ខេត្តក្រចេះ ៖ ក្រោយជួបហេតុការណ៍លិចទូកនៅកណ្តាលទន្លេ នៅពេលនាំគ្នា១០នាក់ជិះកូនទូកឆ្លងទន្លេ ដើម្បីទៅលេងនៅឆ្នេrខ្សាច់នៅថ្ងៃបុណ្យចូលឆ្នាំចិន សាកសពយុវជន២នាក់ ដែលបានបាត់ខ្លួននៅក្នុងទន្លេត្រូវបាននគរបាលស្រុកឆ្លូង និងសាច់ញាតិចុះរុករកឃើញជាបន្តបន្ទាប់ នៅថ្ងៃទី១៩ ខែកុម្ភៈ ឆ្នាំ២០១៨ ក្រោយពីបានបាត់ខ្លួនក្នុងទឹករយៈពេល៣ថ្ងៃ ។
ហេតុការណ៍លិចទូកម៉ាស៊ីនតូចមួយដែលបង្កការភ្ញាក់ផ្អើល បានកើតឡើងកាលពីរសៀលថ្ងៃទី១៧ ខែកុម្ភៈ ឆ្នាំ២០១៨ នៅពេលដែលមានយុវជនជាសិស្សរៀននៅសាលាវិទ្យាល័យសិលាវេទីគាតឈន់ មានគ្នា១០នាក់ បាននាំគ្នាជិះកូនទូកម៉ាស៊ីនពីភូមិហាន់ជ័យទី២ ឃុំហាន់ជ័យ ស្រុកឆ្លូង ក្នុងគោលបំណងឆ្លងទៅកោះដើម្បីលេងឆ្នេរខ្សាច់ និងក៏បានជួបហេតុការណ៍លិចទូក ។
ក្នុងហេតុការណ៍នោះ បានបង្កឲ្យមានយុវជនជាសិស្ស២នាក់ ត្រូវបានបាត់ខ្លួននៅក្នុងទឹកទន្លេ ខណៈ៨នាក់ទៀតបានរួចផុតជីវិត នៅពេលដែលពួកគេបានជិះកូនទូកចេញពីច្រាំង ឆ្ពោះទៅកោះបានចម្ងាយជាង១០០ម៉ែត្រទៅហើយនោះ ។
ការលិចទូកនេះ ក៏ត្រូវបានយុវជនដែលជួបហេតុការណ៍បានប្រាប់មកនគរបាលថា បណ្តាលមកពីទូកតូច និងមានផ្ទុកមនុស្សលើសចំណុះ និងបានឃ្លោងលិចតែម្តង ។
ជុំវិញហេតុការណ៍នេះ អធិការនគរបាលស្រុកឆ្លូង លោកវរសេនីយ៍ឯក ឆុង តូរ៉ាន់ បានបញ្ជាក់ប្រាប់ឲ្យដឹងថា សកសពយុវជនទាំងពីរនាក់ ត្រូវបានកម្លាំងនគរបាល និងសាច់ញាតិបានរុករកឃើញបានជាបន្តបន្ទាប់ក្រោយបានបាត់ខ្លួន ក្នុងហតុការណ៍លិចទូករយៈពេល៣ថ្ងៃ ។ យុវជនរងគ្រោះទាំងពីរនាក់នេះមាន ទី១.ឈ្មោះ រឿន សុធារិទ្ធ អាយុ១៧ឆ្នាំ និងទី២.ឈ្មោះ វ៉ាន់ ពុទ្ធនិរន្ទ៍ អាយុ១៨ឆ្នាំ ពួកគេទាំងពីរនាក់មានទីលំនៅភូមិជ្រោយថ្មក្រោម ឃុំឆ្លូង ស្រុកឆ្លូង ខេត្តក្រចេះ ។
លោកអធិការបញ្ជាក់ឲ្យដឹងទៀតថា នគរបាលបានពិនិត្យឃើញថា សាកសពរបស់យុវជនរងគ្រោះ គឺពិតជាបានស្លាប់ដោយសារលង់ទឹកពិតប្រាកដមែន ៕
ចែករំលែកព័តមាននេះ