ខេត្តព្រះសីហនុ ៖ ក្នុងពិធីបុណ្យចូលឆ្នាំចិននៅខេត្តព្រះសីហនុ រយៈពេល៤ថ្ងៃ ចាប់ពីថ្ងៃទី១៥ ខែកុម្ភៈ ដល់ថ្ងៃទី១៨ ខែកុម្ភៈ ឆ្នាំ២០១៨ មានមនុស្សស្លាប់ចំនួន៣នាក់…
ខេត្តព្រះសីហនុ ៖ ក្នុងពិធីបុណ្យចូលឆ្នាំចិននៅខេត្តព្រះសីហនុ រយៈពេល៤ថ្ងៃ ចាប់ពីថ្ងៃទី១៥ ខែកុម្ភៈ ដល់ថ្ងៃទី១៨ ខែកុម្ភៈ ឆ្នាំ២០១៨ មានមនុស្សស្លាប់ចំនួន៣នាក់ និងរងរបួសចំនួន៦នាក់ ក្នុងនោះរបួសធ្ងន់៣នាក់និងរបួសស្រាល៣នាក់ ដោយគ្រោះថ្នាក់ចរាចរកើតឡើងចំនួន៥ករណី ។
លោកឧត្តមសេនីយ៍ត្រី អ៊ី សុខា ស្នងការរងទទួលបន្ទុកសណ្តាប់ធ្នាប់សាធារណៈ នគរបាលខេត្តព្រះសីហនុបានបញ្ចាក់ប្រាប់បណ្ដាញព័ត៌មានថា គ្រោះថ្នាក់នេះកើតឡើងភាគច្រើនតាមបណ្តោយផ្លូវជាតិលេខ៤ ក្នុងស្រុកព្រៃនប់ ហើយក្រៅពីមនុស្សស្លាប់ និងរបួស ក៏បណ្ដាលឲ្យខូចខាតរថយន្ត៣គ្រឿង និងខូចខាតម៉ូតូចំនួន៣គ្រឿង ។
បើតាមលោកស្នងការរងបញ្ជាក់បន្ថែមថា គ្រោះថ្នាក់ចរាចរដែលធ្វើឲ្យមានមនុស្សស្លាប់ និងរបួសនេះ បណ្ដាលមកពីកត្តាអ្នកបើកបរមិនប្រុងប្រយ័ត្ន បើកបរល្បឿនលឿន ចំណែកអ្នកជិះម៉ូតូមួយចំនួនមិនពាក់មួកសុវត្ថិភាព ។
សូមបញ្ចាក់ថា នៅក្នុងដើមខែកុម្ភៈ ឆ្នាំ២០១៨ រហូតមកដល់ថ្ងៃចូលឆ្នាំចិន-វៀតណាម គ្រោះថ្នាក់ចរាចរតាមបណ្ដោយផ្លូវជាតិលេខ៤ ក្នុងទឹកដីស្រុកព្រៃនប់ ខេត្តព្រះសីហនុ មានការកើនឡើងជាងខែមករា ឆ្នាំ២០១៨ ។ តាមរបាការណ៍នគរបានចរាចរណ៍ស្រុកព្រៃនប់ សម្រាប់ខែមករា ដើមឆ្នាំ២០១៨នេះ មានគ្រោះថ្នាក់ចរាចរ៩ករណី ក្នុងនោះបណ្តាលឲ្យមនុស្សស្លាប់ចំនួនចំនួន៥នាក់ ស្រី៣នាក់ របួសធ្ងន់ចំនួន៥នាក់ប្រុស និងមធ្យម២នាក់ ។ ហើយសម្រាប់ខែកុម្ភៈ ត្រឹមថ្ងៃទី១៩ នេះក្នុងស្រុកព្រៃនប់មានជាង១០ករណី ហើយបានបណ្ដាលឲ្យមនុស្សស្លាប់ និងរបួសធ្ងន់ស្រាល់ជិត២០នាក់ ។ តែយ៉ាងនេះក្តី ២ថ្ងៃចុងក្រោយ នៃចូលឆ្នាំចិននេះមិនមានករណីគ្រោះថ្នាក់ចរាចរឡើយ ៕
ចែករំលែកព័តមាននេះ