ខេត្តព្រៃវែង ៖ ទីតាំងដីមួយកន្លែងដែលស្ថិតនៅជាប់នឹងរបងសាលាឃុំជីផុច អតីតជាដីសាលាស្រុកមេសាង ហើយក្រោយមកត្រូវបានកាត់ប្រគល់ទៅឱ្យគណៈបក្សប្រជាជនស្រុកមេសាងជាអ្នកគ្រប់គ្រងនោះ ថ្មីៗនេះស្រាប់តែលិចឮព័ត៌មានមកថា ដីនេះត្រូវបានគេលក់ទៅឱ្យថៅកែផ្សារម្នាក់នៅស្រុកមេសាងនោះ ហើយពេលនេះគេកំពុងប្រើគ្រឿងចក្រឈូសឆាយយកធ្វើជាផ្សារទំនើប ។
មិនតែប៉ុណ្ណោះគេបានជីកយកអាចម៍ដីពីក្នុងព្រែកជីផុចដែលនៅខាងក្រោយសាលាឃុំមកចាក់លើដីធ្វើផ្សារនោះធ្វើឱ្យកើតទៅជារណ្តៅក្រហេងក្រហូងពេញក្នុងព្រែកថែមទៀតផង ។
លោក ព្រុំ សុខឿន មេឃុំជីផុចបានឱ្យដឹងថា កាលពីឆ្នាំ១៩៧០ដល់ឆ្នាំ១៩៧៥ ដីនេះគឺជាដីទួលសាធារណៈ ដែលមានព្រៃស៊ុបទ្រុប និងគ្មានមនុស្សរស់នៅទេ លុះចូលដល់សម័យ ប៉ុល ពត គេបានយកទីតាំងនេះធ្វើជាចំការកប្បាស់ និងជាកន្លែងស្លថ្នាំតែក្រោយបែករបបនេះមកគេក៏បានយកទីតាំងនេះធ្វើជាសាលាស្រុកមេសាង រហូតដល់ឆ្នាំ១៩៩០ ពេលដែលគេផ្លាស់ប្តូរសាលាស្រុកទៅនៅជាប់ផ្លូវធំ ទីតាំងបច្ចុប្បន្ននោះ ដីសាលាស្រុកចាស់នេះគេបានកាត់ប្លង់ ប្រគល់ទៅឱ្យគណៈបក្សប្រជាជនស្រុក ជាអ្នកគ្រប់គ្រងរហូតដល់បច្ចុប្បន្ន។
ដោយឡែករឿងគេប្រគល់ទៅឱ្យថៅកែផ្សារ ឈូសឆាយយកធ្វើអ្វីនោះលោកមិនដឹងទេ ហើយរឿងគេជីកយកអាចម៍ដីពីក្នុងព្រែកនោះ អ្នកមានសិទ្ធិអនុញ្ញាតិឱ្យគេជីកគឺខាងស្រុក ដូច្នេះសូមទៅសួរខាងស្រុកទៅទើបដឹង ៕
ចែករំលែកព័តមាននេះ