រាជធានីភ្នំពេញ ៖ រថយន្តមួយគ្រឿងជិះជាលក្ខណៈគ្រួសារ ខណៈដែលអ្នកបើកបរខ្វះការប្រុងប្រយ័ត្ន បានជ្រុលទៅបុកនឹងម៉ូតូមួយគ្រឿងដែលជិះដោយនារីជាជនជាតិហ្វីលីពីនម្នាក់ នៅផ្លូវបំបែកជាបួន បណ្តាលឲ្យនារីរូបនោះរងរបួសធ្ងន់ ហេតុការណ៍នេះបានកើតឡើងនៅវេលាម៉ោង១០និង៣០នាទីយប់ថ្ងៃទី១៨ ខែកុម្ភៈ ឆ្នាំ២០១៨ ផ្ទះលេខ៤៣២ កែងនឹង១០៥ សង្កាត់បឹងត្របែក ខណ្ឌចំការមន ។
ព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញនារីជាជនហ្វីលីពីន ម្នាក់មិនដឹងថា គោលបំណងទៅណានោះទេ គឺបានជិះម៉ូតូ ពណ៌ស ពាក់ស្លាកលេខភ្នំពេញ ១BM-២៥០៧បានធ្វើដំណើរតាមផ្លូវ១០៥ ក្នុងទិសដៅពីជើងទៅត្បូង ខណៈមកដល់ចំណុចកើតហេតុដែលជាផ្លូវបំបែកជាបួនស្រាប់តែរថយន្ត ពណ៌ខ្មៅ ពាក់ស្លាកលេខខេមរភូមិន្ទ០៩ .២.០៩៥៣ ជិះជាលក្ខណៈគ្រួសារ មានស្រីមានប្រុស និងកូនតូចពេញមួយរថយន្តព្រមទាំងខ្វះការប្រុងប្រយ័ត្នផងនោះ ក៏បានជ្រុលទៅបុកនឹងម៉ូតូដែលជិះដោយនារីជាជនជាតិភីលីពីន ចំពាក់កណ្តាលម៉ូតូពេញទំហឹង បណ្តាលឲ្យម៉ូតូអូសចូលក្រោម និងធ្វើឲ្យអ្នកបើករងរបួស ជើងខាងឆ្វេងធ្ងន់ ត្រូវបានរថយន្តសង្គ្រោះបានដឹកទៅសង្គ្រោះនៅគ្លិនិកឯកជន រីឯម៉ូតូរងការខូចខាតមួយចំហៀងខាងឆ្វេង កល់ជាប់ក្រោមរថយន្ត ។ ដោយឡែកខាងរថយន្តវិញ រងការខូចខាតក្រពិតផ្នែកខាងមុខបន្តិចបន្តួច តែមិនមានគ្រោះថ្នាក់ដល់មនុស្សដែលជិះនៅក្នុងរថយន្តនោះទេ ។
ក្រោយពេលកើតហេតុសមត្ថកិច្ចមូលដ្ឋាន និងជំនាញបានចុះទៅកន្លែងកើតហេតុ រួចហើយបានធ្វើការវាស់វែងដោយយករថយន្ត និងម៉ូតូទៅរក្សាទុកនៅការរិយាល័យចរាចរណ៍ជើងគោក រាជធានីភ្នំពេញ ដើម្បីរង់ចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ