រាជធានីភ្នំពេញ ៖ បុរសម្នាក់ស្រវឹងជោកជាំ បើកបររថយន្តមួយគ្រឿងបោះពួយយ៉ាងលឿនជ្រុលទៅគូទរថយន្តដឹកគ្រឿងចាក់មួយគ្រឿងទៀត ដែលកំពុងឈប់ចាំស្តុប បណ្តាលឲ្យបុរសម្នាក់រងរបួសរយៈក្បាល ហេតុការណ៍នេះបង្កឲ្យមានការភ្ញាក់ផ្អើលឡើងកាលពីវេលាម៉ោង១០និង២០នាទីយប់ថ្ងៃទី១៨ ខែកុម្ភៈ ឆ្នាំ២០១៨ត្រង់ចំណុចខាងមុខសាលាបឋមសិក្សាទួលគោក តាមបណ្តោយផ្លូវ២៨៩កែងនឹងផ្លូវ៥៦៦ ស្ថិតក្នុងសង្កាត់បឹងកក់ទី១ ខណ្ឌទួលគោក ។
ព័ត៌មានពីកន្លែងកើតហេតុបានប្រាប់ឲ្យដឹងថា នៅមុនពេលកើតហេតុគេឃើញបុរសពីរនាក់ បើកបររថយន្តមួយគ្រឿង ពណ៌ស ពាក់ស្លាកភ្នំពេញ ៣B-១៧៦៩ ធ្វើដំណើរតាមបណ្តោយផ្លូវ២៨៩ ក្នុងទិសដៅពីជើងទៅត្បូង ។ លុះមកដល់ចំណុចកើតហេតុដែលជាចំណុចភ្លើងស្តុបរថយន្តមិនបានឈប់ ដើម្បីរង់ចាំស្តុបពណ៌បៃតង់ដែលជាភ្លើងអតិភាពទេ ខណៈពេលនោះស្រាប់តែមានរថយន្តបង្កមួយគ្រឿងពណ៌ទឹកប្រាក់ ពាក់ស្លាកលេខភ្នំពេញ ២AP-៥៩៧៣ បើកបរដោយបុរសម្នាក់ក្នុងស្ថានភាពស្រវឹងជោកជាំ មកពីក្រោយក្នុងល្បឿនយ៉ាងលឿនដូចហោះ រួចក៏ជ្រុលទៅបុកគូទរថយន្តខាងលើចំពីក្រោយពេញទំហឹង បណ្តាលឲ្យរថយន្តបង្កកៀបក្បាលជាប់គូទរថយន្តរងគ្រោះរងការខូចខាតផ្នែកខាងមុខយ៉ាងដំណំ ។
រីឯនាក់បើកបររថយន្តរងរបួសរយៈក្បាលសន្លប់ស្តួកស្តឹងត្រូវបានរថយន្តសង្គ្រោះបន្ទាប់ដឹកយកទៅសង្គ្រោះនៅគ្លីនិកពន្លឺ ចំណែកឯរថយន្តរងគ្រោះរងការខូចខាតបន្តិចបន្តួច ។
ក្រោយពេលកើតហេតុសមត្ថកិច្ចមូលដ្ឋានបានចុះមកដល់ចំណុចកើតហេតុ និងបានទាក់ទងហៅឲ្យចុះមកធ្វើការវាស់វែងយករថយន្តទាំងពីរគ្រឿង ទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋានរាជធានីភ្នំពេញ ដើម្បីរង់ចាំធ្វើការដោះស្រាយគ្នានៅពេលក្រោយ ៕
ចែករំលែកព័តមាននេះ