ខេត្តកំពង់ចាម ៖ ក្នុងឱកាសបុណ្យចូលឆ្នាំថ្មីប្រពៃណី-ចិន-វៀតណាមក្នុងរយៈពេលចាប់ពីថ្ងៃទី១៥ កុម្ភៈ ដល់ទី១៨ កុម្ភៈ ឆ្នាំ២០១៨ នៅតាមបណ្តាស្រុក-ក្រុងទាំង១០ ពុំមានសភាពការណ៏អ្វីកើតឡើងគួរឲ្យកត់សំគាល់នោះឡើយ ។ ដោយសារតែកម្លាំងសមត្ថកិច្ចត្រូវបានដាក់ពង្រាយតាមទីតាំងសំខាន់ៗដើម្បីទប់ស្កាត់បទល្មើសនានា ដែលកើតឡើងជាយថាហេតុណាមួយនោះទាំងនេះគឺមានការយកចិត្តទុកដាក់ពីសំណាក់លោកអភិបាលខេត្តផងដែរ ។
លោកឧត្តមសេនីយ៏ត្រី ហេង សម្បត្តិ ស្នងការរងនគរបាលខេត្តឲ្យដឹងថា សភាពការណ៏កើតឡើងតែ១លើកបទមជ្ឈឹមប្រៀបធៀបឆ្នាំ២០១៧ស្មើគ្នា(១/១) គឺករណីប្រើអំពើហិង្សាដោយយុវជន២ក្រុមវាយគ្នាទៅវិញទៅមកបណ្តាលឲ្យរបួសម្នាក់ត្រូវបានបញ្ជូនទៅសង្គ្រោះនៅមន្ទីរពេទ្យខេត្ត ។ បង្ក្រាបជាក់ស្តែង១ករណីឃាត់ខ្លួនប្រុសម្នាក់(បទមជ្ឈឹម ) គឺករណីហិង្សាដោយចេតនាកាលពីរថ្ងៃទី១៥ ខែកុម្ភៈ នៅស្រុកចំការលើ ។
ឃាត់ខ្លួនអប់រំក្មេងស្ទាវ២នាក់ប្រុស ពីបទជិះម៉ូតូបង្កភាពអណាធិបតេយ្យនៅតាមដងផ្លូវនៅក្នុងក្រុងកំពង់ចាម ។ បង្ក្រាបល្បែងស៊ីសងបញ្ជល់មាន់នៅភូមិបឹងបាសាក់ សង្កាត់សំបួរមាស ក្រុងកំពង់ចាម ដកហូតម៉ូតូ២គ្រឿង និងកន្លែងបញ្ជល់មាន់នៅស្រុកជើងព្រៃអ្នកលេងរត់គេចខ្លួនអស់ ។ អនុវត្តន៏ដីកាចាប់ខ្លួនបាន៣ដីការបស់សាលាដំបូងខេត្តកំពង់ចាម ហើយបទល្មើសគ្រឿងញៀនបង្ក្រាបបានចំនួន០២ករណីឃាត់ខ្លួន៩នាក់ កាលពីថ្ងៃទី១៥ កុម្ភៈ ភូមិកំពង់ត្រុំលើ ឃុំកោះមិត្ត ស្រុកកំពង់សៀម ដកហូតម៉ូតូ១គ្រឿង រថយន្ត១គ្រឿង អាវុធខ្លី១ដើម ។ គ្រោះថ្នាក់ចរាចរណ៏កើតឡើង១លើកថ្ងៃទី១៧ កុម្ភៈ នៅស្រុកបាធាយប្រៀបធៀប២០១៧ថយចុះ៤លើក(១/៥) បណ្តាលឲ្យរបួសមនុស្ស៣នាក់។
កាលពីវេលាម៉ោង៧ព្រឹកថ្ងៃទី១៦ កុម្ភៈ នៅត្រង់ចំណុចខាងកើតផ្សារផ្អាវ ឃុំផ្អាវ ស្រុកបាធាយ មានអគ្គីភ័យមួយកើតឡើងដោយបានឆេះរោងម៉ាស៊ីនកិនស្រូវ របស់ឈ្មោះ ឡ អៀងឃីម ភេទប្រុស អាយុ៤៣ឆ្នាំ ដោយបានប្រើប្រាស់ទឹកអស់ចំនួន៣រថយន្តមូលហេតុដោយសារតែទុស្សេខ្សែភ្លើង ។ ហើយបណ្តាលឲ្យមានការខូចខាតឆេះអស់តំលៃ២៥.០០០ដុល្លារ ឆេះឈើបាឡែត សម្រាប់កល់អង្ករចំនួន១០ដុំផងដែរ ៕
ចែករំលែកព័តមាននេះ