នាក់ និងអតីតបុគ្គលិក CBD ចំនួន៩នាក់ ដោយសិក្សារយៈពេល២ខែ ចាប់ពីថ្ងៃទី ១៩ ខែកុម្ភៈនេះតទៅ ៕
ចែករំលែកព័តមាននេះ