ខេត្តកំពង់ចាម ៖ អាជ្ញាធរខេត្តកំពុងចាម បានឲ្យដឹងថា ការប្រារព្វពិធីបុណ្យចូលឆ្នាំចិន-វៀតណាម នៅខេត្តកំពង់ចាម របស់បងប្អូនដែលមានជាប់សែស្រឡាយចិន-វៀតណាម បានប្រព្រឹត្តិទៅដោយក្តីសប្បាយរីករាយ និងសុវត្ថិភាព ដោយមានការយកចិត្តទុកដាក់ និងបង្កលក្ខណៈងាយស្រួល ពីសមត្ថកិច្ច ដែលជាការផ្តល់ឱកាសដល់ប្រជាពលរដ្ឋធ្វើពិធីតាមប្រពៃណីទំនៀមទំលាប់ និងជំនឿរៀងៗខ្លួន ។
ចាប់ពីថ្ងៃដំបូង នៃពិធីបុណ្យចូលឆ្នាំចិន-វៀតណាម ថ្ងៃទី១៥ ខែកុម្ភៈ ឆ្នាំរហូតមកដល់ថ្ងៃទី១៨ កុម្ភៈ ឆ្នាំ២០១៨ នេះ ស្ថានភាពសន្តិសុខ និងសណ្តាប់ធ្នាប់ទូទាំងខេត្ត មិនមានអ្វីកើតឡើងគួរឲ្យកត់សម្គាល់នោះទេ គឺមានតែគ្រោះថ្នាក់ចរាចរណ៍បន្តិចបន្ទួច តែមិនបណ្តាលឲ្យបាត់បង់ជីវិតនោះទេ នៅតាមតំបន់កម្សាន្តនានា ដូចជាស្ពានកោះប៉ែនមានភ្ញៀវទេសចរណ៍ទៅកម្សាន្តច្រើនពាន់នាក់ និងបងប្អូនខ្លះទៀតបានជួបជុំបងប្អូនគ្រួសារ ឪពុកម្តាយ សែនព្រេនតាមផ្ទះរៀងៗខ្លួន ទៅតាមប្រពៃណីទំនៀមទំលាប់ ប្រកបដោយភាពសប្បាយរីករាយ ។
ទាក់ទិន្នទៅនឹងពិធីបុណ្យចូលឆ្នាំខាងលើនេះ លោក គួច ចំរើន អភិបាលខេត្តកំពុងចាមបានឲ្យដឹងថា ថ្វីត្បិតតែបុណ្យនេះ មិនមែនជាបុណ្យចូលឆ្នាំថ្មីប្រពៃណីជាតិខ្មែរ តែអាជ្ញាធរគណៈបញ្ជាការឯកភាពខេត្ត បានយកចិត្តទុកដាក់លើកកម្ពស់ការពង្រឹងសន្តិសុខ សណ្តាប់ធ្នាប់ របៀបរៀបរយសាធារណៈជូនបងប្អូនមិនថាតាមលំនៅដ្ឋាន, ទីផ្សារនានាក៏ដូចតំបន់កម្សាន្តជាច្រើនកន្លែងទៀត ធ្វើឲ្យបទល្មើសនានាពុំមានកើតឡើងគួរកត់សម្គាល់នោះទេ គឺមានតែគ្រោះថ្នាក់ចរាចរណ៍បន្តិចបន្ទួច តែមិនបណ្តាលឲ្យមនុស្សបាត់បង់ជីវិតនោះទេ ខៈណៈប្រជាពលរដ្ឋជាច្រើនពាន់នាក់ ។
លោកបន្តថា លទ្ធផលទាំងនេះ បង្ហាញឲ្យឃើញពីការចូលរួមរបស់បងប្អូនប្រជាពលរដ្ឋ ក៏ដូចអាជ្ញាធរដែនដីក្នុងការអនុវត្តយ៉ាងខ្ជាប់ខ្ជួនតាមសេចក្តីណែនាំរបស់រដ្ឋបាលខេត្តកំពង់ចាម ក្នុងគោលបំណងរួមចំណែករក្សាសន្តិសុខ សុវត្ថិភាព និងរបៀបរៀបរយសាធារណៈឲ្យបានល្អប្រសើរ ។
យោងតាមឯកសារបានបង្ហាញថា បុណ្យចូលឆ្នាំចិន ជាថ្ងៃឈប់សម្រាកដ៏សំខាន់បំផុតសម្រាប់ជនជាតិចិន មានប្រជាជនចិននៅក្រៅប្រទេសបានហៅពិធីបុណ្យនេះថា បុណ្យចូលឆ្នាំច័ន្ទគតិថ្មី ជាប្រពៃណីពិធីបុណ្យនេះ ចាប់ផ្តើមនៅថ្ងៃទី០១ នៃខែទី០១តាមច័ន្ទគតិក្នុងប្រតិទិនចិន ហើយបញ្ចប់ទៅវិញនៅថ្ងៃទី១៥ ដែលគេហៅថាពិធីបុណ្យបង្ហោះគោម ពេលល្ងាចនៅថ្ងៃបុណ្យចូលឆ្នាំចិន ត្រូវបានគេឲ្យឈ្មោះថា ជូស៊ី ពាក្យនេះមានន័យថា ពេលល្ងាចឆ្លងឆ្នាំ ។
ពិធីបុណ្យចូលឆ្នាំចិន ត្រូវបានចាត់ទុកថា ជាថ្ងៃដ៏វិសេសវិសាល និងមានសារសំខាន់សម្រាប់ប្រជាជនចិន ហើយវាក៏មានឥទ្ធិពលទៅលើពិធីបុណ្យចូលឆ្នាំថ្មីរបស់ប្រទេសជិតខាងផងដែរ ជាពិសេសចំណងវប្បធម៌ជាមួយប្រជាជនដែលជនជាតិចិនធ្វើអន្តរកម្មជាមួយ ។ ក្នុងឱកាសបុណ្យចូលឆ្នាំចិនទូទាំងខេត្តកំពង់ចាមឆ្នាំនេះ គេបានកត់សម្គាល់ឃើញថា ប្រជាពលរដ្ឋស្ទើរតែ១០០ភាគរយ បានធ្វើពិធីអបអរសាទរ និងទទួលបុណ្យចូលឆ្នាំចិន ទៅតាមជំនឿ និងទំនៀមទំលាប់ ទាំងនេះបានបង្ហាញឲ្យឃើញពីកម្រិតជីវភាពរបស់ប្រជាពលរដ្ឋកាន់តែប្រសើរឡើង ប្រជាពលរដ្ឋមានឱកាសប្រកបរបរចិញ្ចឹមជីវិត ក្នុងសុខសន្តិភាពក្រោមការដឹកនាំរបស់រាជរដ្ឋាភិបាលកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាប្រមុខដឹកនាំប្រកបដោយឧត្ដមកិត្តិ ៕
ចែករំលែកព័តមាននេះ