ខេត្តសៀមរាប ៖ ស្ត្រីវ័យក្មេងម្នាក់ បានជិះរថយន្តក្រុងពីស្រុកសូទ្រនិគម មកកាន់ស្នងការដ្ឋាននគរបាលខេត្ត ដើម្បីប្តឹងភរិយាលោកអធិការនគរបាលស្រុកសូទ្រនិគម ពីករណីគំរាមកំហែងវ៉ៃខ្នោះ ប្រមាថចាប់ដាក់គុក និងចាក់សោមិនឱ្យចូលផ្ទះ ដោយគ្រាន់តែរឿងជំពាក់លុយ២លានរៀលប៉ុណ្ណោះ ។ ហេតុការណ៍នេះ បង្កឲ្យមានការភ្ញាក់ផ្អើលនៅមុខស្នងការដ្ឋានខេត្ត កាលពីថ្ងៃទី១៦ ខែកុម្ភៈ ។ ស្ត្រីដែលមកប្តឹងប្រពន្ធអធិ ការនគរបាលស្រុកសូទ្រនិគមនេះឈ្មោះ ម៉ៅ ណែត អាយុ២២ឆ្នាំ រស់នៅភូមិបុស្ស ឃុំដំដែក ស្រុកសូទ្រ និគម ។
ស្ត្រីរូបនេះនិយាយថា កាលពីរសៀលថ្ងៃទី១៥ កុម្ភៈ ថា អ្នកស្រីពៅ ប្រពន្ធលោក ណុបសារ៉ាក់ អធិការនគរបាលស្រុកសូទ្រនិគម បានហៅកម្លាំងនគរបាលមួយក្រុមមកផ្ទះជួលរបស់នាង និងយករថយន្តមកបិទមុខផ្ទះ ព្រមទាំងយកសោថ្មីមកចាក់មិនឱ្យនាងចូលផ្ទះ ។ មិនតែប៉ុណ្ណោះ ថែមទាំងគំរាមចាប់នាងដាក់ខ្នោះទៀតផង ដោយគ្រាន់តែរឿងនាងជំពាក់លុយចំនួន២លានរៀលប៉ុណ្ណោះ ។ ស្ត្រីវ័យក្មេងរូបនេះរៀបរាប់ទៀតថា រឿងជំពាក់លុយនោះនាងព្រមសងហើយ ប៉ុន្តែអ្នកស្រី ប្រពន្ធលោកអធិការនោះវិញ គឺទារទៅតាមអ្វីដែលគាត់បានកំណត់ ក្នុងមួយថ្ងៃត្រូវបង់ឱ្យគាត់២ម៉ឺនរៀល។ ពេលនោះ នាងក៏ព្រមសងទៅតាមការកំណត់នោះ ប៉ុន្តែបែរជាប្រពន្ធលោកអធិការនៅតែមិនព្រមទៀត ដោយចង់ចាក់សោមិនឱ្យនាងចូលផ្ទះនិងគំរាមចាប់វ៉ៃខ្នោះទៀតបើមិនព្រមសងលុយ ។
ស្ត្រីរូបនេះនិយាយថា ដោយសារតែហេតុនេះហើយទើបរូបនាងកើតទុក្ខមិនសុខចិត្ត និងសម្រេចចិត្តមកប្តឹងនៅស្នងការដ្ឋាននគរបាលខេត្ត ពីបទគំរាមកំហែងវ៉ៃខ្នោះនិងមិនឱ្យនាងចូលផ្ទះ ។ ចំពោះករណីនេះ នាងសូមទាមទារសំណងជំងឺចិត្តចំនួន៤ពាន់ដុល្លារ ព្រមទាំងសុំឱ្យសមត្ថកិច្ចចាត់ការទៅតាមផ្លូវច្បាប់ ។ចំណែកប្រភពពីមន្ត្រីនគរបាលស្រុកសូទ្រនិគមមួយរូបសូមមិនបញ្ចេញឈ្មោះនិយាយថា ករណីរឿងជំពាក់លុយគឺត្រូវសងលុយ មិនមែនចេះតែដើរជេរ ឬប្រមាថចាប់វ៉ៃខ្នោះ ចាក់សោផ្ទះគេតាមតែអំពើចិត្តរបស់ខ្លួននោះទេ ។ បើតាមច្បាប់វិញ ជំពាក់លុយគឺជារឿងរដ្ឋប្បវេណីមិនមែនព្រហ្មទណ្ឌទេ គ្រាន់តែរឿងលុយ២លានរៀល
សោះធ្វើឱ្យប្តីខ្មាសគេពេញស្រុកតែម្តង ហេតុតែមានលុយចង់ធ្វើអ្វីស្រេចតែចិត្ត ។
ជុំវិញករណីចោទប្រកាន់ខាងលើនេះដែរ កោះសន្តិភាពមិនអាចសុំការពន្យល់ពីលោកវរសេនីយ៍ឯក ណុប សារ៉ាក់ អធិការនគរបាលស្រុកសូទ្រនិគមបានទេ នៅព្រឹកថ្ងៃទី១៧ ខែកុម្ភៈ។ ទាក់ទងនឹងករណីខាងលើនេះដែរ លោកវរសេនីយ៍ឯក ហង្ស សុផាតភារម្យ នាយការិយាល័យនគរបាលព្រហ្មទណ្ឌកម្រិតស្រាលខេត្ត
បានឱ្យដឹងថា លោកបានទទួលបញ្ជាពីលោកស្នងការឱ្យចុះទៅពិនិត្យដល់ស្រុកសូទ្រនិគមឱ្យបានជាក់ស្តែង ដើម្បីជួយរកភាពយុត្តិធម៌ជូនប្រជាពលរដ្ឋ ។ លោកបន្តថា រឿងនោះពិតជាមានករណីអុីចឹងមែន ហើយលោកកំពុងស្រាវជ្រាវឱ្យច្បាស់សិន ទើបចាត់ការ ។
មិននឹកស្មានថា ជំពាក់លុយត្រឹម២លានរៀលសោះ ហេតុអ្វីក៏ធ្វើឲ្យកើតមានបញ្ហារំលោភបំពានបែបនេះ ។ បើនិយាយឲ្យចំទៅ វាធ្វើឲ្យប៉ះពាល់ដល់មុខមាត់ប្តីដែលជាអធិការនគរបាល និងជាអ្នកអនុវត្តច្បាប់។ ពិត ជាមានការសោកស្តាយដែលការស្វែងរកការបំភ្លឺពីសំណាក់លោកអធិការ ឬភរិយារបស់លោកមិនអាចទាក់ទងបាន ៕
ចែករំលែកព័តមាននេះ