រាជធានីភ្នំពេញ ៖ បុរសម្នាក់ស្រវឹងបើកម៉ូតូត្រូវរថយន្តទេសចរណ៍បុកបណ្តាលឲ្យស្លាប់ពេលបញ្ជូនទៅមន្ទីរពេទ្យបានពាក់កណ្តាលផ្លូវ កាលពីវេលាម៉ោង០២និង៣០នាទីរំលងអធ្រាត្រ ឈានចូលថ្ងៃទី១៩ ខែកុម្ភៈ ឆ្នាំ២០១៨ តាមបណ្តោយផ្លូវជាតិលេខ៤ ទល់មុខអគ្គបញ្ជាការដ្ឋានកងទ័ពជើងគោក ភូមិអង្គ សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
ជនរងគ្រោះមានឈ្មោះ ស៊ូ បូន ភេទប្រុស អាយុ៣០ឆ្នាំ មុខរបរជាងភ្លើង រស់នៅសង្កាត់កំបូល ខណ្ឌពោធិ៍សែនជ័យ មានស្រុកកំណើត នៅភូមិត្នោតជំ ឃុំអូសារ៉ាយ ស្រុកត្រាំកក់ ខេត្តតាកែវ ។ ជិះម៉ូតូរងគ្រោះម៉ាកហុងដាឌ្រីម ស៊េរី២០១៧ ពណ៌ខ្មៅ ពាក់ស្លាកលេខ ភ្នំពេញ ១GE-៥៥៤៣ បើកបរក្នុងទិសដៅពីកើតទៅលិច ។ រថយន្តបង្កជារថយន្តទេសចរណ៍ម៉ាកហីយ៉ាន់ដាយ ពណ៌សលាយក្រហម ពាក់ស្លាកលេខ ភ្នំពេញ ៣E-១៤៧៤ បើកបរក្នុងទិសដៅពីលិចទៅកើតក្នុងល្បឿនលឿន ។
តាមប្រភពព័ត៌មានពីកន្លែងកើតហេតុបាននិយាយថា នៅមុនពេលកើតហេតុ គេឃើញជនរងគ្រោះជិះម៉ូតូម៉ាកហុងដាឌ្រីម ស៊េរី២០១៧ ពណ៌ខ្មៅ បើកក្នុងទិសដៅពីកើតទៅលិចក្នុងស្ថានភាពស្រវឹង ដោយជិះកណ្ដាលផ្លូវ បន្ទាប់មកស្រាប់តែឃើញរថយន្ដបង្កម៉ាកហ៊ីយ៉ាន់ដាយ ប្រភេទរថយន្តទេសចរណ៍ បើកបរក្នុងទិសដៅពីលិចទៅកើត បញ្ច្រាសទិសគ្នា ។
ប្រភពបានបន្តទៀតថា ខណៈពេលជនរងគ្រោះជិះដល់កណ្តាលផ្លូវ ដោយរថយន្តបើកបួងចង្កូតទៅផ្នែកខាងឆ្វេងមិនផុត បានបុកចំផ្នែកខាងស្តាំពេញទំហឹង បណ្តាលឲ្យជនរងគ្រោះខាងលើរងរបួសធ្ងន់ដកដង្ហើមចង្រិត ហើយភ្លាមៗនាក់បើកបររថយន្តខាងលើបានចុះពីលើរថយន្ត ហើយរត់គេចខ្លួនបាត់ស្រមោល ចំណែកភ្ញៀវទេសចរបានចុះ ហើយឡើងរថយន្តផ្សេងមួយគ្រឿងទៀតផងដែរ ។
ប្រភពបានបន្តទៀតថា ខណៈពេលនោះដែរ ជនរងគ្រោះរងរបួសរងចាំរថយន្តសង្គ្រោះយូរពេក ពេលរថយន្តមកដល់ជនរងគ្រោះសឹងនឹងដាច់ខ្យល់បាត់ទៅហើយ លុះរថយន្តសង្គ្រោះរបស់ឯកជនបានដឹកដល់ពាក់កណ្ដាលផ្លូវ ជាអកុសលបានដាច់ខ្យល់ស្លាប់ ។
ក្រោយពេលកើតហេតុ ជំនាញចរាចរណ៍ខណ្ឌពោធិ៍សែនជ័យ បានមកដល់ចំណុចកើតហេតុ ហើយបានទាក់ទងជំនាញចរាចរណ៍រាជធានីភ្នំពេញ ធ្វើរការវាស់វែង នឹងយកទៅម៉ូតូ និងរថយន្តខាងលើ យកទៅរក្សាទុករង់ចាំការដោះស្រាយថ្ងៃក្រោយ ចំណែកសពត្រូវបាននគរបាលចរាចរណ៍រាជធានីភ្នំពេញ បានធ្វើលិខិតប្រគល់សពឲ្យប្រយពន្ធយកទៅធ្វើបុណ្យតាមប្រពៃណីនៅស្រុកកំណើត ៕
ចែករំលែកព័តមាននេះ