រាជធានីភ្នំពេញ ៖ គេបានប្រទះឃើញកុមារាម្នាក់ អង្គុយនៅស្ថានីយប្រេងសូគីម៉ិចម៉ង់ៗតែម្នាក់ឯង ដោយអង្គុយនៅទីងងឹតមានមូសរោមខាំគួរឱ្យអាណិតបានរាយការណ៍ប្រាប់សមត្ថកិច្ចចុះមកអន្តរាគមន៍ កាលពីវេលាម៉ោង១១យប់ថ្ងៃទី១៧ កុម្ភៈ ។ ហេតុការណ៍នេះ កើតឡើងនៅចំណុចស្ថានីយប្រេងសូគីម៉ិចច្រមុះជ្រូកក្បាលថ្នល់ក្នុងសង្កាត់ផ្សារដើមថ្កូវ…
រាជធានីភ្នំពេញ ៖ គេបានប្រទះឃើញកុមារាម្នាក់ អង្គុយនៅស្ថានីយប្រេងសូគីម៉ិចម៉ង់ៗតែម្នាក់ឯង ដោយអង្គុយនៅទីងងឹតមានមូសរោមខាំគួរឱ្យអាណិតបានរាយការណ៍ប្រាប់សមត្ថកិច្ចចុះមកអន្តរាគមន៍ កាលពីវេលាម៉ោង១១យប់ថ្ងៃទី១៧ កុម្ភៈ ។ ហេតុការណ៍នេះ កើតឡើងនៅចំណុចស្ថានីយប្រេងសូគីម៉ិចច្រមុះជ្រូកក្បាលថ្នល់ក្នុងសង្កាត់ផ្សារដើមថ្កូវ ខណ្ឌចំការមន ។
តាមការសាកសួរកុមារានេះប្រាប់ថាឈ្មោះ ឆៃ ប៊ុនឈីន អាយុ១០ឆ្នាំ មានស្រុកកំណើតនៅក្រុងព្រះសីហនុបានរៀបរាប់ប្រាប់អ្នកយកព័ត៌មានឱ្យដឹងថា មានឪពុកឈ្មោះ ដាំ ដូង និងម្ដាយឈ្មោះ យឹម សុភា ហើយរូបគេមានបងប្អូនចំនួន៣នាក់ ប្រុស២ស្រី១ ឯខ្លួនជាកូនទី២ ។ កុមារារូបនេះនិយាយថា រូបគេត្រូវបានឪពុកម្តាយ នាំពីក្រុងព្រះសីហនុមកដល់ភ្នំពេញរយៈពេល៤ថ្ងៃកន្លងមកហើយ ដោយសាររូបគេពេលដែលឪពុកម្តាយប្រើទៅទិញស្ករ បានប៊ីចេង ឬក៏ទៅទិញនេះបាននោះ ព្រោះសតិមិនសូវចាំ ធ្វើឲ្យឪពុកម្តាយមិនពេញចិត្ត ទើបឪពុកម្តាយបាននាំរូបគេ ជិះរថយន្តតាក់ស៊ី ពីក្រុងព្រះសីហនុមកភ្នំពេញ ចំណែកបងប្អូន២នាក់ទៀតមិនបានយកមកជាមួយទេ ។ ក្មេងនេះ និយាយថា ពេលជិះឡានមកដល់ភ្នំពេញ ចុះពីលើឡានម៉ែឪបានឲ្យរូបគេដើរពីមុខ លុះពេលដើរបានបន្តិច ស្រាប់តែបាត់ឪពុកម្តាយរកលែងឃើញ ហើយរូបគេក៏ចេះតែដើរទៅអត់ដឹងទៅណាទេ ពេលឃ្លានសុំអីគេហូប យប់កន្លែងណាដេកកន្លែងនោះ ។
សមត្ថកិច្ចបានប្រាប់ថា បន្ទាប់ពីប្រជាពលរដ្ឋប្រទះឃើញក្មេងខាងលើអង្គុយយំ និងមានមូសរោមខាំពេញខ្លួនទាំងកណ្តាលអធ្រាត្របែបនេះ ក៏បានចុះទៅសួរនាំទើបសន្និដ្ឋានថា ក្មេងប្រុសនេះសង្ស័យ ត្រូវបានឪពុកម្តាយយកមកបោះបង់ចោល ក៏បានដឹកយកទៅសម្រាកនៅប៉ុស្តិ៍នគរបាលផ្សារដើមថ្កូវ ដើម្បីជួយសង្គ្រោះដោយក្តីមេត្តា ។តាមប្រភពព័ត៌មានចុងក្រោយឱ្យដឹងថា ក្មេងប្រុសរូបនេះត្រូវវិទ្យុក្នុងស្រុកមួយនាំទៅថែរក្សាគាំពារ និងមិនដឹងថា តើពិតជាឪពុកម្តាយបំបរបង់ចោលឬក៏បែបណានោះនៅឡើយទេ ។
ទោះបីជាយ៉ាងនេះក្តី វាពិតជារឿងចម្លែកមួយគួរឱ្យមានការភ្ញាក់ផ្អើលដែលឪពុកម្តាយដាច់ចិត្តយកកូនមកបោះបង់ចោលបែបនេះ ។ តាមពិតទៅចេតនាបែបនេះ វាគួរតែកើតមានកាលពីរាប់សិបឆ្នាំមុន ក្រោយរំដោះចេញពីរបបប៉ុល ពត ។ ប៉ុន្តែបច្ចុប្បន្ននេះ មានមជ្ឈមណ្ឌល មានផ្នែកសមត្ថកិច្ចអាចធានារ៉ាប់រងបាន មិនគួរនាំកូនមកបោះចោលដូចសំរាមនោះទេ មិនខ្វះទេមណ្ឌលទទួល ប្រសិនបើឪពុកម្តាយមានចេតនាត្រឹមត្រូវនោះ ។
ចែករំលែកព័តមាននេះ